40. यीशु रा क्रूसु थोरिङ चडऊ पिनि।

यीशु रा ठटे लऊ ज्ञपतिङ, सैनिक यीशु रा क्रूसु थोरिङ पिनमा कयुफु जेऊ। दोपङक दो क्रूस रा ओशि यो थुतु दोऊ थोरिङ दो सिई।

दो सैनिक पङ यीशु रा ओदो जागऊ कयुफु तु दो जागऊ मिन “खोपडी” तोइ अला दोऊ गुत नङ बङखौन रा क्रूसु थोरिङ परैकुस ठोकठोऊ वयऊ पिनु। दत लि यीशुस लोऊ, “हे परमेश्‍वर, जिपङरा माफ लत, छु लोननङ जिपङ मासेसि कि जि निङपङ छे लऊ तोश।” दोपङक इत रोत रा लि दोऊ पिशऊ थोरिङ योऊ पिनु। दोऊ थोरिङ चेमिन तोइ, “यहूदी पोऊ राजा।” पिलातुसुस दोपङरा ओशि चेमा शितिङ लोऊ तोइ।

दत सैनिक पङक यीशुउ गस्‍कुलऊ शितिङ परची पिनु। ओसपरिङ दोपङक ओशि लऊ दत दोपङ भविष्‍य लमिन दो पूरा लऊ दो रिंई तोइ, “दोपङक अङ गस्‍कुला रा एमपोऊ नंऊ छुऊ पिनु, अला अङ गस्‍कुलऊ शितिङ परची पिनु।”

ओदा निश चोरस लि तोइ, दोपङरा सैनिक पङक ओदो यो क्रूसु थोरिङ चडायऊ तोइ। दोपङक दोनिशता यीशुउ नोपा- जिपा तऊ तोइ। दोपोऊ नंऊ इत चोरसुस यीशु रा ठटे लऊ, दत अलितुस लोऊ, ” का छे माबेऊ तोना कि परमेश्‍वर कनरा सजा़ खेसतो? ऊलपङ गोप सारा हलम लैन लमऊ गुनहगार तोश, दत लि जि मीस ता छोयो मालमिन। दत दोगुस यीशु रा लोऊ, ”तशपा लि का रंऊ राज्‍यु तुननङ अङरा कोलङ तामा।” यीशुस जवाब खेऊ, ”तोरो यो का अङ नङ ञमफो स्‍वर्गु तुरोन।”

यहूदी गोबा पङ अला बीडु अलित मी पङक यीशु रा ठटे लऊ। दोपङक दोरा लोऊ ,”दत लि का परमेश्‍वरु छङक तोननङ , दत क्रूसुस ओपङ हनत अला रङरा बचऊ पिन। दत निङपङ कन थोरिङ दैङ लई।”

निरू टेमु सनिश बजेस हुम बजे शम सिङ देशु खबङबङ वंऊ पोसु , ओदोसपरिङ खनङ निर तोइ तोइ। मोतमेननङ हुम बजे शम सिङ मुलुकु खबङबङ ओ वंऊ पोसु।

दत यीशुस कुतु लोऊ, ”पूरा वंऊ। हे अपा, ग रंऊ जिवा कन गुतिङ खेसतोक।” दत दोगुस एनु पिशा परूतु अला रंऊ जिवा परूतु पिनु। दत दो सिऊ दत इत सङगुल तु। दो चेइ पर्दा दो परमेश्‍वर तोमा परिङ मी पङरा खैचो लई तोइ, ओपङक थोरिङक बशु निश हिसा वंऊ जेऊ।

एन सिऊ ज्ञपतिङ, यीशुस मीपङरा शितिङ परमेश्‍वर रा तुमा शितिङ ओमप हनु तोइ। दत यीशु रा खोनि सा इत सैनिकुस छे- छे वंऊ तोइ दो तंऊ दत दोगुस लोऊ, ”जिगुस छोयो मालमिन, जिरा पापङ। जि परमेश्‍वरू छङक हीन तश।”

दत युसुफ नङ नीकुदेमुस मिनु निश यहूदी गोबा पङ तु। दोपङरा पोता तोइ कि यीशु ओ मसीह तोइ। दोपङक पिलातुसु रत यीशुउ लाश रा थऊ। दोपङक दोऊ डियङ रा गस्‍कुलऊ नंऊ परिनलऊ। दत दोपङ दोरा इत डोङखङुस फशु लमिन कब्रु कयुफु जेऊ अला दोननऊ दोरा तऊ। दत दोपङक दो कब्रु पितङ रा बोनत लमा शितिङ इत चेइ रा रा पोलठऊ पिनु।