47. फिलिप्पी में पौलूस आउर सिलास

जब शाऊल पूरा रोमी सम्राज्य में यात्रा करलय तो उ अपन रोमी नाव पौलूस कर उपयोग करेक शुरू कइर देलक। एक दिन पौलूस आउर उकर दोस्त सिलास फिलिप्पी नगर में यीशु कर बारे में शुभ सन्देश सुनाएक ले गेलय। उमन नगर कर नदी कर किनार में एगो जगह ठीन गेलय। जहाँ आदमीमन प्रार्थना करेक ले इकठा रहलय। उठीन उमन लुदिया नाव कर एगो औरत से भेंट होलय जे एगो ब्यापारी रहे। उ परमेश्वर से प्रेम करत रहे आउर उकर आराधना करत रहे।

परमेश्वर लुदिया के यीशु कर बारे में सन्देश उपरे विश्वास करेक ले सक्षम करलक। पौलुस आउर सिलास उके आउर उकर परिवार के बपतिस्मा देलक। उ पौलुस आ उर सिलास के अपन घर में ठहरेक लागिन निमंत्रण देलक, इकरले उमन हुवां ठहईर गेलय।

पौलूस आउर सिलास आदमी मन से हमेशा उ जगह मिलत रहलय जेठीन यहूदी मन प्रार्थना करत रहलय। रोज दिन जब उमन हुवां जातय तो एगो दासी छोड़ी दुस्तात्मा द्वारा नियंत्रित करत रहे उमन के पिछा करत रहलक। उ दुस्तात्मा कर माध्यम से उ आदमी मन कर भविष्य बतात रहे, इकरले उ भविष्य बताएक वाला कर रूप में अपन मालिक ले बहुत धन कमात रहे।

उमन कर जायेक बेर ई दासी चिल्लात रहत रहे, “ई आदमी मन परम प्रधान परमेश्वर कर सेवक हेकय। इमंन तोहिन के उद्धार कर रास्ता बताथय।” उ रोज दिन एसने करत रहे जेकर से पौलुस नराज होई गेलक।

अंत में एक दिन जब उ दासी छोडी चिल्लाएक शुरू करलक, तो पौलुस उकर बटे घुइर के उकर भीतरे कर दुस्तामा के कहलक, यीशु कर नाव से इकर में से निकईल जा” ओहे घड़ी उ दुस्तात्मा उके छोईड़ देलक।

उ दासी लड़की कर मालिक बहुत गुसाय गेलक उके पता चईल गेलक कि बिना उ दुस्तात्मा के उ दासी छोड़ी आदमी मन कर भविष्य नी बताय सकत रहे इकर माने रहे कि आदमी मन अब उकर मालिक के पैसा नी देबय कि उ उमन कर भविष्य बताई कि उमन कर संग का होवी।

इकरले उ दासी लड़की कर मालिक पौलुस आउर सिलास के रोमी अधिकारी मन ठीन लेई गेलय। उमन पौलुस आउर सिलास के पिटलय आउर फिर उमन के जेल में डाईल देलय।

उमन पौलुस आउर सिलास के जेल खाना कर ऐसन हिस्सा में राखलय जेठीन सबसे अधिक सिपाही रहलय। हियाँ तक कि उमन उमन कर गोड़ के काठ कर बड़का टुकड़ा में जोईड़ देलय। लेकिन पौलुस आउर सिलास आधा राइत कर समय, परमेश्वर कर स्तुती कर गीत गावत रहलय।

अचानक से एगो भयानक भूकम्प होलक! जेल घर कर सोउब दुरा खुईल गेलक आउर सब कैदी मन कर सिकड़ खुईल के गिर गेलक।

तब दरोगा जाइग गेलक। उ देखलक कि जेल घर कर दुरा खुईल जाहे। उ सोचलक कि सब कैदी मन बाइच के भाईग जाहैं। उ डराय गेलक कि उमन कर भागेक कर कारण से रोमी अधिकारी उके माईर डाली। इकरेले उ अपने आप के मारेक ले तेयार होई जाय रहे। लेकिन पौलुस उके देईख के चिल्लालक रुईक जा! अपने आप के हानि न पहुंचाव हमींन सोउब येहे ठीन आही।”

उ दरोगा कांपते कापते पौलुस आउर सिलास ठीना आए के पूछलक “उद्धार पावेक ले मोय का करों ?” पौलुस जवाब देलक, प्रभु यीशु उपरे विश्वास कर तो तोय आउर तोर घराना उद्धार पाबंय।” तब उ दरोगा पौलुस आउर सिलास के आपने कर घर लेई गेलक आउर घर कर सब जन के यीशु मसीह कर ख़ुश खबरी सुनालक।

दरोगा आउर उकर पूरा परिवार यीशु उपरे विश्वास करलय इकरले पौलुस आउर सिलास उमन के बपतिस्मा देलय। तब दरोगा पौलुस आउर सिलास के खाना खियालक आउर उमन एक साथ आनंदित होलय।

अगला दिन नगर कर अगुवा मन पौलुस आउर सिलास के जेल घर में से स्वतन्त्र कईर देलय आउर फिलप्पी से चईल जाएक ले कहलय। पौलुस आउर सिलास लुदिया आउर कुछ दूसरा साथी मन से मिललय आउर उकर बाद नगर से निकईल गेलय यीशु कर शुभ सन्देश फैलाते गेलय, आउर कलीसिया बढ़ते गेलक।

पौलुस आउर दूसरा मसीही अगुवामन बहुत से नगर कर यात्रा करलय। उमन आदमी मन के यीशु कर बारे शुभ सन्देश सुनालय। उमन कलीसिया मन कर विश्वासी मन के उत्साहित करेक आउर शिक्षा देवेक ले ढेर सारा चिठ्ठी हूँ लिखलय। इकर में से कुछ चिठ्ठी बाइबिल कर किताब बईन गेलक।