18. राईज कर बटवारा

दाउद राजा चालीस बरश तक इजराइल पर राईज करलक। तब उ मईर गेलक, आउर उकर बेटा सुलेमान इजराइल उपरे राइज करेक शुरू करलक। परमेश्वर सुलेमान से बात करलक आउर उकर से पुछलक कि उ सबसे अधिक का चाहेला कि परमेश्वर उकर ले करी। सुलेमान परमेश्वर से मांगलक कि उ उके बहुत बुद्धिमान बनाय देवी। ई बात से परमेश्वर खुश होई गेलक इकारले परमेश्वर सुलेमान के संसार भाईर में सबकर से बुद्धिमान आदमी बनाय देलक। सुलेमान बहुत बात के सिखलक आउर एगो बुद्धिमान राजा ई धरती भाईर में होलक। परमेश्वर उके बहुत धनवान भी बनाय देलक।

येरुसलेम में सुलेमान उ मंदिर के बनालक जेकर ले उकर बाप योजना बनाय रहे। आउर सामान के जमा कईर रहे। अब तक आदमी मन मिलाप वाला तम्बू में आराधना करेक कर बजाय मंदिर में परमेश्वर कर आराधना करेक लागलेन। आउर उकर लागिन बलि चढात रहलैन। परमेश्वर मंदिर में आय के रहत रहे। आउर हुवां उ आपन आदमी मन कर संग डेरा करत रहे।

लकिन सुलेमान दुसर देश कर जानीमान से प्यार करत रहे। उ ढेर बगरा करीब करीब १००० औरत से शादी कईर के परमेश्वर कर नियम के तोड्लक। इकार में से बहुत से जनीमन दुसर देश से आलय आउर आपन संगे आपन देवता के लानलय,आउर उकर पूजा पाठ करेक जारी रखलैन। जब सुलेमान बुढा होई गेलक तो उ भी उमन कर देवतामन कर पूजा पाठ करलक।

ई कारण से परमेश्वर सुलेमान से बहुत गुसा होई गेलक। उ कहलक कि उ इजराइल देश के दुइगो राइज में बटवारा करेक कर दुवारा उके दंड देवी। उ सुलेमान कर मरेक कर बाद होवी।

सुलेमान कर मरल बाद, रह्बाम राजा बनलक। इजराइल देस के सोउब आदमी मन आपन राजा कर रूप में स्वीकार करेक ले जमा होलैं। उमने रह्बम से शिकायत करलेन कि सुलेमान उमन से बहुत कठिन मेहनत करवालक आउर बहुत से माल वसूल करलक, उमने रह्बम से अनुरोध करलेन कि उमन से कम काम करवाई।

लकिन रह्बाम उमनके बड़ी बेहूदा लेखे जबाब देलक “तोहिन कहला कि मोर बाप सुलेमान तोहिन से कठिन मेहनत करवालक। लकिन मोय तोहिन से उकर से भी ज्यादा कठिन मेहनत करवाबू आउर मोय तोहिन के उकर से भी ज्यादा तंग करबू। ”

जब आदमी मन उके इसन कहेक सुनलय तो उमन में से कई जन उकर बिरुद्ध बिद्रोह कईर देलैन। दस गोत्र मन उके छोइड देलैन ;उकर संग केवल अब दुई गोत्र बांचलेन। ई दुई गोत्र अपने आप के यहूदा कर राइज कहलैं।

बाकि कर दस यारोबम नाव कर एगो पुरुष के आपन राजा बनाय लेलैन। ई गोत्र देश कर उतर पूरब भाग में रहलैन। उमन अपने आप के इजराइल कर राइज कहलैं।

लेकिन यारोबम परमेश्वर कर बिरुद्ध बिद्रोह करलक आउर आदमी मन के पाप करवालक। उ आपन आदमी मन के पूजा पाठ करेक लागिन दुइठो मूर्ति बनवालक। उमन अब यहूदा कर राइज में येरुसलेम में परमेश्वर कर मंदिर में उकर आराधना करेक ले नी गेलैन।

यहूदा आउर इजराइल कर राइज शत्रु बाईन गेलैन आउर हमेशा हमेशा एक दुसर कर बिरुद्ध लडेक लागलेन।

इसरायल कर नवा राइज में सबे राजा दुष्ट रहलैन। इकार में से कई जन राजा उकर जगह बनेक कर चाहत राखेक वाला दूसरा इसरायली मन केर दुवारा मारल गेलैन।

इजराइल राइज कर सबे राजा मन आउर ज्यादातर आदमी मन मूर्ति कर सेवा करलेन तो उमन अक्सर बेश्या मन केर संग सुतलेन आउर हिंया तक कि कई बेर मूर्ति कर आगे छउवा मन के बलिदान करलेन।

यहूदा राइज कर राजा, दाउद केर वंशज रहलैन। ई राजा में से कई जन बेस आदमी रहलैन जे मन न्याय पूर्वक राइज करलेन आउर परमेश्वर कर आराधना करलेन। लेकिन यहूदा राइज कर ज्यादा राजा दुष्ट रहलैन। उमन दुष्टता से राइज करलेन, आउर मूर्ति कर पूजा पाठ करलेन। हिंया तक कि इमन में से कुछ राजा झूठा देवता मन केर आगे आपन बेटा के भी बलि कईर देलैन। यहूदा कर ज्यादा आदमी मन परमेश्वर कर बिरुद्ध बलवा करलेन आउर दुसर देवता मन कर उपासना करलेन।