17. दाऊद रे साथे परमेश्वर री वाचा

शाऊल इस्राएल रो पेहलो राजा हेतो। वो लंबा अर सुंदर हेतो, जैणा वे लोग चावता एकदम वैणौ। इस्राएल माथे खुदरे शासन रे पेहले थोड़ाक बरसो माये शाऊल एक बढ़िया राजो हेतो। पण बाद में वह एक दुष्ट व्यक्ति बण गियो, जिसणे परमेश्वर री बातों को नी मानियो। इण वास्ते परमेश्वर ने एक दूजे मिनक को चुणियो जको एक दिण उणरी जागा माथे राजो बणेला।

परमेश्वर ने दाऊद नाम रो एक जवान इस्राएली मिनक को चुणकर एक दिण शाऊल री जागा माथे राजो व्हेणे तैयार करणो शुरू किदो। दाऊद बैतलहम नगर रो एक चरवाहो थो। केई वेला माथे, दाऊद ने नार अर भालू दोयो को मार डालियो, क्यूके दाऊद द्वारा रुखाली करतोड़ो उणरे बाप री भेड़ों माथे वे हमलो किदो। दाऊद एक नमर अर धरमी मिनक थो। वो परमेश्वर माथे भरोसो किदो अर उणरी बातों को माणियो।

जद दाऊद अबार जवान मिनक ही थो, वो लंबे-चौड़े गोलियत रे खिलाफ लड़ाई कीदी। गोलियत एक घणो छोखो सैनिक थो। वह घणो मजबूत अर लगभग तीन मीटर लमबो थो! पण परमेश्वर ने गोलियत को मारणे अर इस्राएल को बचाणे माये दाऊद री मदद किदी। इणरे पाछे, दाऊद ने इस्राएल रे शत्रुओं माथे केई बला जीत हासिल किदी। दाऊद एक बडो सैनिक बणगियो, अर वो केई युद्धों मायने इस्राएली सेणा री अगुवाई किदी। लोगों ने उणरी घणी परशंसा किदी।

लोगों ने दाऊद सू इतरो मोह किदो कि शाऊल उणसू जलणे गियो। आखिरकार शाऊल उणे मार डालणो चावतो, इण वास्ते दाऊद उणसे अर उणरे सैनिकों सू लूकणे रे वास्ते जंगल मायने भागो। एक दिण, जद शाऊल अर उणरे सैनिक दाऊद री खोज माय हेता, तो शाऊल एक गुफा माय गियो। आ वाईज गुफा थी जिणमें दाऊद लुकियोडो हेतो, पण शाऊल ने उणे नी देखियो। दाऊद शाऊल रे लारे उणरे घणो कणे चलो गियो अर उणरे गाबा सू एक टुकडो काट लियो। पाचे, जद शाऊल उण गुफा सू निकलियो तो दाऊद ने उणे पुकारियो उण पकडियोड़ा गाबा रे टुकड़े को दिखायो। इण रीत सू, शाऊल जाण गियो कि दाऊद ने राजो बणणे रे वास्ते उणे मार डालणे सू इंकार कर दियो।

थोडिक वेला रे पाचे, शाऊल युद्ध मायने मर गियो, अर दाऊद इस्राएल रो राजो बणियो। वो एक छोखो राजो थो, अर लोगों ने उणसू मोह राखियो। परमेश्वर ने दाऊद को आशीषित किदो अर उणे सफल बनायो। दाऊद केई युद्ध लडिया, अर परमेश्वर ने इस्राएल रे शत्रुओं को हराणे माय उणकी मदद किदी। दाऊद ने यरूशलेम नगर को जीतअणे उणे खुदरी राजधाणी बणाई, जटे वो रियो अर शासण किदो। दाऊद चालीस बरसो ताई राजो रियो। इण वेला रे दौराण, इस्राएल सामरथी अर धणवाण बण गिया।

दाऊद एक मंदिर बणावणो चावतो जटे सगला इस्राएली परमेश्वर री आराधणा कर सकें अर उणरे वास्ते बलिदाण चढ़ा सकें। लगभग 400 बरसो सू, वे लोग मूसा रे बणायोडा मिलाप वाले तंबू मायने परमेश्वर री आराधणा करता अर उणरे वास्ते बलिदान चढ़ावता।

