3. होलडो।
गोप टेमु ज्ञपतिङ, मुलुकु नंऊ गोप मी पङ पोसि तोइ। दोपङ हलम नङ अला कोचङ वंउ जैऊ । हलम ओनचे खुचि वंऊ जेऊ कि परमेश्वरुस इत चेइ होलडोस जि सिङ मुलुक रा तोबा लमा सुनचतु।
दत परमेश्वर नूह रत हत गरीस तोई। दो हलम मीपोऊ किललिङ पोसि इत धर्मी मी तोई। परमेश्वरुस नूह रा लोऊ कि दो इत हत चेइ होलडो रा सुमा तो। ओदोक, दोगुस नूह रा इत चेइ तिऊ नाव जुरामा शितिङ लोऊ।
परमेश्वरूस नूह रा मोतमतोइ 140 मीटर शुई, 23 मीटर कुनि अला 13 .5 मीटर थोनपो नाव जुरामा लोऊ। नूहस दोरा सिङुस जुराऊ तोइ अला दोननंऊ हुम मंजिला, गोप पनठङ, इत खयम नङ खिडकी जुरामा तोइ। दो नावु नूह, दोउ पेरङ, नङ मटङु सिङ छुमा पङरा होलडोस बचई।
नूहस मीपङरा तुई होलडोऊ बारे लोऊ अला दोपङरा परमेश्वरु कमचित गोमा शितिङ लोऊ, दोपङक दोऊ थोरिङ देंङ मालऊ। नुहस परमेश्वरू कमचित गोऊ। दो नङ दोऊ छङ पङक ओशियो नाव जुराऊ हलेया परमेश्वरूस जुरामा रिंऊ तोइ। छु लोननङ दो नाव हत चेइ तोइ अला दोरा जुरामा शितिङ गोप बोषङ लगयतु।
परमेश्वरूस नूह नङ दोऊ पेरङ नङ रंऊ शितिङ अला छुमा रा शितिङ थकतु कटठा लमा लोऊ। ओसपरिङ सिङ वंऊ तोइ, दत परमेश्वरुस नूह रा लोऊ जि बेला दोऊ, दोऊ योबलङ, दोऊ हुम छङ, नङ दोऊ योबलङ पोऊ- सिङ मिलायऊ गेत मी नावु जेमा तोइ।
परमेश्वरुस सिङ छुमा अला फोबलङक प्यात नङ योबलङक प्यात रा नूह रा पिनु दत दोपङ नावु जेमा लिऊ अला होलडो तुमपरिङ एपो पोसमा लिइ। परमेश्वरूस ओशि सिङ छुमा पोऊ खोता शिनिश फोबलङक प्य़ात नङ शिनिश योबलङक प्यात रा पिनु, दोपङरा पुजा तीमा शितिङ गिनमा तोइ। दत दोपङ सिङ नावु पुतु तोइ दत परमेश्वरूस नावु पितङ रा बोनत लऊ पिनु।
दत छरबा तुमा छसु तशे, अला छरबा तुओ पोसु, तुओ पोसु । मारुकयतु निशनिसा निर नङ निशनिसा मुन शम छरबा तुओ पोसु। मुलुकु सिङ छला, या बसक्यङ चेइ से चेइ डोङखङ लि तिऊ नंऊ डुबयतु जेऊ।
फोसि मटङु नंऊ पोसि तोइ मातोइ सिङ सिऊ जेऊ, दो मीपङ नङ छुमा रा सोठऊ उङ लि नावु तोइ दोपङ बचतु। दो नाव तिऊ थोरिङ याशु पोसु, अला नावु नंऊ सिङ छला रा डुबयतमा से बचऊ तऊ।
छरबा डेमु ज्ञपतिङ, ङा ला शम दो नाव तिऊ थोरिङ याशु पोसु, अला ओदोसपरिङो ती गटो वंऊ जेऊ तोइ। दत इ दयार दो नाव इत डोङखंऊ थोरिङ टेखयतु, मुलुक अला लि तीउ खोपशमिन तोइ। हुम लाऊ ज्ञपतिङ, गटो-गटो डोङखङु पिशा पङ लि तङमा तु तोइ।
दत अला निशनिसा दयारु ज्ञपतिङ, नूह गुस इत का रा दकपा खोनमा शितिङ पिनु छे दो ती फोसु तशा । दो का फोसि मटङ रा फंऊ नोस- जिस यपु पोसु, दत लि दोरा छोयो फोसि मटङ मापोरतु।
दोऊ ज्ञपतिङ नूहस इत कोकचुरु रा दकपा पिनु, दत लि दोरा फोसि मटङ मापोरतु, दत दो नूह रा पोलठतु तु। दत इत हफ्ता ज्ञपतिङ दोक दो कोकचुरु रा हेलि पिनु, दत दो एनु चोचु इत जैतूनू यलगा कयुफु पोलठतु तु । ती लि गटो वंऊ जेऊ तोइ , अला सोलत पङ हेलि चोऊ तशे।
नूह गुस इत हफ्ता अला शुंऊ पोसु अला हुम फेरा दो कोकचुरु रा हेलि दकपा पिनु। देसङ गोर, दोरा पोसमा शितिङ जागा पोरतु अला दो पोलठतु मतु। ती फौसु जेऊ तशे।
निश लऊ ज्ञपतिङ परमेश्वरूस नूह रा लोउ, “छङ का कन पैरङ नङ सिङ छुमा पङ नावुस हन्तु जिरश। परमेश्वरूस दोपङरा बोरङ खेऊ, गोप चिगजा नङ कोत-पात जोरमयामा अला मुलुक रा पुंऊ पिनमा।” दत नूह नङ दोऊ पेरङ पङ नावुस दकपा हन्तु तु।
नूह नावुस दकपा हन्तु तु ज्ञपतिङ, दोक पुजा तीमा शितिङ इत जागा जुरऊ अला पुजा तीमा शितिङ सिङ छुमा पोऊ नंऊ गटो छुमा रा कयुफु पुजा तिऊ पिनु। परमेश्वर दो पुजास हत गरीस तोइ अला नूह नङ दोऊ पेरङ पङ रा बोरङ खैऊ।
परमेश्वरूस लोउ, “ग वादा लारोक कि मिंऊ लमिन छे लि हलम क्रमु लमिन ग छङ मटङ रा शाप मखेई अला होलडोस मुलुक रा माकयारोक, छु लोन नङ मी एनु थिकलकु थलतो पापी तश।
दत परमेश्वरूस एनु वायदऊ थोनतु होमशित मुरङमुतती रा जुराऊ। तशपा लि नमु नंऊ मुरङमुतती तङमा तुरो, दत परमेश्वर सुनचति कि दोक छे वादा लऊ अला ओशियो दोऊ मीपङ लि सुनचति।
गुस इत बाइबलु कोथा। ऊत्पति पाठ 6-8
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।