21. परमेश्‍वर मसीह रा पिनमा शितिङ वायदा लई।

दोसपरिङ परमेश्‍वर मुलुक जुरऊ तोइ, दो सेसि तोइ कि दोरा ज्ञपतिङ हे अलित दयार मसीह रा पिनमा वंइ। दोक आदम नङ हव्‍वा रा वादा लऊ कि दो ओशि यो लई। दोक लोऊ कि हव्‍वाऊ इत वंश जोरमयति दो सबसु पिशा रा टेमि। ओदो सबसुस हव्‍वा रा कवश लोऊ दो शैतान तोइ। परमेश्‍वरु रिङमंऊ मोतलब तोइ कि मसीह दो शैतान रा हरऊ पिनि।

परमेश्‍वर अब्राहम रा वादा लमिन तोइ कि दोऊ लमिन मुलुकु सिङ जातु मी पङरा बोरङ पोरति। परमेश्‍वरु ज्ञपतिङ अलित टेमु मसीह रा मुलुकु पिनु एनु वादा रा पूरा लरो। दो मसीह मुलुकु सिङ मी पङरा दोपोऊ पापु रत छुडायइ अला दोपङरा बचायई।

परमेश्‍वर मूसा रा वादा लऊ कि भविष्‍यु दो मूसऊ खोता इत अलित भविष्‍य लोइ सा रा पिनि। जि भविष्‍य लोइ सा मसीह तोइ। ओदोक, परमेश्‍वर हेलि वादा लऊ कि दो मसीह रा मुलुकु पिनि।

परमेश्‍वरुस राजा दाऊद रा वादा लऊ कि दोऊ वंश मसीह वङरो। दो राजा वइ अला परमेश्‍वरु मी पोऊ शितिङ सौदायो राज लई।

परमेश्‍वरुस यिर्मयाह भविष्‍य लोइ सा नङ कमचित लोऊ अला दत लोऊ कि दो इत सरपा वादा छुततो। दो सरपा वादा इस्राएल नङ ञमफो सीनै डोङखङु थोरिङ छुतमिन ऊशि वादऊ खोता मातेइ। दत मी पङ नङ दो एनु सरपा वादा रा छुति, दत मीपङ परमेश्‍वर रा एमपङो सेसतो । सिङ मी पङ दोरा बेन्नङ लई अला दोरा छे गिनमा मागिनमा सिङ खोनमा खुसि तंइ। परमेश्‍वरुस लोऊ कि जि दोऊ पोसमा शितिङ दोपोऊ जिवऊ थोरिङ चेइ। दो दोऊ मी वङरो, अला परमेश्‍वर दोपोऊ पाप रा माफ लरो। दो मसीह यो वङरो दो दोनङ ञमफो सरपा वादा रा छुततो।

परमेश्‍वरु भविष्‍य लोइ पङक ओशि लि लोऊ कि मसीह इत भविष्‍य लोइ सा वङरो। इत भविष्‍य लोइ सा दो मी तोइ दो परमेश्‍वरु कमचित गोइ अला दत मीपङरा परमेश्‍वरु रिङमिन दो लोइ। दोरा पिनमा शितिङ परमेश्‍वरुस वादा लऊ तोइ दो मसीऊ इत चेइ भविष्‍य लोइ सा वङरो। दत दो मसीह परमेश्‍वरु रिङमिन दो एपो से गोइ, अला दो मी पङरा रिङमिन दो मी पङरा एपो से सिखायइ।

इस्राएलिऊ याजक पङक मी पोऊ शितिङ परमेश्‍वरु होमशित पुजा तीमा छसु। दो पुजा तीमा मी पोऊ पाप लमिन ओदोक दोपोउ परमेश्‍वर दोपङरा सजा खैमा जागऊ पुजा तिइ तोइ। याजक पङक मी पोऊ शितिङ पुयइ तोइ। दत लि, दो मसीह एपो चेइ याजक वइ दो परमेश्‍वर रा खेमा शितिङ इत एपो पुजा तीमा शितिङ एनरा पुजा तिऊ पिनि। दत, दो तशपयो पाप मालइ, अला दत दो एन रा पुजा तीमा शितिङ खेइ, दत पापु मुलुकु अलित पुजा तिमा गिनमा जुरूरी मतेइ ।

