8. ८. परमेस्वर इ योसेफ दैना हुन्क नाम्क काना बाचाआ

योसेफ क दाजुउ राउ इ हुन्काना घ्रीणा खैयनि, आहुखाझै हुराउहाइतना कनि हुन आफ्नो बयु क सबहाइताना प्यारो ह्रेनी। अनि योसेफ इ उइ हुराउक सासक ओयाङ म्हानी मुथाआनी जब योसेफ हुन्क दाजुउ राउ हा तोम्पिया ,हुराउ इ हुन्क अपहरण खैसो अनि दास व्यापारी क याकुहा क्लात्बैसो

चो बर्ष न्हौ ,जब याकुब बड्डो ओसोह्रेआनी उइ क आफ्नो सबहाइतना प्यारो चाउ,योसेफकाना बगालराउ क हेरचाह खैछायाङ आफ्नो दाजुउ राउ क हा जाँच खयम लेता।

योसेफ क दाजुउ राउ नाम्हा फर्केम ध्री योसेफ क थ्याङ्ह्री चोत्बैसो अनि हुन्काना छेल्या क सि हा थिङ बैसो।अनि हुराउ इ हुन लबेदाआफ्नो बयु काना सार्सो ताकी योसेफ काना आङ्भनी जङ्गली जनावर इसात्का खैतना सोचेए द।इन मुतना याकुब चो दुखी ओआ।

हुन दास व्यापारी राउ इ योसेफकाना मिश्रदेशहा कात्सो।मिश्रदेश निल नदिक छेउहा ब्रीनी ,इन चो बरे दैना चो शक्त्तिशाली देश ह्रेनी ।हुन व्यापारी राउ इ योसेफकाना दा जना धनी सरकारी करमचारी क याकुहा क्लात्बैसो ।योसेफ इ आफ्नो मालिक क मजाइतना हेरचाह खया अनि परमेश्वर इ हुन्काना आशिष बया।

योसेफ क मालिक क मत्काउ योसेफ दैना निङम भ्र्याआ तर परमेश्वर क बिरुद्धहा इसैतना पापखयम उइ इन्कार खया।इन्लमारै हुन रिसेया अनि योसेफ क बिरुद्धहा झुठा आरोप स्लाआ,जाङ कारण इ योसेफ चुमिया अनि झ्यालखाना हा जाक्सो ।झ्यालखाना हा ओत्याउ कनि योसेफ इ परमेश्वरहा भरोसा थाआ अनि परमेश्वर इ योसेफकाना आशिष बया।

नि बर्ष न्हौ ,निर्दोष ओआझैकनी योसेफ अझल झ्यालखानाहाल ह्रेनी ।दा झिरी मिश्रीराउ क राजा फारोइ निठौ म्हानी मुआ अनि हुनि हुन्काना निक्मा सताआ।हुन्क गुन्ल सल्लाहकारराउ इ कनि हुन सपना क रहस्य गारम ह्रोसोमा।

परमेश्वर इ योसेफकाना सपना क अर्थ गारम ह्रोन्याङ बरदान बैथाआनि ,हुन्लमारै फारोइ योसेफकाना झ्यालखानाहाइत स्लोकम स्लाआ।योसेफ इ फारोक सपाना क अर्थ गारबया अनि क्लाइया," परमेस्वर इ नो क साठ्ठ बर्ष मचै चोलखैतना अन्नाराउ बैन्याह्रेङअनि हुन न्हौ क साठ्ठ बर्ष अनिकाल ब्रीन्याङ ह्रेङ।"

योसेफदैना फारो इच्च खुशी ओआ कि हुनि योसेफकाना सारा मिश्रदेश भरेत क दोस्रो सक्तिशाली मन्छे नियुक्त्त खया।

योसेफ इ मन्छेराउकाना प्रसस्त फसल क साठ्ठ बर्ष हा चोल अन्न थुप्राम स्लाआ।अनि साठ्ठ बर्ष अनिकाल क समयहा योसेफ इ हुन अन्नराउ क्लाता ताकी मन्छेराउक लागै चाहेयाङ जच्च जान्याङ कुरा दुम्द।

अनिकाल मिश्र देशहा च्याल माओतना कनान देश हा कनि ब्रीह्रेयानी जहाँ याकुब दै हुन्क नाम्क नइनि ।

हुन्लमारै याकुब इ ध्रीमा चाउराउ काना मिश्रदेश हा जान्याङ कुरा लाम लेता ।दाजुउराउइ जान्याङ कुरा लओम मिश्र देश हा स्वात्याउ हुराउइ योसेफ काना स्रेसोमा ,तर योसेफ इ हुराउ काना स्रेलेता।

अनि आफ्नो दाजुउराउ परिबर्तन ओह्रेक्सी कि ओतमा गार्तन जाँच खयाङ न्हौ योसेफ इ हुराउ काना गारा,"ङा नाराउ क गोत्याउ योसेफ हु ,ताप्रीनी ।नराउ इ ङा काना दास क रुपहा क्लात्तना दुष्ट काम खयम भ्र्यासी,तर परमेस्वर इ दुष्टताकाना मजा काम क लागै चलाआ।ओङ्तना मिश्र देह हा नैनी ताकी नाराउदैना नाराउ क नाम्क राउकाना ङाइ जुटाम ह्रोउ"।

जब योसेफ क दाजुउराउ नाम्हा फर्केसी अनि योसेफ अझल जिउदो ओयाङ खबर आफ्नो बयु याकुब काना सुनासो ,हुन चो खूशी ओआ।

याकुब बड्डो ओआ तापनि आफ्नो सब्ल नाम्क काना कात्त्तना उइ मिश्र देश हा काआ अनि ह्वाल नयम ग्लाआ।सिम हाइत ध्री याकुब इ आफ्नो सब्ल चाउराउकाना आशिष बया।

परमेस्वर इ अब्राहमकाना प्रतिज्ञा खयाङ करार अब्राहाम हाइत इसाहाक हा सरेया ,अनि याकुबहा,अनि याकु क बाह्र चाउराउ अनि हुराउ क नाम्हा ।हुन बाह्र चाउराउ क सन्तानराउ हाइतल इजरायल क बाह्र कुलराउ ओसि ।