19. परमेश्‍वरु भविष्‍य लोइ सा।

परमेश्‍वर सोदायो इस्राएली पोऊ रा भविष्‍य लोइ सा रा पिनु पोसि तोइ। भविष्‍य लोइ सा परमेश्‍वरु कमचित पङ गोइ तोइ अला दत दोरा मी पङरा लोइ तोइ।

दत अहाब इस्राएल राज्‍यु राजा तोइ दत ओदो टाइमु एलिय्‍याह भविष्‍य लोइ सा तोइ। अहाब इत हलम मी तोइ। दोक कवश करा सा भोगानु अराधना लमा शितिङ मी पङरा चेकचे लऊ तोइ। ओदोक एलिय्‍याह अहाब रा लोऊ कि परमेश्‍वर दो मी पङरा सजा खैमा जैऊ तश। एलिय्‍याह गुस दौरा लोऊ, “दत शम ग है छरबा तुमा शितिङ मा लोइ दत शम इस्राएलु राज्‍यऊ ना छरबा तुइ अला ना बेमो दति।” ओइ कमचितुस अहाब रा ओनचे छिङना जैऊ कि दोक एलिय्‍याह रा सतमा जुराशु।

ओदोक परमेश्‍वरुस एलिय्‍याह रा लोऊ कि दो जंगलु जैऊ अहाबु रत ञङकमा। एलिय्‍याह जंगलु दो झरनऊ रा जैऊ दा जैमा शितिङ परमेश्‍वरुस दोरा लोमिन तोइ। दयारो नम्‍मत अला गोङक, का एलिय्‍याह रा शितिङ रोटि नङ शा कयुफु जैइ तोइ। ओदो बेलऊ, अहाब नङ दोऊ सैना एलिय्‍याह रा फंऊ जैऊ तोइ, दत लि दोरा फङमा मलिऊ।

छरबा मतुमऊ गोप टाइमु ज्ञपतिङ दो झरना फोसु जेऊ। ओदोक एलिय्‍याह ञमफो यो इत देशु जैऊ। दो देशु इत मेतपो विधवा योबलङ तोइ दोऊ इत छङ तोइ। अकाल तु दत गोरे दोपोऊ रा जामा शितिङ छोयो मातेइ तोइ। दत लि, दो योबलङकुस एलिय्‍याह रा खोनु, ओदोक परमेश्‍वरुस दो नङ दोऊ छङकु गिनमा दो पूरा लऊ, ओदोक दोऊ तिसङु ढोबा नङ दोऊ मत्‍तिऊ ढोबा तशपयो खाली मावंऊ। दो अकाल तुमा परिङ दोऊ रा थकतु तोइ। एलिय्‍याह हुम बोषङ शम ओदा पोसु।

हुम नङ खनङ बोषङु ज्ञपतिङ, परमेश्‍वरुस एलिय्‍याह रा लोऊ दो हैलि छरबा सुइ। दोक एलिय्‍याहऊ रत पोलठतु इस्राएल राज्‍य जैऊ अहाब नङ कमचित लोमा शितिङ लोऊ। ओदोक एलिय्‍याह अहाबु रा जैऊ। दत अहाबुस दोरा तंऊ दोक लोऊ, “अच्‍छा छा का तोन आ,मुसीबोत जोरमयई सा। एलिय्‍याहास लोऊ, मुसीबोत जोरमयई सा का तोन। कस यहोवा रा सोठऊ पिनु। दो यो एपो परमेश्‍वर तश, दत लि का करा सा सतु अराधना लऊ तोन । छङ कनरा इस्राएल राज्‍यु सिङ मी पङरा कर्मेल डोङखङु रा कयुफु तुमा वई।

सिङ मी पङ कर्मेल डोङखङ फोक जेऊ। दो फोबलङ पङ लि तु तोइ दोपङ रिंइ तोइ दो करा सा भोगानु भविष्‍य लोइ सा तोइ। दोपङ करा सा भोगानु भविष्‍य लोइ सा तोइ। दोपङ पज्ञाऊ डईनिसा मी तोइ। एलिय्‍याहास मी पङरा लोऊ, “तशपा शम किमपङ रंऊ मोनङ रा नोस- जिस पिनु पोसि? छङ यहोवा परमेश्‍वर तोननङ दोऊ अराधना लमा। दत लि करासा भोगान परमेश्‍वर तोननङ दोऊ अराधना लमा।”

दत एलिय्‍याहास करासऊ भविष्‍य लोइ पङक रिऊ, “इत रत रा पुजा तिऊ दोऊ शा रा यम- यम लऊ पुजा तीमा शितिङ इत जागऊ थोरिङ तामा, दत मै मापिनमा। दोऊ ज्ञपतिङ ग लि ओशि यो लई, अला इत खैचो जागऊ थोरिङ ग दो शा रा तई। दत परमेश्‍वर जागऊ थोरिङ मै पयानङ का सेसमा दो सोच्‍चा परमेश्‍वर तश।” दत करा सा सतु भविष्‍य लोइ पङक इत पुजा तीमा जुरऊ दत दो मै पिनमा मलिऊ।

दत करासा भोगानु भविष्‍य लोइ पङक करासा भोगान रा कोलङ लऊ, “हे करा सा भोगान, निङपोऊ गोऊ।” सारा दयार दोपङ कोलङ लऊ अला हरौ टऊ अला या बसकयङ रङ रा चकूस थोलु पिनु, दत लि करासा भोगानुस छोयो मलोऊ, अला दोक छोयो मै मापयऊ।