मी पोऊ भीडु नंऊ राजा नङ गोबा राज लई तोइ, अला तशपइ- तशपइ दोपङ गोलती लि लई तोइ। राजा दाऊदुस इस्राएलिऊ थोरिङ राज लऊ, दत राजा दाऊदु वंश मसीह सिङ मुलुकु थोरिङ राज लइ, दो सोदायो राज लइ। ओदो बसकयङ, दो दयारो एपो से राज लइ, अला एपो फेसला किरो।

परमेश्‍वरू भविष्‍य लोइ पङक मसीहऊ बारै गोप कमचित पङ लोऊ। दत, मलाकी भविष्य लोइ साक लोऊ मसीहऊ तुमा होमशित इत अलित भविष्‍य लोइ सा तुइ। दो भविष्‍य लोइ सा तुइ दो हत एपो मी वङरो। ओशि यो, इशायाह सिङ भविष्‍य लोइ पङक चेऊ कि मसीह इत कुंवारी योबलङकु नऊ जोरमयति। अला मीका भविष्‍य लोइ साक रिंऊ कि मसीह बैतहलम नगरु जोरमयति।

इशायाह भविष्‍य लोइ साक रिंऊ कि मसीह गलीलु जागऊ पोसि। तचे लि मीपङ हत दु:खङुस तोइ मसीह दोपङरा सवङना लरो। तचे लि मीपङरा शङलङुस छुतमिन तोइ दो पङरा लि छुडायइ। मसीह शोति पङरा नङ जो गोमा मलिइ, खोनमा मलिइ, चलमा मलिइ, अला विनमा मलिइ दोपङरा लि एपो लऊ पिनि।

यशायाह भविष्‍य लोइ साक ओशि लि लोऊ कि मीपङ मसीह रा मडामा लई अला दोरा ममोनई लोऊ। अलित भविष्‍य लोई पङक लोऊ कि मसीहऊ इत पङगोत दोपोऊ खिलाफ अनति। जकरियाह भविष्‍य लोइ साक लोऊ कि दोऊ जि पङगोत ओशि लमा शितिङ अलित मी पोरत हुमनिसऊ सा सिक्‍का थइ। ओदो बसकयङ, तचे ता भविष्‍य लोइ पङक लोऊ कि मीपङ मसीह रा सतु पिनि, अला दोपङ दोऊ गस्‍कुलऊ शितिङ जुआ ज्ञखि।

भविष्‍य लोइ पङक ओशि लि लोउ कि मसीह हलै सिइ। इशायाह गुस पोइले यो तंऊ कि मीपङ मसीह थोरिङ कराती फोइ, दोऊ थोरिङ वति, अला दोरा तोंइ। दो दोरा छोरू पिनि अला दो हत जुकजैरूस सिऊ जेइ, दत लि दोपङक छोयो पाप मलमिन तोइ।

भविष्‍य लोइ पङक ओशि लि लोऊ कि मसीह पाप मालइ। दो सिदद वङरो। दत लि दो ओदोक सिइ छु लोननङ परमेश्‍वर दोरा मी पोऊ पापु शितिङ सजा खेइ। दोऊ सिऊ ज्ञपतिङ मी पङ परमेश्‍वर नङ कमचित लोमा लिइ। ओदोक परमेश्‍वर गिनु कि मसीह सीरो।

भविष्‍य लोइ सा पङक ओशि लि लोऊ कि परमेश्‍वर मसीह रा सीमिनु रत लि जिंदा लरो। जि तङमा तुइ कि सिङ सरपा वादा छुतमा परमेश्‍वरु प्‍लान तोइ, दत दो मी पङरा बचामा लीरो दोपङक दोऊ खिलाफ पाप लमिन तोइ।

परमेश्‍वरुस भविष्‍य लोइ पङरा मसीह रा शितिङ गोप कमचित पङ लोऊ, दत लि मसीह दो भविष्‍य सेसि पोऊरत उङु लि जोलोमु नऊ मतु तोइ। ओइ भविष्‍यवाणि लोऊ दत पज्ञा बोषङु ज्ञपतिङ, एपो बैलऊ, परमेश्‍वर मसीह रा ओइ मुलुकु पिनरो।