30. यीशु ङा हजार मीपङरा थकतु खेइ।

यीशुस एनु खास चेला पङरा प्रचार लमा शितिङ अलित- अलित देषङु पिनु दत दोपङ मीपङरा यीशु बारे लोमा लीरो अला दोपङरा सिखयामा लीरो। दत दोपङ दा पोलठतु ओदा यीशु तोइ दत दोपङक रिंऊ कि दोपङक छे लऊ तोइ। दत यीशुस दोपङरा छोऊ नोपा फौक दोनङ ञमफो इत कत मातेइ जागऊ मोच्‍चे पोसमा शितिङ कुतु। दत दोपङ इत नावु थोरिङ जेऊ दत छोऊ नोपा फोक जेऊ पिनु।

दत दा गोप मीपङ ओशि तोइ दोपङक यीशु नङ चेला पङरा नावु जेइ तंऊ तोइ। जि मीपङ दोपोऊरत होमशित छोऊ नोपा जेमा शितिङ छौऊ थोपा- थोपा रोऊ। दत यीशु नङ चेला पङ पुतु दत मी पोऊ इत चेई बीड दोपङरा होमशित थलत शुङु तोइ।

दो भीडु योबलङ पङ नङ चिगजा पङरा शुममा बसकयङ मोतमेननङ ङा हजार फोबलङ तोइ। यीशुस दोपङरा हत पापङ ततु। यीशुरा शितिङ दो मीपङ पालस मातेइ तेतु खोता तोइ। ओदोक दोगुस दोरा लोऊ अला दोपोऊ नंऊ तचे मी शोतु तोइ दोपङरा एपो लऊ।

निरू ज्ञपतिङ, चैलापङक यीशु रा लोऊ, “छङ गोप गोरू अला नोपा जिपा हलेस लि देशङ मातोइ तोइ। जि मीपङरा जेमा मत छु लोननङ दोपङ जेऊ जामा शितिङ छेई थऊ सुरो।”

यीशुस एनु चेला पङरा लोऊ, “का दोपङरा छेई जामा खेततिश। “दोपङक लोऊ, “निङपङ ओशि हले लमा लिइ? निङपोऊरा लेम ङा रोटि नङ निश मचस तोइ।”

यीशुस एनु चेला पङरा लोऊ कि दो बीडु गोप मी पङरा चिऊ थोरिङ डईनिसा- डईनिसा वंऊ पोसमा शितिङ लोमा।

दत यीशुस ङा रोटि नङ निश मचस रा कयुफु स्‍वर्ग रा खोनु, अला दो थकतु रा शितिङ परमेश्‍वर रा ओरछे लोऊ।

दत यीशुस रोटि नङ मचस रा खनङ लऊ पिनु। दोगुस मीपङरा खेमा शितिङ एनु चेला पङरा दो खनङ लमिन दो खेऊ पिनु। चेले दो थकतु रा छुऊ पोसु,अला कयामा मायंऊ। दो सिङ मीपङ थकतु जऊ सवङना वंऊ पोसु।

दोऊ ज्ञपतिङ, चेला पङक दो बचति टुकडा कटठा लऊ अला टुकडा पङरा सानिश पिलतु नंऊ पुंऊ पिनु। दो सिङ थकतु ओदो ङा रोटि नङ निश मचसुस तु तोइ।