23. यीशु कि ज़िना।

युसुफ मिन कि मि धरमि रांग ञाबु मरियम कि रिश्ता चाछा वोका। जब खो मरियम जुहु नातपा वोकाक सि छोरा, तेने खोला हुन वोका कि ओए छिवा ते खोए मानोक। परन्तु, खो मरियम ला ङोज़ा कुतमु मिका, ओए छिला खो खोला दिमु फेति सेमबा। तेने खदुशा थाक चोतचा सेम्बा। परन्तु वोतुक फेति सेमजि थागला खोए मिगलम ला स्वरगदुत वोंगजा खोला वुर तांगबा।

ओए स्वरगदुत सु नावा, “ऐ युसुफ, मरियम ला ख्योए नामा कि लामु खेगंजा ला माजिह। खोए ठोतपा ना वोकान छिवा ते नमशे चांगमा कि छोकनासु नोक। खो टु जिक ला कियाक। खोए मिन ते यिशु फोर (वोतु क सेरना, ‘यहोवा क्योफकाक‘), चिला सेरना खो मिया ला खोशे दिकपा नासु क्योफकाक।”

तिंगला युसुफ सु मरियम ला नामा लेनजा सु तेने खोला नामा ला खांगबा रु खेगबा, परन्तु खोए चिवा केके छुहु खो खोरांग ञाबु रिश्तास माफोरा।

जब मरियम कि छिवा केया रानजा वोतज़िना, खो रांग युसुफ सु बैतलहम नगर ला डोया ला युम डोगु चुआक। खोशाक ला ओएरु डोगु वोका चिला सेरना रोमि गोआया इस्राएल दु दोतकान मि तोलि ला ठांगखा ज्ञाएका। खोशाक ला गोएका कि खोशे गडिंबा मिया कि दोतसा रु वोंगजा। ज्ञलवु दाउद ते बैतलहम दु किवा, तेने खो मरियम युसुफ ञिकार कि गडिमबा नोक।

मरियम दांग युसुफ बैतलहम ला फुता, परन्तु ओएरु दोतचा ला गलछु फोरसि ज़ा ते मनि जिनमा ज़ा माथोवा। ओऐ ज़ा ते मरियम कि चिवा केसि ज़ा ते नोक। खोसु खोला खोनजा कोनशा ज़ोन कि खातोरु ञालवा। चिला सेरना ओएना ञालसा मिका। खोशाक सु ओए छिवा कि मिन यिशु फोरा।

ओएशाक गोंगमु, ओए दोए शेङगा ना लुगज़िया खोशे छुगमाया ला टुंगशा वोका। लनचिक ला, वोतचिन चिक ला स्वरगदुत वोगताक, तेने खोशाक जिहसा। ओए स्वरगदुत सु नावा, “माजिह, चिला सेरना ङाए दोना ख्योलशि छिला लोन दिमु चिक वोत। दिरिंग ज्ञलवु दाउद कि नगर बैतलहम गु ख्योखए छिला मुक्ति तोङान ज़िक किवाक!”

ओएरु फुतला ओए छिवा ला फोत, तेने ख्योशाक खोला खोनजि नांगना तुमशा तेने ज़ोन कि खातोकना ञालशा थोपका। लनचिक ला, नम रु स्वरगदुत सु खांगसा। खोशाक कोंजोक कि मोलळम ज्ञयिक। खोशाक वोतुक लु तोंयिका, “महिमा तोलि स्वरग ना वोकान कोंजोक ला थोपतु छुक। जमबुलिंग कि मिया लो दिमु वोगंदु छुक जिनकि खो छिरि फेतिका!”

तेने स्वरगदुत फुसाक। ओए लुगज़िया कांग छुंगमायाला फोरचा ओए छिवा तेला तारु फुसाक। खोशाक ज्ञोवा ओए यीशु वोतसे ज़ारु लेपसाक तेने खोशाक सु खोला ज़ोन कि खातोना ञालशा वोता थोवां, जैसा ओए स्वरगदुत सु नाशा वोकान चोनि। खोशाक गरिशिया वोका। तेने ओए लुगज़िया ओएनासु लोकसा खोशे छुगमा वोतसारु फुसाक। खोशाक सु थोंङान याकि छिला खोशाक कोंजोक ला मिहवा फेतिका।

पुरव छोक कि छवनि ना मि गनजिक वोका। खोशाक सु कारमा या ला सिलजा वोका तेने खोशाक ज्ञमनि रिकपा वोकान नोक। खोशाक सु नमरु कारमा सो सो चिक थोंवा। खोशाक सु चावा वोतुक सेराला यहुदिया कि ज्ञलवु सोमा चिक केवा। ओएछिला खोशाक ओए छिवा तेला तारु डोया ला खोशि छवनि नासु डोया ला लाफा। युम डुलवि तिंगला, खोशाक बैतहलम रु वोगबा ओए खांगबा ते थोवा जहां यिशु रांग खोए आपा-आमा दतचा वोका।

जब ओए मियासु यीशु रांए आमा रांग ञाबु वोता थोंवा तेने खोशाक खुकचा खोला छाक चावा। खोशाक सु यीशु ला ख्योमा खुनबु तातपा। तेनै खोशाक खांगबाला लोकसाक।