31. यीशु तिऊ थोरिङ विनि।

ङा हजार मी पङरा थकतु खैऊ ज्ञपतिङ, यीशु गुस एनु चेला पङरा नावु जेमा शितिङ लोऊ। दोगुस दोपङरा छोऊ नोस फौक जैमा शितिङ लोऊ दत लि दो मोच्‍चे थङक ओदा यो पोसु तोइ। दत चेला पङ जेऊ अला यीशुस दोपोऊ बीड रा जेमा मतु छु लोननङ दोपङ एनु कयुमु जेऊ। ओदोऊ ज्ञपतिङ, यीशु प्रार्थना लमा शितिङ इत डोङखङु जेऊ। दो ओदा खेचो तोइ, अला दोक गोप मुञ्‍ञा शम परमेश्‍वर रा कोलङ लऊ।

दो बेलऊ, चेला पङ एनु नाव रा चलऊ जेउ तोइ, दत दोपोऊ तुसिङ हत लान चलतु तोइ। गोप मुञ्‍ञा वंऊ जेऊ लि दोपङ लेम छौऊ किल्‍लिङ ओ पुतु तोइ।

दो बेलऊ यीशुस प्रार्थना लमा कयऊ पिनु अला एनु चेला पोऊरा पोलठतु जेमा तिखु। दो नावु रा पुतमा शितिङ तिऊ थोरिङ विनु जेऊ।

दत चेला पङक दोरा तंऊ। दोपङ हत बेऊ छु लोननङ दोपङ सुनचतु कि दो उङि शैतान तश। यीशु सेसि तोइ कि दोपङ बेऊ पिनु तोइ, ओदोक दोगुस दोपङरा कुतु लोऊ, ”थाबेरिश ,जि ग तोक।“

ओसपरिङ पतरसुस यीशु रा लोऊ, ”हे प्रभु जि का तोननङ दत अङरा तिऊ थोरिङ विनु कनरा तुमा शितिङ रिङ। यीशुस पतरस रा लोऊ, ”तु पिन।

दत पतरस नावुस हन्‍तु तु अला यीशु रा जेमा शितिङ तिऊ थोरिङ विनु जेऊ। दत मोच्‍चे नोपा जेऊ, दोक एनु मी रा ठुरऊ पिनु अला तिऊ लहर रा खौनु जेऊ अला लान तु तश ततु।

दत पतरस बेऊ पिनु अला तिऊ नंऊ डुबयतु। दो हरो टऊ, “हे प्रभु, अङरा बचास। “यीशुस गुत खेऊ दोरा चुमु। ओसपरिङ दोक पतरस रा लोऊ, “कन देङ हत गटो तश। कनरा बचऊ तामा शितिङ कस अङ थौरिङ दैङ छू मालऊ?”

दत यीशु नङ पतरस नावु शोखू, अला हसल ओ लान तुमा डेमु। ती सवङना वंऊ। चेला पङक हैरान वंऊ यीशु रा पुशपङ चुऊ। दोपङक दोरा अराधना लऊ अला दोरा लोऊ, “दिमलेओ का यो परमेश्‍वरु छङ तोन आ।”