31. यीशु पानी में चलेला

पाँच हजार आदमी मन के खाना खियाल कर बाद, यीशु आपन चेलामन के नौका में चढ़ेक ले कहलक। उ उमन के झील कर दुसर किनार जायक ले कहलक जबकि उ थोड़ेक समय लागिन ओहे ठीन रुइक गेलक। अतः चेला मन चईल गेलय आउर यीशु भीड़ के बिदा करलक कि उमन आपन घर जाबय। इकर पाछे, यीशु प्रार्थना करेक लागिन एगो पहार में चइल गेलक। हुवां उ एकले रहलक आउर उ देरिये राईत तक प्रार्थना करलक।

उ बेरा, चेला मन अपन नौका के चलाते जात रहलय। लेकिन बेयार उमन कर बिपरीत बड़ी जोर से बहत रहे। ढेर राईत होई जायल कर बाद भी उमन झील कर बिच में ही पहोंइच रहलय।

उ बेर यीशु प्रार्थना करेक ख़तम करलक आउर अपन चेलामन ठीन वापस जायेक ले शुरु करलक। नाव बटे जायेक लागिन पानी कर उपरे चलेक लागलक।

तले चेला मन उके देखलय। उमन बहुते डराय गेलय काहेकि उमन सोच लय की उ कोई भूत हेके। यीशु जानत रहे कि उमन डराय जा हैं, इकर ले उ मन के अवाज देईके कहलक “ ना डरावा, मोहे हेकों!”

तब पतरस यीशु के कहलक, "हे प्रभु, अगर इ तोहें हेकिस तो मोके पानी उपरे चईल के तोर ठीन आवेक कर आज्ञा दे।” “यीशु पतरस के कहलक “आव! ”

अतः पतरस नाव से उतईर गेलक आउर यीशु कर नजदीक जाएले पानी उपरे चलेक लागलक लेकिन थोड़े दूर जाएके उ अपन आँईख के यीशु से हटाय लेलक आउर पानी कर लहरमन के देखेक लागलक आउर तेज हवा केर महसूस करेक लागलक।

तब पतरस डराय गेलक आउर पानी में दुबेक लागलक। उ चिलालक “हे प्रभु मोके बचाव! ” यीशु ओहे बेरा हाथ बढ़ाय के उके धईर लेलक। तले उ पतरस के कहलक “तोर बिश्वास बहुत कम हेईक। तोके बचाएक ले तोय मोर उपरे भरोसा काले नी करले ?”

तब यीशु आउर पतरस नाउका पर चईढ़ गेलय आउर तुरंत हवा कर बहेक रुइक गेलक। पानी सांत होई गेलक। चेला मन चकित होई के यीशु कर आगे घुटना टेइक देलय। उमन उकर आराधना करलय आउर उके कहलय “सचमुच में तोय परमेश्वर कर बेटा हेकिस।”