28. धनवान जवान शासक

एक दिन, एगो धनी जवान यहूदी अगुवा यीशु ठीन आइके उकर से पूछलक, "हे उत्तम गुरु, अनन्त जीवन पावेक ले मोके का करेक चाहि?" यीशु उके कहलक, "तोय मोके उतम का लागिन कहथिस? सिरिफ एक ही उतम आहे आउर उ परमेश्वर हेके। लेकिन तोय अनन्त जीवन पावेक चाहिस ला तो परमेश्वर कर ब्यवस्था के पालन कर।”

उ पुचलक, "मोके कोन कोन से आज्ञा कर पालन करेक कर आवश्यकता हेइक?" उ पूछलक। यीशु जवाब देलक, "हत्या न करबे। व्यभिचार न करबे। चोरी न करबे। झूईठ ना बोलबे। अपन माय- बाप कर आदर करबे, आउर अपन पड़ोसी से अपन लेखे प्रेम करबे।"

लेकिन उ जवान पुरुष कहलक, "मोय अपन बचपन से इ सब आज्ञामन के पालन करते आहों। मोके हमेशा ले जीवित रहेक ले एखन भी का करेक कर जरुरत हेईके? यीशु उके देखलक आउर उके प्रेम करलक।

तब यीशु जवाब देलक, “अगर तोय सिद्ध होवेक चाहिसला तो जायके अपन सब कुछ बेईच दे आउर उ धन के गरीब मनले बाईट दे आउर तोके स्वर्ग में धन मिली। तब आएके मोर पाछे होई ले।”

जेखन उ जवान पुरुष यीशु कर बातमन के सुनलक तो उ बहुत उदास होई गेलक, काहेकि उ बड़ा धनी रहे आउर अपन सारा सम्पति के देवेक नी चाहत रहे उ घुइर के यीशु केर ठीन से चइल गेलक।

तब यीशु अपन चेला मन के कहलक “धनी आदमीमन कर परमेश्वर केर राइज में प्रवेश करेक बहुत कठिन हेइके! हाँ एगो धनी पुरुष के परमेश्वर केर राइज में प्रवेश कर तुलना में कोनो ऊंट कर सुई के छेद में से होइके निकईल जायेक असान आहे।"

जब चेलामन यीशु कर बात मन के सुनलक तो उमन चकित होई गेलय। उमन कहलय, “अगर ई ऐसन हेइक तो परमेश्वर केके बचई?"

यीशु चेला मन के देखलक आउर कहलक “आदमीमन खुद के नी बचाय सकबय। इसन करेक असंभव हेइक। लेकिन परमेश्वर लागिन कुछ भी करना असंभव नखे।"

पतरस यीशु के कहलक, "हमीन जे तोर चेला हेकीस अपन सब कुछ छोईड के तोर पाछे होई लेही। तो हमर का प्रतिफल होवी?

यीशु जवाब देलक, "हरेक जन जे मोर चलते घर, भाई, बहन, माय, बाप, बच्चा या सम्पति के छोड़ेंना उ उकर से सौ गुना अधिक प्राप्त करबय आउर अनन्त जीवन के भी पावी।लेकिन बहुत से जे पहले आहंय उमन पीछे होबय आउर बहुत से जे पीछे आहयं उमन पहले होबैं।"