47. फिलिप्पी माय पौलुस अर सीलास

जद शाऊल ने सगळी रोमी साम्राज्य माय यातराएँ किदी तो उणने खुदरे रोमी नाम "पौलुस" रो उपयोग करणो शरू कर दियो। एक दिण, पौलुस अर उणरो साथी सीलास फिलिप्पी नगर माय यीशु रे बारे माय शुभ सणदेश सुणाने रे वास्ते गिया। वे नगर रे बाहरे नदी रे किनारे एक जागा माथे गिया जटे ळोग पराथणा करणे रे वास्ते भेळा रिया। वटे वे लुदिया नाम री एक लुगाई सू मिळिया जको एक वैपारी हेती। वा परमेश्वर सू परेम करती अर उणरी आराधणा करती।

परमेश्वर ने लुदिया को यीशु रे बारे माय सणदेश माथे विशवास करणे रे वास्ते सकसम किदो। पौलुस अर सीलास ने उणे अर उणरे परिवार को बपतिस्मा दियो। उणने पौलुस अर सीलास को खुदरे घरे रुकणे रे वास्ते निऊतिया, इण वास्ते वे वटे रुकिया।

पौलुस अर सीलास ळोगों ऊ केईभळा उण जागा माथे मिळता जटे यहूदी ळोग पराथणा किया करता। रोजीणा जद वे वटे जावता तो एक दासी छोरी जको दुष्टात्मा द्वारा काबू हेती उणरो ळारो किया करती। इण दुष्टात्मा रे माध्यम सू वा ळोगों रो भविष्य बताया करती, इण वास्ते वा भविष्य बताणे वाळी रे रूप माय खुदरे मालिको रे वास्ते घणों धन कमाया करती।

उणरे जावतोड़ी वेळा आ दासी छोरी हाका करती, "ये मीनक परम परधाण परमेश्वर रा सेवक व्है। ये थाणे उद्धार पाणे रो मारग बतावे!" वा रोजीणा ऐणो किया करती जिणसे कि पौलुस नाराज़ व्हेगियो।

अंत माय, एक दिण जद उण दासी छोरी ने हाको शरू किदो, तो पौलुस ने उणरे धकिने मुड़ परो उणरे मायळी दुष्टात्मा सू कियो, "यीशु रे नाम सू इण माय सू निकळ जा।" उणी वेळा उण दुष्टात्मा ने उणे छोड़ दियो।

उण दासी छोरी रे मालिक घणा रिसगिया। वाणे माळूम व्हेगियो कि बिणा उण दुष्टात्मा रे वा दासी छोरी ळोगों रो भविष्य नी बता सके। इणरो मतलब थो कि ळोग अबे उणरे माळिको को पैसा नी देंळा कि वो उणको भविष्य बतावे कि उणरे साथे कई व्हेळा।

इण वास्ते उण दासी छोरी रे माळिक पौलुस अर सीलास को रोमी अधिकारियों रे काणे ले गिया। वे पौलुस अर सीलास को पीटियो, अर पाचे उणको जेळखाणे माय डाल दियो।

वे पौलुस अर सीलास को जेळखाणे रे ऐणे हिस्से माय राखियो जटे सबाऊ हळा सिपाही हेता। अटे ताई कि वे उणरे पगो को लकड़ी रे मोटा टुकड़ों माय जोड़ दियो। पण पौलुस अर सीलास आधी रात री वेळा, परमेश्वर री स्तुति रा गीत गावता।

एकाएक सू, एक भयानक भूकम्प व्हियो! जेळखाणे रे सगळे द्वार खुळ गिया, अर सगळे कैदियों री जंजीरें खुल परी पड़गी।

तबे दरोगा जागियो। वो देखियो कि जेळखाणे के द्वार खुळियोड़ा हेता। वो सोचियो कि सगळा कैदी बचपरा नाईगा। वो डर गियो कि वाणे भाग जाणे रे कारण रोमी अधिकारी उणे मार डालेंळा, इण वास्ते वो खुदणे मार डालणे रे वास्ते तैयार व्हेगियो! पण पौलुस उणे देख परो हाको किदो, "रुक जा! खुदको नुकसाण मती पुगा। म्हा सगळा अटीज़ हा।"

उण दरोगा ने काँपतोड़ो पौलुस अर सीलास रे कणे आयणे पूछियो, "उद्धार पाणे रे वास्ते म्हु कई करूँ?" पौलुस ने जबाब दियो, "परभु यीशु माथे विशवास कर, तो थू अर थारो घराणों उद्धार पावेळा।" तबे वो दरोगा पौलुस अर सीलास को खुदरे घरे ले गियो अर उणरे घावों को धोयो। पौलुस ने उणरे घर रे सगळा लोगों को यीशु रे बारे माय शुभ सणदेश सुणायो।

दरोगा अर उणरे सगळे परिवार ने यीशु माथे विशवास किदो, इण वास्ते पौलुस अर सीलास ने उणको बपतिस्मा दियो। तबे दरोगा ने पौलुस अर सीलास को भोजण करवायो, अर वे एक साथे आनन्दित व्हिया।

धकळे दिण नगर रे अगुवों ने पौलुस अर सीलास को जेळखाणे सू आज़ाद कर दियो अर फिलिप्पी सू चले जाणे रे वास्ते कियो। पौलुस अर सीलास लुदिया अर कुछेक दूजा साथियो ऊ मिळिया अर उणरे पचे नगर सू निकळ गिया। यीशु रे बारे माय शुभ सणदेश फैलतो गियो, अर कलीसिया बढ़ती गी।

पौलुस अर दूजा मसीही अगुवों ने घणाई नगरों की यातरा किदी। वे ळोगों को यीशु रे बारे माय शुभ सणदेश सुणायो। वे कलीसियाओं रे विशवासियों को उत्साहित करणे अर शिकसा देणे रे वास्ते केई पतर भी लिखिया। इणमें सू कुछेक पतर बाइबल री किताबा बणगी।