23. यीशू जोरमयतु।
युसुफ मिनु इत एपो मी नङ मरियमु मंगनी वङ कयऊ तोइ। दत दोगुस गोऊ कि मरियम चिगजा नङ वऊ दत दो सेसि तोइ कि दो दोऊ चिगजा मेन। दत लि, मरियम रा बोदनाम मालमा गिनि तोइ, ओदोक दोगुस दोरा पापङ ततु अला दोरा तमना तलाक खेमा सुनचतु। दत लि ओदोऊ होमशित दो ओशि लरो, इत स्वर्गदुतु मीस दोऊ मङु नऊ तु दोरा कमचित लोउ।
दो स्वर्गदूतुस रिंऊ, “हे युसुफ, मरियम रा रऊ योबलङकु रूअङु कयुफु तुमा रा थाबेऊ। दोऊ नऊ दो चिगजा तश मे दो इत एपो जिवाऊ रत तुमिन। दो इत छङ रा तई। दोउ मिन यीशु तामा, छु लोननङ दो मी पोऊ लमिन दोपोऊ पापु रत बचायइ।”
दत युसुफुस मरियम नङ जन्नेटङ लऊ अला दोरा एनु गोने जुरऊ एनु कयुमु सु, दत यीशु जोरमयतनि शम युसुफुस मरीयम नङ ञमफो छोयो शारिरिक रिश्ता मातऊ।
दत मरियमु चिगजा तामा टेम पुतु तु, दत दो नङ युसुफुस बैतहलम नगर जैमा शितिङ इत वरि सैरू जैऊ। दोपङरा ओदा जैमा यो तोइ छु लोननङ रोमी अधिकारी इस्राएलु पोसि सिङ मी पङरा शुममा गिनु तोइ। दोपङ गिनि तोइ कि सिङ मी ओदा जैमा अमा दोपोऊ पेरङ पङ पोसि तोइ। राजा दाऊदु जोलोम बैतहलम नगरु वऊ तोइ, अला दो मरियम नङ युसुफ निशु ओ चेइ मी तोइ।
मरियम नङ युसुफ बैतहलम जेऊ, दत ओदा छुमा पङरा तामा जागा मेननङ पोसमा शितिङ छोयो मातोइ तोइ। ओदो यो जागा तोइ ओदा मरियमुस एनु चिगजा रा तऊ। दोक दोरा शेननङु नंऊ बरिन तऊ छू लोननङ दा दोरा शितिङ छोयो मलछा मातोइ तोइ। दोपङक दो चिगजऊ मिन यीशु तऊ।
ओदो गोङक, ओदा ञमफो यो रिऊ नंऊ तचे ता पालस पङ तेतु शालङु रा खोनु तोइ। दत हेलि, इत चमकयतु स्वर्गदूत दोपोऊ थोरिङ तु, अला दोपङ बेऊ पिनु। दो स्वर्गदूतुस लोउ, “माबैमा, ग कनरा इत एपो फरिनतन रिङरोक, दो मुलुकु सिङ मी पोऊ शितिङ वङरो। तोरो राजा दाऊदु नगर बैतहलमु किमपोऊ शितिङ इत मुक्तिदातऊ जोलोम वंऊ तोइ अला दो यो परमेश्वर तश।”
जैऊ दो चिगजा रा फङमा, अला किमपङ दोरा गस्कुला चुखमिन अला चिऊ नंऊ बरिन पोसि तंइ। हेलि, नम स्वर्गदूतुस बुंऊ जेऊ। दोपङ परमेश्वर रा पेरतु तोइ। दोपङ ओशि बजन लोऊ तोइ कि स्वर्गु पोसमिन परमेश्वरु बडाई वङरो। “मुलुकु नंऊ मी पङ नङ सवङना वङमा गिनमा दोपोऊ दो जोरि लई तोइ।”
दत स्वर्गदूत जेऊ पिनु। दो पालस पङ एनु तेत पङरा सोठऊ चिगजा रा खोनमा जेऊ। हसल ओ दोपङ ओदो जागऊ रा पुतु ओदा यीशू तोइ अला दोपङक दोरा दो शेननङु नंऊ बरिन तंऊ, हलै दो स्वर्गदूतुदस रिंऊ तोइ। दोपङ हत गरीस तोइ। दत दो पालस पङ पोलठतु जेऊ अला एनु तेत पङ तोइ। दोपङक छे लि गोऊ अला तऊ ओदो सिङरा शितिङ दोपङ परमेश्वरु तारीफ लऊ तोइ।
पूर्वउ वरि इत देशु इत गटो फोबलङ तोइ। दोपङक कर्मा पङरा लफु तोइ अला दोपङ हत हुशार तोइ। दोपङक इत मरूखि कर्मा रा नमु नंऊ तंऊ। दोपङक लोऊ कि जिऊ मोतलब यहूदी पोऊ इत राजा जोरमयतु तोइ। ओदोक दोपङक जि चिगजा रा खोनमा शितिङ एनु देशङुस सैरू जेमा शितिङ लोऊ। इत चेई सैरू ज्ञपतिङ, दोपङ बैतहलम तु अला दो कयुम पोरतु ओदा यीशु नङ दोऊ अमा- अपा पोसमिन तोइ।
दत दो फोबलङ पङक यीशु रा एनु अमा नङ ञमफो तंऊ दत दोपङक पुशपङ चु दोपङरा पेरतु। दोपङक यीशु रा गोप गिनमा छला खेऊ। दत दोपङ कयुमु पोलठतु जेऊ।
मती पाठ-1; लूका 2 गुस इत बाइबलु कोथा।
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।