18. खेचो वङमिन राज्य।
दाऊद राजा गुस निशनिसा बोषङ शम राज लऊ। दत दो सिऊ जेऊ, दत दोऊ छङक सुलैमानुस इस्राएलु राज लमा जूमा तिखु। परमेश्वरुस सुलैमान रा कमचित लोऊ अला दोरा शुऊ दो छैगिनु कि परमेश्वर दोऊ शितिङ लरो। सुलैमान परमेश्वरु रत थऊ कि दोरा हत हुशार जुरामा। ओइ कमचितुस परमेश्वर हत गरीस तोइ, ओदोक परमेश्वर सुलैमान रा गोप हुशार फोबलङ जुरऊ। सुलैमान गोप कमचित पङ सिखयतु अला दो इत हुशार शासक वंऊ तोइ। परमेश्वर दोरा हत छुकपो लि जुरऊ पिनु तोइ।
यरूशलेमु सुलैमान दो थानङ रा जुरऊ ओदोऊ शितिङ दोऊ अपास सुनचतु तोइ अला छला रा कटठा लमिन तोइ। छङ मीपङ मिलतु तोमबुआ बसकयङ थानङु नऊ परमेश्वरु अराधना लइ तोइ पोसि तोइ।
दत सुलैमानुस अलित देशु योबलङ पङ नङ प्यार लऊ। दोक गोप या बसकयङ इत हजार, योबलङ पङ नङ जन्नेटङ लऊ परमेश्वरु कमचित मागोऊ। दोपोऊ नऊ गोप योबलङ दकपा देशु तुमिन तोइ ञमफो एनु भोगान पङरा कयुफु तु अला दोपोऊ अराधना लऊ। दत सुलैमान गतपो वंऊ जेऊ तोइ दत दोगुस लि दोपोऊ भोगानु अराधना लऊ।
ओदोक परमेश्वर सुलैमान रा हत छिङना तंऊ। दोक लोऊ कि दो इस्राएल देश रा निश राज्यु नऊ खेचो लऊ पिननङ दोरा सजा खेसि। दो सुलैमान सिऊ ज्ञपतिङ ओशि यो लरो।
सुलैमान सिऊ ज्ञपतिङ, रहबाम राजा वंऊ। इस्राएल देशु सिङ मी दोरा एनु राजऊ खोता मोनामा शितिङ सिङ ञमफो कटठा वऊ। दोपङक रहबाम रा लोऊकि सुलैमानुस दोपङरा हत कोषटङ लेन लमा खेसु अला गोप रूपया थाथासु। दोपङक रहबाम रा लोऊ कि दोपङरा गटो लेन ककसमा।
दत लि रहबामुस दोपङरा गोप मूरूख खोता जवाब खेऊ,“किमपङ रिंऊ तोश कि अङ अपा सुलैमानुस किमपोरत कोषटङु लेन ककसु। दत ग किमपङरा ओदो बसकयङ लि खुचि कोषटङु लेन लमा खेसि, अला ग किमपङरा ओदो बसकयङ लि खुचि जुकजेर खेसि।”
दत मीपङक दोरा ओशि लोइ गोऊ दत दोपोऊ नऊ गोपुस दोऊ खिलाफ बगावत लऊ। सा चेला पङक लि दोरा सोठऊ पिनु, दोनङ ञमफो छङ लेम निश चेलायो ञुऊ तोइ। ओदो निश चेला पङक एनरा यहूदऊ राज्य लोऊ पिनु। ञुङमिन सा चेला
पङक यारोबाम मिनु इत फोबलङ रा एनु राजा लोऊ पिनु। जि पेरङ पङ मुलुकु उतर- पूर्व हिसऊ तोइ। दोपङक एन रा इस्राएलु राज्य लोऊ।
दत लि यारोबामुस परमेश्वरू खिलाफ बगावत लऊ अला मी पोऊ रत पाप लमा मतु। दोक एनु मी पोऊ अराधना लमा शितिङ निश मुखङ जुरऊ। दो छङ यहूदऊ राज्यु यरूशलेमु परमेश्वरु थानङु अराधना लमा माजेइ तोइ।
यहूदा नङ इस्राएल राज्यु दुशमोन वंऊ जेऊ अला दयारो इतुस अलित नङ तोङकि तोइ।
इस्राएलु सरपा राज्यु नंऊ, सिङ राजा हलम तोइ। दोपोऊ नंऊ तचे राजा ता दोपोऊ जागऊ थोरिङ राजा वङमा शितिङ गिनु दत अलित इस्राएली पोऊ रत सिऊ जेऊ तोइ।
इस्राएल राज्यु सिङ राजा पङक अला गोप मीपङक मुखङ पोऊ अराधना लइ तोइ। दत दोपङक ओशि लऊ, दत दोपङ दयारो रिटिए पङ नङ ञमफो उल्टा लेन लऊ अला दत बसकयङ गोप फेरा मुखङु तुसिङ चिगजा पङरा पुजा लि तिऊ।
यहूदा राज्यऊ राजा, दाऊदु वंश तोइ। दो राजा पोऊ नंऊ तचे ता एपो मी तोइ, दोपङक एपो राज लऊ अला परमेश्वरु अराधना लऊ। दत लि यहूदऊ गोप राजा हलम तोइ। दोपङक हलमुस राज लऊ, अला मुखङु अराधना लई तोइ। दत बसकयङ दोपोऊ नंऊ तचे ता राजा पङक कवश भोगानु शितिङ एनु चिगजा रा लि पुजा तिऊ। यहूदऊ गोप मीपङक परमेश्वरु खिलाफ बगावत लऊ अला अलित भोगानु अराधना लई तोइ।
1 राजा पाठ -1-6; 11-12 गुस इत बाइबलु कोथा।
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।