41. परमेश्‍वर यीशु रा सिऊ ज्ञपतिङ हे जिंदा लऊ पिनि।

सैनिक पङक यीशु रा क्रूसु थोरिङ पिनु ज्ञपतिङ, यहूदी गोबा पङक पिलातुस रा लोऊ, ”दो यीशुस कवश चलु कि दो हुम दयार ज्ञपतिङ सिऊ थलत लि जिंदा वंऊ जेइ। ऊङ रलि कब्र रा खोनमा शितिङ तामा वंइ मेननङ दोऊ चेला पङ दोऊ लाश रा खुतु ता माकिइ या। दत दोपङ ओशि लननङ दोपङ रिंइ कि दो सिऊ थलत हे जिंदा वंऊ ।”

पिलातुसुस लोऊ, ”गटो सैनिक पङरा कयुफु जेरिश,अला हले किमपङ लमा लिइ ओशि यो कब्र रा शुंऊ पोसमा।” ओदोक दोपङक कब्रु जेमा ओमपु रऊ थोरिङ इत सार तिऊ पिनु। दोपङरा ओदा ओदोक तऊ छुलोननङ दोऊ लाश रा ऊङो किमा मलीरो।

यीशु सिऊ ज्ञपतिङकु दयार सब्‍तु दयार तोइ। ऊङ लि सब्‍त दोमया लेन मालइ तोइ, ओदोक यीशुउ ऊङलि पङगोत कब्रु रा मतु तोइ। दत सब्‍तु हइरो दोमया, नममत ठेठे, तचे ता योबलङ पङ यीशुउ कब्रु रा जेमा शितिङ जुराशु तोइ। दोपङ दोऊ लाशु थोरिङ अला लि मसाला पङ तीमा गिनु तोइ।

दो योबलङक पङ पुतमऊ होमशित, कब्रु इत चेइ सङगुल तु। स्‍वर्गुस इत स्‍वर्गदूत तु दोक रा रा पोलठऊ पिनु, दो रास क्रबु पितङ रा खोपमिन तोइ ,अला दो दोऊ थोरिङ पोसु। दो स्‍वर्गदूत छतिऊ खौता चमकयतु तशे। कब्रु तचे लि सैनिक पङ तो दोपङक तंऊ। दोपङ ओनचे बेऊ पिनु कि सिइ मिंऊ खोता मटङु थोरिङ बरिन जेऊ।

ओदोसपरिङ दो योबलङक पङ कब्रु पुतमा परिङ दो स्‍वर्गदूत दोपङरा लोऊ, “थाबेरिश। यीशु जा मतो। दो सिऊ ज्ञपतिङ लि हे जिंदा वंङ कयऊ, हले दोगुस रिङमिन तोइ दो हे जिंदा वंइ। कब्रु नंऊ फङरिश अला खोननिश।” दो योबलङक कब्रु नंऊ खौनु ओदा यीशुऊ लाश तामिन तोइ ओदा फंऊ अला खौनु दोऊ लाश ओदा मातशे।

दत दो स्‍वर्गदूत दो योबलङक पङरा लोऊ, “जेऊ दोऊ चेला पङरा लोततिश, “यीशु सिऊ ज्ञपतिङ लि हे जिंदा वंऊ, अला दो किमपोऊ होमशित- होमशित गलील फोक जेइ।”

दो योबलङ पङ बिंऊ जेऊ अला गोप गरीस सिऊ। दोपङ चेला पङरा जि खुशखबरी लोमा शितिङ करलतु जेऊ।

दत दो योबलङ पङ चेला पङरा जि खुशखबरी लोमा शितिङ ओमपतिङ तोइ, दत यीशु ओदा अचानक तु। दोपङ दोऊ बङखौनु ओपङ बुशु जेऊ। दत यीशूस लोऊ, “थाबेरिश। जेऊ अङ चेला पङरा गलील जेमा शितिङ लोमा। दोपङ ओदा अङरा तंङरो।