7. ७. पर्मेस्वर इ याकुब काना आशिस्स बया

जब हुन बालक राउ हुर्केतल स्वासी ,याकुब नाम्हाल नयम रुचाउनी ,तर एसाब काना सिकार खयम मन ग्लानी ।रिबेका,याकुब काना मनौ पृउनी,तर इसाहक इ एसाब काना माया खयुनी ।

दाक्काले,जब एसाब सिकार हाइत नाम्हा फर्केया हुन्काना निक्माल र्याङ्ह्रेयानी ।एसाब इ याकुब काना गारा नाङि बनायाङ आइचिदा जान्याङ कुरा ङाकानाबैनिङ ?"याकुब इ जबाफ बया पहिला ङाकाना नाङ क धृमा आधिकार बैनिङ ।"अनि एसाब इ आफ्नो धृमा क आधिकार याकुब काना बया अनि याकुब इ हुन्काना आइचिदा जान्याङ कुरा बया।

इसाहक इ आफ्नो आशिष् एसाब काना बयम भ्र्याह्रेयानि।तर हुनि इसा खयम हाइत ध्री,रिबेका दैना याकुब मिलेतना याकुब काना एसाब साङ्ल बनातना हुराउ इ इसाहाक काना झुक्यासो।इसाहाक बड्डो ओसोह्रेयानी अनि आङ्ल कनि मुम्ह्रोउमानी।याकुब इ एसाक क थ्याङ्ह्री फाङ्तना अनि छेल्या क पाठो क छालाउ इ आफो तुकु दैना याकुराउ खोम्थाआनी।

याकुब इ इसाहाक दैना ओङ्ताना गारा,ङा एसाब हु। नाङ क आशिष् थाकम ङा ओङ्ह्रेका ।"जब इसाहक इ छेल्या क भुत्लाउ प्लाका अनि थ्याङ्ह्री राउ क बास्ना फ्लाम्हा ,हुन एसाब ल ओम्बृङ खैन्याङ हुनि सोचेया

एसाब इ याकुब काना घृणा खयुनी आहु खाझै याकुब इ हुन्क धृमा अधिकार दैना हुनि दारम बृन्याङ आशिष् खोसेथाआनी ।हुन्लमारै हुनि बयु सियाङ न्हौ ,याकुब काना सात्न्याङ योजना बनाआ।

तर रिबेका इ एसाब क योजना क बारेहा थाहा दारा ।हुन्लमारै इसाहक दैना रिबेका इ याकुब काना हुन ठन्क हाइतना ताह्रो आफ्नो आफन्तराउ हा लेत्बैसो।

याकुब चो बर्ष मचै रिबेका क नाम्क मन्छेराउ दै नया।हुन समयभित्रौ हुनि ब्याहा खया अनि हुन्क बार जना चाउराउ दैना दाठौ ग्रोमु ओआ।परमेस्वर इ हुन्काना चोल धनी बनाथाआनी ।

बीस बर्ष मचै आफ्नो नामु कनान हाइत टाढो नैह्रोयाङ न्हौ,याकुब आफ्नो जहान आफ्नो नोकर राउ अनि आफ्नो सारा गाइअबस्तु साथहा पित्तना कनान फर्केया।

याकुब चोल पृह्रेयानी आहुखाझै एसाब इ हुन्काना अझै सातम भ्र्याकङकि गार्तना हुनि सोचेथाआनी ।हुन्ल मारै याकुब इ चोल उपहार स्वरुप एसाब निङ्हा लेता।गाई बस्तु कात्तना स्वायाङ नोकर राउ इ एसाब काना गार्सो,"नाङ्क दास याकुब इ नाङ्काना इन गाई बस्तु लेत्बैथाका।उइ चाढोल ओङ्छाकङ"।

तर एसाब इ याकुब काना पहिलाल क्षमा बैलेत्थाआनी अनि हुराउ इ दा इ अर्को काना फिरि मुम दार्त खुसी ओसि। हुन न्हौ याकुब कनान हा शान्ती ओत नया।हुन न्हौ इसाहाक सिया,अनि याकुब दैना एसाब इ हुन्काना किम्सो ।परमेस्वर इ अब्राहम दैना खयाङ करार नो इसाहक हाइतना याकुब हा सरेया।