30. यीशु पाँच हजार आदमी मन के खाना खियायला

यीशु अपन प्रेरित मन के प्रचार करेक आउर लोग मन के शिक्षा देवेक लागिन बहुत से दुसर-दुसर गाँव में भेजलक। जब उमन घुर लय जहाँ यीशु रहलक तब उमन उके बतालय कि उमन का कईर रहलय। तेकर बाद यीशु उमन के झील कर दुसर बटे उमन कर संग एगो शांत जगह ठीन जय के कुछ समय आराम करेक लागिन बुला लक।अतः उमन एगो नौका उपरे चईढ़ गेलय आउर झील कर दूसर बटे चइल गेलय।

परन्तु हुहाँ बहुत से लोग मन रहलय जेमन यीशु आउर चेलामन के नौका में जायेक देईख रहलय। ई जानकर आदमी मन भी झील कर दूसरा किनार जायेक ले झील कर किनार किनार पैदल दौड़ते गेलय आउर उमन से पाहिले पहुचलय। अतः यीशु आउर चेलामन पहुंचलय तो ईहे लोगमन कर एगो बड़का झुण्ड उकर इंतजार हुवाँ पहले के करत रहलय।

उ झुण्ड में महिला आउर छउआ मनकर बिना गिनती 5,000 से बगरा पुरुष रहलय। यीशु उमन उपरे बड़ा तरस खालक। यीशु लागिन उमन बिना चरवाहा कर भेड़ केर समान रहलय। ईकरले उ उमन के शिक्षा देलक आउर उमन कर बीच में जे बीमार रहलय उमन के चंगा करलक।

दिन केर अंत में, चेलामन यीशु से कहलय, "अब देरी होई जाहे आउर आस पास में कोनो नगर नखे। इ लोगमन के विदा कईर दे ताकि उमन जाएके खाएक लागिन कोनो लेबैं।"

लेकिन यीशु चेला मन के कहलक, "तोहीन उमन के खाएक लागिन कोनो के देवा।” उमन जवाब देलय “हमीन ऐसन नी कईर सकब? हामीन ठीन सिरिफ पांचगो रोटी आउर दुइठो मछरी हेइक।”

यीशु अपन चेलामन के कहलक कि उ भीड़ केर लोगमन के घांस में पचास-पचास कर पंक्ति में बैठेक ले कहा।

तब यीशु पाँईच रोटी आउर दुईगो मछरी के लेइके स्वर्ग बटे देखलक, आउर उ खाना लागिन परमेश्वर के धन्यवाद देलक।

फिर यीशु रोटी मन के तोड़ तोड़ कर चेला मन के देते गिलक कि उमन आदमी मन ले परोसबय, आउर उ दूई मछरी के भी उमन सोउब ले बाईट देलक। चेला मन उ खाना के बाटंत रहलय आउर उ कभी नी ख़तम होलक। उमन सब खायके अघाय गेलय।

उकर बाद, चेलामन उ बाचल टुकड़ा मन के जमा करलय, जे बांचल रहे आउर उ टुकड़ा मन से भरल बारह टोकरी उठालय। उ सब खाना उ पांच रोटी आउर दूई मछरी से होई रहे।