6. कोंजोक इसहाक कि छिला इंतज़ाम फेका।

जब आब्राहम ज्ञामनी गतपु फुतचा वोतजिना था टु, इसहाक ते मि छिमि जाम फुतदेका। खोऐ टु के छीला खौसु खोऐ योकपु ला आब्राहम के ञीमा ञेरिंग वोतसा रु तांगबा टुला नामा खेला सी।

अब्राहम के ञीमा ञेरिंग के दोरु ओए छवनि ला डोसि लाम युम फुतचा सु कोंजोक सु रिबका सैरकान फौमु तेला योकपु ला धोरु थूकतु तगंभा। ओऐ ती अब्राहम की आजु के छामो नोक।

रिबका राईं पेरगं ला युक्शा योकपु रागं ञांबु लोकचा होंगजा ला ञिनबा। खागंबा रु लिपचा इसाहक सु रिबका ला नामा ला लिनबा।

नमला युमके तिगंला, अब्राहम ठोगसा। तेने कोंजोक सु अब्राहम के टु इसाहक ला, अब्राहम रगं ञाबु थामजा दामशा वोकन के छेनासु खौला आशिष ततपा। ओए थामजा ना कोंजोक की थामजा चाया वोका कि अब्राहम के रीह रुहा ठो मेता वोङा। परन्तु इसाहक के नामा रिबका ला चीवा माकीवा।

था इसहाक सु रिबका के छीला कोंजोक ला मोल्लम ज्ञपा, देने कोंजोक सु खोला छिवा छीमा कि जुहु नातपा ज़ोवा। रिबका के ढोतपा ना वोकान छिवा ञुहु ठोतपे नांग दु लाक डियिन वोका रिबका सु ओए ते कोंजोक ला शतपा।

कोंजोक सु रिबका ला नावा, “ख्योत टु ञि कियानुक। खोशे रिह रुहा सो सो वोङाक। खोशाक चिक तंग चिक रांग ञाबु लाक ढियाक। टु छिपु ना सु कियान कि रिह रुहा ला टु चुन तेके रिह रुहा कि हुकुम ञिनगु वोङा।“

तेने रिबका कि छिवा किवा, टु छिपु ते मारवु रांग पु किया वोकानुक। तेनि खोशाक सु खोए मिन ते एसाव फोरा। टु चुन ते एसाव कि कांगबा जुमजा किवा, तेनि खोशाक सु खोए मिन याकुब फोरा।