39. महासभऊ नंऊ यीशूउ थोरिङ मुकदमा चलतु।

छङ ओइ खनङ गोङकु टैम तोइ। दो सैनिक यीशु रा महायाजकु कयुमु कयुफु तु, छु लोननङ दो यीशुउ रत छेइ शूमा गिनु तोइ। पतरस वरित दोपङ रा खेरऊ तोइ। दो सैनिक पङ यीशु रा कयुमु कयुफु जेऊ, दत पतरस दकपा टेखयतु अला पोसु मै टोशु।

कयुमु नंऊ, यहूदी गोबा पङक मुकदमा चलऊ। दोपङ दोऊ खिलाफ कवश कमचित पङ लोमा शितिङ कवश गवा पङ कयुफु तु। दोपोऊ कमचित इतुस- अलित नङ मामिलति तोइ, ओदोक यहूदीऊ गोबा पङ साबित लमा मालिऊ कि दो दोषी तोइ। यीशुस छोयो मलऊ।

थोनतु ज्ञपतिङ, महायाजकुस सिधा यीशु फोक खौनु लोऊ, “निङपङरा रिंङ का यो छे शिङमिन परमेश्‍वरू छङक मसीह तोन आ?”

यीशुस लोऊ, “ग तोक, अला का अङरा परमेश्‍वर नङ ञमफौ पोसि अला स्‍वर्गुस तुइ लि तंई।” महायाजकुस एनु गस्‍कुला चेरू पिनु छु लोननङ यीशुस दो कमचित लोऊ ओदो थोरिङ हत छिङना तंऊ। दो अलित गोबा पोऊ थोरिङ हरो टऊ, “ऊलपङरा जि रिङमा शितिङ अलित गवा मागिनि कि जि मीस छे लऊ। किमफङक रङ ओ दोरा ओशि रिंइ गोऊ दो परमेश्‍वरू छङक तोक। दोऊ बारे किमपोऊ छे फैसला तो?”

सिङ यहूदी गोबा पङक महायाजक रा जवाब खेऊ, “दो सीमा गिनमा।” दत दोपङक यीशुउ मिऊ नंऊ पट्‍टी छुतु पिनु, दोऊ थोरिङ कराती फौऊ, दोरा तोंऊ, अला दोरा ठटे लऊ।

अला पतरस, दत दो कयुमु दकपा शुंऊ पोसु तोइ। दत दो नुकुर योबलङकुस दोरा तंऊ। दोगुस दोरा लोऊ, ”का लि यीशु नङ ञमफो तोइ या।” पतरसुस मना लऊ पिनु। ज्ञपतिङ, ऊङि अतित योबलङकुस ओइ कमचित रा लोऊ, अला पतरसुस हेलि मेन लोऊ पिनु। थोनतु ज्ञपतिङ, तचे ता मीपङक लोऊ, “निङपङ सेसि कि का यीशु नङ ञमफो तोइ छु लोननङ किनिश गलीलुस तोश।“

दत पतरसुस लोऊ, “दत लि ग ओइ मी रा सेसि तोननङ परमेश्‍वर अङरा क्षाप खे।” ओदोसपरिङ ओ पतरस ओशि चलु ज्ञपतिङ, हसल ओ कुकरीस बाँग खेऊ। यीशु पोलठतु पतरस रा खौनु।

पतरस ओदत जेऊ पिनु अला हिहिपु करपु। ओदोसपरिङ ओ, यीशु रा चुमि सा यहूदास तंऊ कि यहूदी गोबा पङक यीशु रा सतमा सजा़ खेऊ पिनु। यहूदा रा हत दु:खङ वंऊ अला जेऊ एनरायो सतु पिनु।

छङ मुलुकु राजा पिलातुस तोइ। दो रोम रा शितिङ लेन लइ सा तोइ। यहूदीऊ गोबा पङ यीशु रा दोऊ रा कयुफु तु। दोपङ गिनि तोइ कि पिलातुस दोरा सतु पिनरो। दत पिलातुस गुस यीशुउ रत शुउ, “का छे यहूदी पोऊ राजा़ तोन आ?”

यीशुस जवाब खेऊ, ”कस दिमलयो रिंऊ। दत लि अङ राज्‍य ओया मुलुकु मैन तो। दत लि तोननङ अङ नुकुर पङ अङ शितिङ तोङकतो। ग मुलुकु नंऊ परमेश्‍वरु बारे दिमलेयो रिङमा तु। हर इत मी दो दिमलेयो रा एपो तति दो अङ गोइ।” पिलातुसुस रिंऊ, “दत दिमलेओ छे?”

यीशु नङ ञमफौ कमचित लोऊ ज्ञपतिङ, पिलातुस गुस दकपा गोप मी पोऊरा जेऊ लोऊ, ”अङरा जि मी रा सतमा शितिङ छोयो वजा तङमा मतु तो।” दत लि दो यहूदी गोबा पङ नङ राशिङ मी पङ गोप हरौ टऊ लोऊ, ”दोरा क्रूसु थोरिङ पिनमा। पिलातुसुस जवाब खेऊ, ”दोगुस छोयो हलम मालमिन।” दत लि दोपङ अला लि शेच्‍चन हरो टऊ। दत पिलातुसुस हुम फेरा दोसपरिङ लोऊ, ”दोऊ छोयो दोष मतेइ।”

पिलातुस बेऊ जेऊ कि दो गोप मीपङ तोङकमा छसतो, ओदोक दो एनु सैनिक पङरा यीशु रा क्रूसु थोरिङ पिनमा शितिङ याऊ। रोमी सैनिक पङक यीशु रा कोडे तिऊ, अला दोरा शाही गस्‍कुला चुऊ, अला दोऊ पिशरिङ छवा खौता जुरामिन मुकुट तऊ। दत दोपङ ओशि लोऊ दोरा ठटे लऊ, “खौननिश, यहूदी पोऊ राजा।”