9. ९. परमेस्वरहाइत मोशाकाना बोलाओट

योसेफ सियाङ न्हौ , हुन्क सब्ल आफन्तराउ मिश्र देश हाल नयम ग्लासी ।हुराउ क सन्तानराउ कनि चो बर्ष मचै निरन्तर रुपहा ह्वाल बसोबास खयम ग्लासी अनि हुराउ क चो सन्तान ओसि ।हुराउकाना "इजरायली" गारेनी।

सयौ बर्ष न्हौ इस्रारायली क सङ्ख्या चो वृद्धि ओसोह्रेयानी ।मिश्रीराउ इ योसेफ दैना हुनि हुराउ क लागै खयाङ सब्ल मजा कामराउ बिर्सेलेत्थासोनी ।हुराउ इस्रायाली राउ दै प्रीम ग्लासी आहुखाझै हुराउ चोल ह्रेइनी ।हुन्लमारै हुन समय हा मिश्र देश हा राज्य खैछायाङ फारो इ इस्रायलीराउ काना मिश्रीराउ क दास बनाआ।

मिश्रीराउ इ इस्रायली राउ काना चोल भबनराउ अनि पूरा शहरराउ बनाम स्लासो ।क्षे परिश्रम इ हुराउ क जीवन काना कठिन बनाआ,तर परमेस्वर इ हुराउकाना आशिष बया ,अनि हुराउ क सन्तानराउ अझल बढेकातसी ।

इस्रायलि राउ इ चो हाइत चो लान्हिङ राउ जन्मायाङ फारो इ मुआ,हुन्ल मारै हुनि आफ्नो मन्छेराउकाना सब्ल इस्रायली राउ क भर्खर जन्मेयाङ चाउराउ काना निलनदीहा तम्त सात्न्याङ आदेश बया।

गुसाङ दाठौ इस्रायली मच्चाइ दाठौ चाउ जन्माआ।हुनि दैना हुन्क बुह्राउ इ आफुइ ह्रोन्याङ समय मचै हुन बालककाना स्लुप्तना थासो।

जब हुन बालख क जेयु-बयु इ हुन्काना अरु चो समय स्लुप्तना थाम ह्रोसोमा ,हुन्काना सिमहाइतना बचाम हुराउइ डाठौ कोक्रो बनात बालखकाना हुनभित्रौ थाबैसो अनि निल नदि क किनारहा नर्कट क झाडि क बिचहा लेत्बैसो ।बालख क दिदिउ इ हुन्काना आङ ओन्याह्रेका गार्तना मुछानी ।

फारो क ग्रोमु इ हुन कोक्रो काना मुआ अनि हुनभित्रौ आङ्ह्रेका खैतना खोलेत मुआ।जब हुनि बालख काना मुआ हुन इ हुन्काना आफ्नोल चाउ क रुपहा थाआ।हुनि दाठौ इस्रायली मच्चाकाना हुन बालख क हेरचाह खयम ज्याला बैतना थाआ तर हुन मच्चा बालख क आफ्नोल जेयु हुनि गारन्याङ कुरा हुन्काना थाहा हैमानि।जब हुन बालक नो दुदा मा-नुम ब्रीन्याङ मच्च बरे ओआ,हुन मच्चाइ हुन्काना फारो क ग्रोमु निङ्हा लेत्बया जाङी हुन्क ब्रीङु मोसा थाआ।

दाक्काले ,जब मोसा बरे ओसो ह्रेयानी ,दाठौ मिश्री दाठौ इस्रायली दासकाना मक्छायाङ मुआ ।मोसाइ दाठौ इस्रायली मन्छेकाना बचाम भ्र्याआ।

जब मोसाइ आफुकाना गुनिल मुकिमा गारन्याङ सोचेया अनि हुन मिश्री काना सात्तना हुन्काना किम्बया।तर मोसाइ हुन मिश्रीकाना हत्या खयाङ गुन्भनी मुथाआनी ।

जब फरोइ मोसाइ खयाङ हत्या क बारेहा थाहा दारा ,हुनि मोसाकाना सातम भ्र्याआ।हुन्लमारै फारो क सैनिक हाइत बचेम मोसा मिश्र देशहाइत ब्रोक्तना उजाड थन्कहाइ स्वाआ।

मिश्रदेशहाइतना टाढो हुन उजाड थन्कहा मोसा दाठौ गोठाला बनेआ ।हुनि हुन थन्क क दा-जना मच्चादैना ब्याहा खया अनि हुन्क निठौ चाउराउ ओसि ।

दाक्काले जब मोसा आफ्नो भेडीराउ मुछानी, हुनि दाठौ पोथ्रा मुआ जाङ मुइ जोर्छानी ।तर हुन पोथ्रा जोर्तना भस्म ओआमा ।हुन पोथ्राकाना अझ मजाइत मुम मोसा हुन्क नजिकल स्वाआ।जब हुन जोरछायाङ पोथ्रा क नजिकल तोम्पिया परमेस्वर इ गारा ,"मोसा,नाङ्क जुत्ताराउ खोले आहुखाझै नाङ पबित्र भुमिहा ह्रीपिह्रेका।"

परमेस्वर इ गारा,"ङाइ ङाक मन्छेराउ क कष्ट मुथाका।ङा नाङ्काना फारो निङ्हा लेथहैना ताकी नाङी इस्राइली राउकाना मिश्रदेश क दासत्वहाइतना छुटातना पित्थौ।ङा हुराउकाना कनान देश बैहौ,,हुन देश जाङ ङाइ अब्राहम इसहाक अनि याकुबदैना प्रतिज्ञा खैथाआनी।"

मोसाइ सुधेया,"मन्छेराउइ गुनि लेत्याङ्हु गार्त सुधेयाझै ,ङा आङ गारु?"परमेस्वर इ गारा,"ङा हु ,जाङ ङा हु।हुराउकाना इसा गारबयम," ङा हु"क्ल्याइन्याङ इ ङा काना नराउ निङ्हा लेत्याङ हु।हुराउकाना इन कनि गार्बयम"ङा योहोबे हु,नराउ क पितापुर्खा,अब्राहाम ,इसहाक,दैना याकुब क परमेस्वर "।ङाक ब्रीङु सदा-सर्बदाक लागै इन्ल हु"।

मोसा प्रीह्रेयानी अनि फारो निङ्हा काम भ्र्यातमानी आहुखाझै आफू ठिक खैतना थामम ह्रोकुमा खैन्याङ हुनि सोचेथाआनी,हुन्लमारै परमेस्वर इ मोसा क गोत्याउ हारुन काना हुन्क सङ्घै साहायता क लागै लेता।फारो हठी ओन्याह्रेङ गार्तना परमेस्वर इ मोसा दै हारुन काना सचेत खया।