करासा भोगानु भविष्‍य लोइ पङक करासा भोगान रा कोलङ लऊ मोच्‍चेमला पूरा दयार तिऊ। दत ज्ञपतिङ दोपङक कोलङ लमा बोनत लऊ पिनु। दत एलिय्‍याहास अलित रतु शा रा परमेश्‍वरु जागऊ तऊ पिनु। दोऊ ज्ञपतिङ मी पोरत तिऊ सनिश चेइ बनिङ रा दो पुजा तीमऊ रा दत शम होसमा लोऊ ओसपरिङ शम शा, सिङ, नङ दत बसकयङ दो जागऊ नोपा- जिपा सिङ मटङ थिसि मा वङरो।

दत एलिय्‍याहास परमेश्‍वर रा कोलङ लऊ, “हे यहोवा, अब्राहम, इसहाक, नङ याकुबु परमेश्‍वर, निङपङरा कनकसना गिरङ इस्राएलु परमेश्‍वर तोक अला ग गिरोऊ नुकुर तोक। अङरा रिङना ओदोक जि मीपङ सेसि कि गिरङ ओ सिङु एपो परमेश्‍वर तोक।”

अचानक ओ, नमुरत मै तोलु अला दोक शा, सिङ, डोङखङ, फतिङ दत बसकयङ दो जागऊ नोपा- जिपाऊ ती र लि रोतु पिनु। दत मी पङक तंऊ, दोपङ मटङु थोरिङ बुशु जेऊ अला चलु, “यहोवा यो परमेश्‍वर तश। यहोवा यो परमेश्‍वर तश।”

दत एलिय्‍याहास लोऊ, “करा सा भोगानु इत लि भविष्‍य लोइ सा बचतु माजैमा गिनमा।” ओदोक मी पङक करासा भोगनु भविष्‍य लोइ पङरा चुमु पिनु अला दोपङरा ओदत खैचो किऊ दत दोपङरा सतु पिनु।

दत एलिय्‍याहस अहाब राजा रा लोऊ, “हसल ओ रंऊ कयुमु रोऊ जो, छु लोननङ छरबा तुइ सा तश।” हसल ओ जू गोप वंऊ तश, अला हत छरबा तु। यहोवा दो अकाल रा खोतोम लऊ तोइ। ओदोक पोता लगयतु कि यहोवा यो सिङु सोच्‍चा परमेश्‍वर तश।

दत एलिय्याहास एनु लैन रा कयाऊ पिनु, दत परमेश्‍वरूस एलीशा मिनु इत फोबलङ रा एनु भविष्‍य लोइ सा वङमा लोऊ। परमेश्‍वरुस एलीशा नङ मिलतु गोप चमत्कार लऊ। इत चमत्‍कार नामान नङ ञमफो लऊ। दो इत दु:शमोनु सैनऊ गोबा तोइ, दत दोरा इत हलम कोडु शोत वंऊ तोइ। नामानुस एलीशऊ बारै गोऊ तोइ, ओदोक दो एलीशऊ रा जैऊ अला दोरा दोक एपो लमा शितिङ लोऊ। एलीशास नामान रा लोऊ जैऊ यरदन लुङफऊ तिऊ नऊ शिनिश फैरा चङकु पिन।

नामान छिङना वंऊ जेऊ। दोक ओशि मालई लोऊ, छु लोननङ जि दोरा मूर्ख लैन तति तोइ। दत ज्ञपतिङ दोक एनु मोनङ लैऊ पिनु अला जैऊ यरदन समुन्‍द्रङु तिऊ नंऊ शिनिश फैरा चङकु। दत थौनतु ज्ञपतिङ दो तिऊ रत हन्‍तु दत परमेश्‍वरूस दोऊ कोडु शोत रा एपो लऊ पिनु।

परमेश्‍वरुस इस्राएलु मी पोऊरा अलित गोप भविष्‍य लोइ सा रा पिनु। दो सिङुस मी पङरा मुखङु अराधना लमा शितिङ लोऊ। ओदो बसकयङ, दोपङरा इतुस- अलितनङ एपो पोसमा अला इतुस- अलित रा पापङ ततमा शितिङ लोऊ। दो भविष्‍य लोइ पङक मीपङरा लोऊ दोपङरा हलम लैन लमा सोठामा अला ओदो बसकयङ परमेश्‍वर रिंइ कमचित दो गोमा। दत लि दो मीपङक ओशि मालननङ परमेश्‍वर दोपङरा सजा खेइ।

गोप शम, दो मीपङक परमेश्‍वरुस रिङमिन दो मागोऊ। अमबोरो दोपङक भविष्‍य लोइ पङरा हलम लऊ अला दत बसकयङ तचे ता भविष्‍य लोइ पङ रलि सतु पिनु। इ फैरा, दोपङ यिर्मयाह भविष्‍य लोइ सा रा फोसि कुअङु नंऊ पिनु अला दोरा ओदा सीमा शितिङ परूतु पिनु। दो कुअङु ओपङ कलऊ नऊ फसतु। दत बिन्यामीन राजा गुस दोरा पापङ ततु दोक एनु सैनिक पङरा लोऊ यिर्मयाह सिमऊ लोमशित दोरा कुअङुस धकपा हनु पिनमा।

भविष्‍य लोइ सा पङक परमेश्‍वरु तरफुस लोऊ पोसु दत लि मीपङक दोरा माडामा लऊ। दोपङक मी पङरा लोऊ दत लि दोपङक मालमा लैन मासोठानङ दत परमेश्‍वर दोपङरा खौतोम लऊ पिनि। परमेश्‍वरुस मी पङरा कोलङ दिलायऊ कि परमेश्‍वर यीशु रा दोपोऊ रा मसीह रा हसल ओ पिननोक।