6. परमेश्वर इसाहक ले प्रबंध करेला

जब अब्राहम बहुत बुढा होई जाय रहे। तब उकर पुत्र इसाहक, एगो पुरुष कर आयु कर होई जाय रहे। इकेरले अब्राहम आपन एगो नौकर के उ देश में भेजलक जहाँ उकर रिश्तेदार मन रहत रहलयं। ताकि उ आपन बेटा इसाहक ले एगो कनिया लाय सके।

एक लम्बी यात्रा कर बाद, अब्राहम कर सेवक उ देश में गेलक जहाँ अब्राहम कर रिश्तेदार मन रहत रहलय। परमेश्वर उकर अगुवाई करलक, कि उ रिबका से मिललक। उ अब्राहम कर भाई कर पोती रहे।

रिबका आपन परिवार के छोइड के उ धांगर नौकर कर संग जाएक ले माईन गेलक। जैसने ही रिबका पहुचलक इसाहक उकर से शादी कईर लेलक।

एक लम्बा समय कर बाद अब्राहम मईर गेलक। तब परमेश्वर अब्राहम कर पुत्र इसहाक ले आशीष देलक काहेकि परमेश्वर अब्राहम कर संग वाचा बांईध रहे। उ वाचा में परमेश्वर कर एगो प्रतिज्ञा ई रहे कि अब्राहम कर अनगिनत वंसज होबैं। लेकिन इसहाक कर पत्नी रिबका केर संतान (छउआ) नी होलक।

इसहाक रिबका ले प्रार्थना करलक, आउर परमेश्वर उके जुड़वां छउवा के गर्भ धारण करेक में सक्षम करलक। जे समय उ छउवा मन रिबका कर गर्भ में ही रहै उमन आपस में लड़ेक लाइग रहलै, इकरले रिबका परमेश्वर से पूछलक कि ई का होवथे।

परमेश्वर रिबका के कहलक “तोय दुइगो छउवा के जनम देबे। उकर वंसज दुई अलग – अलग जाइत बनबय।लेकिन बड़का बेटा से पैदा होवेक वाला जाति छोटे बेटा से आवेक वाला जाइत कर आज्ञा मानेक होवी।

जब रिबका कर छउवा जनमलैं, तो बड़का बेटा लाल आउर रोवांदार रहे, आउर उमन उकर नाव एसाव राखलैं। तब छोटका बेटा एसाव कर एड़ी के धईर के जनमलक, आउर उमन उ कर नाव याकूब राखलय।