पण वटे नातान नाम रो एक भविष्यद्वकतो थो। परमेश्वर ने उणे दाऊद सू ओ केहणे रे वास्ते भेजियो: "थू घणाही युद्ध लड़िया, इण वास्ते थू मारे वास्ते इण मंदिर को नी बणावेला। थारा छोरा इणे बणावेला। तौभी, म्हु थने घणोही आशीषित करूँला। थारो एक वंशज सदा रे वास्ते मारे लोगों माथे राजा रे रूप माये शासण करेला।" सदा रे वास्ते शासण करणे वालो वो दाऊद रो एकमात्र वंशज मसीह थो। मसीह परमेश्वर को चुणियोड़ौ जन थो जको संसार रे लोगों को उणरे पापों सू बचावेला।

जद दाऊद ने नातान रे संदेश को सुणियो, तो वो परमेश्वर रो धनियावाद किदो अर उणरी स्तुति किदी। परमेश्वर उणरो माण को बढ़ायो अर उणे घणीही आशीषें दीदी। बेशक, दाऊद नी जाणतो कि परमेश्वर इण बातों को कद करेला। इण वेला आपा जाणा कि इस्राएलियों को एक लंबे वेला ताई, लगभग 1,000 बरस ताई मसीह रे आणे री परतीक्षा करणी व्हेला।

दाऊद ने केई बरसो ताई न्यायपूर्वक अपणे लोगों माथे शासण किदो। वो घणी निष्ठा सू परमेश्वर री बातों को माणियो अर परमेश्वर ने उणे आशीषित किदो। हालाँकि, अपणे जीवण रे अंत माय वो परमेश्वर रे खिलाफ घोर पाप किदो।

एक दिण दाऊद ने अपणे मेहेल सू बाहरे झाँकियो अर एक सुंदर नारी को नावतोड़ी देखियो। वो उणे नी जाणतो, पण वो मालूम करलियो कि उणरो नाम बतशेबा थो।

खुदरी निजरा को फेरणे रे बजाए, दाऊद ने उणे खुदरे कणे लाणे रे वास्ते किणी भेजियो। वो उणरे साथे हुतो अर उणे पाची घरे भेजदी। थोड़ीक वेला रे पचे बतशेबा ने ओ केहणे दाऊद रे कणे संदेश भेजियो कि वा जापायती है।

बतशेबा रो धणी ऊरिय्याह नाम रो एक मिनक थो। वो दाऊद रे उत्तम सैणिकों मायनू एक थो। इण वेला वो युद्ध करणे रे वास्ते बाहरे गियोड़ो हेतो। दाऊद ने ऊरिय्याह को युद्ध सू पाचो बुलायणे उणे उणरी लुगाई रे साथे रेवणे रे वास्ते कियो। पण दूजा सैणिक युद्ध मायने हेता इण वास्ते ऊरिय्याह ने घरे जाणे सू मणा कर दियो। अतः दाऊद ने ऊरिय्याह को पाचो युद्ध मायने भेजियो अर सेनापति सू उणे युद्ध मायने ऐड़ी जागा माथे राखणे रे वास्ते कियो जटे शत्रु सबाउ शक्तिशाली व्हे, ताकि वो मारियो जावे। तो ऐणो हुआ कि ऊरिय्याह युद्ध मायने मारो गियो।

ऊरिय्याह रे युद्ध मायने मर जाणे रे पचे दाऊद ने बतशेबा सू ब्याव करिलियो। पाचे, वा दाऊद रे छोरे को जिणीयो। दाऊद ने जको किदो उणसू परमेश्वर घणो क्रोधित हेतो, इण वास्ते उणने नातान भविष्यद्वक्ता को दाऊद को ओ बतावणे रे वास्ते भेजियो कि उणरो पाप कितरो बुरो थो। दाऊद ने अपणे पाप रो पश्चाताप किदो अर परमेश्वर ने उणे क्षमा कर दियो। अपणे शेष जीवण मायने, अपणे कठिन वेला मायने भी दाऊद परमेश्वर रे लारे-लारे हालियो अर उणरी बातों को मानियो।

पण दाऊद रो छोरा मर गियो। इण रीति सू परमेश्वर ने दाऊद को दंडित किदो। इणरे अलावा, दाऊद रे मरणे ताई, उणरे खुदरे परिवार रे थोड़ाक लोगों ने उणरे खिलाफ लड़ाई किदी, अर दाऊद री अपणी शक्ति कम व्हेगी। पण परमेश्वर विश्वास योग्य थो अर अबे भी उणने वो किदो जको उणने दाऊद सू करणे रो वादो कीदो कि वो करेला, भले ही दाऊद ने उणरी अवज्ञा किदी। पाचे, दाऊद अर बतशेबा रे दूजो छोरा पैदा व्हिहो, अर वे उणरो नाम सुलैमान राखियो।