32. यीशु हलम जिवा सङकमिन नङ इत शोतमिन योबलङक रा ठीक लई।

इ दयार यीशु नङ दोऊ चेला पङ एनु नावु ओदो जागऊ रा जेऊ ओदा गिरासेनी मीपङ पोसि तोइ। दोपङ ओदो जागऊ रा पुतु थलत नावुस हनतु तु।

दो इत मी तोइ दोगु नंऊ हलम जिवा सङकु तोइ।

दो मी ओनचे शेच्‍चन तोइ कि उङ लि दोरा काबू लमा मालिइ तोइ। गोप फैरा ता मीपङक दोऊ गुत नङ बङखोन रा शङलङुस लि छुतु, दत लि दो दोरा ठऊ पिनि तोइ।

दो मी ओदो जागऊ कब्रु नंऊ पोसि तोइ। दो मी सारा दयार नङ मुनथना हरो टऊ पोसि तोइ। दो गस्‍कुला माचुखि तोइ अला दयारो एनरा रा गुस थोलि तोइ।

दो मी करलतु यिशु रा तु अला यीशूउ तुसिङ पुशपङ चुऊ पोसु तोइ। दत यिशुस दो मिउ नंउ हलम जिवा पङरा लोऊ, “जी मिऊ डियङुत दकपा हनतु जिरा।’’

दो हलम जिवा गोप शेततङ हरो टऊ, “हे यीशु, परमेश्‍वरु छङ, कनरा अङरत छे लेन? ओरछै अङरा ङनचेन थालस। “दत यीशुस दो हलम जिवा रा शुऊ , “कन मिन छे? दोक जवाब खेऊ, “निङपोऊ मिन सैना तो, छु लोननङ निङपङ गोप तोश। ”रोमी सैनऊ नंऊ गोप हजार सैनिक पङरा इत “सैना” लोइ।

दो हलम जिवा पङक यिशु रा पेरतू, “ओरछे जमभु निङपङ रा जी जागास दकपा था पिन। “ओदयो तुसिङ डोङखङु थोरिङ सुरसु शालङ रा शवऊ तोइ। ओदोक हलम जिवा पङक यिशु रा पोरजऊ तोइं, “ओरछे निङपङरा लि ओदो सुरस पोऊ नंऊ पिन। “दत निङपङरा सजा माखेसमा।”

अला दो हलम जिवा दौ मिऊ डियङुत हनतु दो सुरसु नंऊ जेऊ। दो सुरस पङ क्रलतु इत डेन डोङखङुस लाङ टऊ अला छोऊ नंऊ डुबयतु सिऊ जेऊ। दो शालङु मोतमेन्‍नङ निश हजार सूरस तोइ।

ओदा दो सूरस पङरा खोनमा शितिङ मीपङ तोइ। छे लि वंऊ दो दोपङक तंऊ दत दोपङ नगरु रोऊ जेऊ। यीशुस छे लि रिंऊ दो दोपङ सिङरा लोऊ। दो देशङु मी पङ हनतु तु अला दो मी रा तंऊ दोननऊ हलम जिवा पङ तोइ । दो मेसङक,गस्‍कुला चुखु, अला इत एपो मिंऊ खोता वऊ जेऊ।

दो मीपङ हत बेऊ तोइ अला दोपङक यीशु रा ओदत जेमा शितिङ लोऊ। दत यीशु नावु थोरिङ शोखु। दो मी दोननंऊ हलम जिवा पङ तोइ दोक यीशु नङ ञमफो जेमा शितिङ औरछे लोऊ।

दत यीशुस दोरा लोऊ, ”मेन। ग गिनु तोक का कयुमु जेऊ सिङरा लोमा परमेश्‍वरुस कनरा शितिङ छे लऊ। दोपङरा लोत कि हले परमेश्‍वरुस कन रा पापङ ततु।”

ओदोक दो मी जेऊ पिनु अला सिङरा ओइऊ बारे लोऊ छे यीशुस दोऊ शितिङ लऊ तोइ। दोऊ कोथा गोइ सिङ मी बिंऊ जेऊ तोइ।

ओसपरिङ यीशु छोऊ नोस फोक पोलठतु तु। दोऊ ओदा पुतमंऊ ज्ञपतिङ, इत चेइ शालङ दोऊ नोपा- गिपा कटठा वंऊ अला दोरा टेममा लऊ। दो बीडु इत योबलङक तोइ दो सनिश बोषङुक शुइ बोयतमा शोतमिन तोइ। दोक एनु सिङ नौर रंऊ शोतु शितिङ खेऊ पिनु तोइ छु लोननङ दो दोरा एपो लरो ततु, दत लि दोऊ शोत अला लि खुचि यो वंऊ जेऊ तोइ।

दोक गोऊ तोइ कि यीशुस गोप शोति मी पङरा एपो लऊ तोइ अला दो सुनचतु, “अङरा पोता ग लेम यीशुऊ गस्‍कुला रा थननङ, दत ग लि ठीक वंई।” ओदोक दो यीशूउ ज्ञपतिङक तु अला दोऊ गस्‍कुला रा छुअऊ। दत दोक दोपङरा छुअऊ, ओदोसपरिङ ओ दोऊ शुइ हनतमा बोनत वंऊ।

हसल हो, यीशु सेसु कि अङरत सोततिङ हनतु तु। ओदोक दोगुस ज्ञपतिङ ठुरतु शुऊ, “अङरा ऊङक थनु?” चेला पङक लोऊ, “जा ओनचे मी पङक कन नोपा- जिपा बीड तिऊ पोसु, अला कनरा क्रोंऊ पिनु तश। दत कस छु शुशुसु कि अङरा ऊङक थनु?”

दत दो योबलङक यीशुऊ रा क्रिंऊ तु अला हत बेऊ एनु पुशपङ चुऊ पोसु। दत दोगुस दोरा लोऊ पिनु कि दोगुस छे लऊ, अला ओशि लि लोऊ कि दो एपो वंऊ। यीशुस दोरा लोऊ, “कन दैङुस कनरा एपो लऊ। मेसङक जोयो।”