26. यीशु रांए सेवा फेतचा सुकाक।

शैतान कि छोत ताया ला माञिनदा कि तींगला, यीशु गलिल कि ज़ारु लोकचा वोंगबा। ओए ज़ा ते खोए दोतसि ज़ा नोक। नमशे चांगमा ते खोला ज्ञमनि शक्तिा तेरिका, तेने यीशु ओए ज़ा तेनासु जिनमा ज़ारु फुता तेने मिया ला लावा। तोलि सु खोला छिला वुर दिमु चावा।

यीशु नासरत युल रु वोंगबा। ओय युल रु खो चुन वोतज़िना दतपा। सब्त्म कि शाक, खो मिहवा फेतसा रु फुता। अगुवों सु यशायाह ङोनशि शोतकान कि लोनया कि पेजा चिक तातपा। खौशाक सेमिका कि खो ओएनासु सिलि। जुङमाला यीशु सु ओए पेचा ला लोहशा ओए नासु काला चिक मिया कि छिला सिला।

यीशु सु सिला, ”कोंजोक सु ङाला खोए नमशे ते ताचुंग ताकि ङा मितपु याला काचा शोतचा ला। खोसु ङाला ओए छिला तांगबाकि ङा कैदिया ला आज़ाद फेतचाला, शारा ला मिक तेरचा ला, तेने औए याला दोनजाला जिनको जिनमा मिया सु नोनिका। ओए नमला ते वोतुक नोक जब कोंजोक सु होशाकला खेनिका तेने वोशे रोह फेतिका।”

तेने यीशु सेला दताक। मिया तोलि खोला तानतान ताशा वोका। खौशाक ला हुन वोका कि पेचा चांगमा ते खोसु सिलकान तेओए मसीह कि छिला नोक। यीशु सु नावा, ”ओयि वुर ते ङा ख्यो ए छिला सिलमासुवां, ओए ते थासांग दिना फितिका मि तोलि हालाशा वोका। खोशाक सु चावा, चि दि युसुफ कि टु मानोवा?”

तब यीशु सु चावा, “ओए ते दिनबा नोक कि मिया सु वोतुक ङोनशि शोतकान ला फादिंग मिञिनङा जो खोशिरि युल दु दतचा छेपु छारा। एलिय्याह ङोनशि शोतकान कि ज़िना, इस्राएल रु युकसामा युम वोका। परन्तु लौ सुमज्ञा ङपचु छुहु नम मज्ञवा वोतज़िना कोंजोक सु एलिय्याह ला इस्राएल रु युकसामु ला रोह फेततु मातांगबा। ओए मानदा, खोसु एलिय्या़ह ला जिनमा सिदोन छवनि कि युकसामा कि दोरु तांगबा।“

यीशु सु सेरकिन दतपा, “दुरुंग एलिशा ङोनशि शोतकान कि ज़िना, इस्राएल रु मि युम ज़ि कि नाज़ा सु नाशा वोका। परन्तु एलिशा सु खोशायाए नांगना सुला कांग दिमु माज़ोवा। खोसु लिम इस्राएल कि डया कि माहमि छेपु नामान ला दिमु ज़ोवा।” परन्तु ओयि मि यीशु ला ञनशा वोकान या ते यहुदि नोक। ओए छिला खोशाक खोला वोतुक सेरा छोरा खोशाक खोला छिङनाह लांगबा।

नासरत कि मिया सु यीशु ला ज़ुम ताक तेने खोला मिहवा फेतसि ज़ा नासु ठुतचा फिताला खेगबा। खोशाक खोला सातचा युकचि छिला डोंङखि गोरु खेगबा। परन्तुल यीशु ओए सेपनासु थोन वोगंबा तेने नासरत युल ला तांगशा फुसाक।

तेने यीशु गलिल कि ज़ा तोलि ला फुता, तेने मिया कि छो छिपुजिक खोए दोरु वोंगबा। खोशाक सु मि नातपा रांग मि ख्योनबा युम ला खिंगबा। खोशायाए नांगना रेशि मिथोङान, डुलगु मिशोतका, ञनगु रांग सेरगु मिशोतकान वोका, यीशु सु खोशाक तोलि ला गारु चुकपा।

ओए मागोता, लाडिं शुहदोकान युम कांग यीशु कि दोरु खेंगबा। यीशु सु ओए शैतान याला खोशि नांगनासु थोनला सोगं सि नावा। ओए लांडिया कुरा ज्ञाएका, “ख्यो त कोंजोक कि टु यिनदा!“ ओए मिया हा लादिका, तेने खोशाक सु कोंजोक कि मिहवा चावा।

तेने यीशु सु मि चुञि ला दांमबा जिनको खोसु रांए प्रेरित चावा। ओए प्रेरितों सु खोरांग ञाबु दताक तेनि खोनासु लाहवा।