42. यीशु स्‍वर्गु फोक पोलठतु जेइ।

ओदो दयार परमेश्‍वरूस यीशु रा सिऊ रत शिंइ लऊ तोइ, दोऊ निश चेला पङ तुसिङ देशङु जेऊ तोइ। विनु जेऊ दोपङ यीशु नङ ञमफौ छै वंऊ ओदो बारे चलु जेऊ तोइ, दोपङ ओशि तति तोइ कि दो मसीह तोइ, दत दोरा सतु पिनु तोइ। छङ दो योबलङ पङ रिंइ तोइ कि दो है जिंदा वंङ कयऊ। दोपङ मासेसि तोइ कि हलेस कमचितु थोरिङ दैङ लमा।

यीशु दोपोऊ रा तु दोपङ नङ ञमफौ विनु जेऊ, दत लि दोपङ दोरा माठोतु। दोक शुउ कि दोपङ ऊङु बारे कमचित चलु तोश। दोपङक दोरा इमया लोक यीशु नङ ञमफौ वङमिन दो दोरा लोऊ। दोपङ ततु कि दोपङ ऊङि पोसदैसी मी रा कमचित लोऊ तोश ततु दो मासेसि तोइ कि यरूशलेमु छे वंऊ तोइ।

दत यीशुस दोरा सोमजायऊ कि परमेश्‍वरू रिङमिन कमचित दो मसीहु बारेऊ छे रिंइ तशे। गोप लोमशित, भविष्‍य लोइ साक ओशि रिंऊ तोइ हलम मी पङ मसीह रा हत जुकजेर खेइ अला दोरा सतु पिनि। दत भविष्‍य लोइ साक ओशि लि रिंऊ कि दो हुम दयार दोमयां हे अनति।

दत दोपङ ओदो नगरू पुतु ओदा दो निश मी पोसमा गिनि तोइ, ओसपरिङ शम गोङसा वंऊ तोइ। दोपङक यीशु रा दोपङ नङ ञमफो पोसमा शितिङ लोऊ, दत दो दोपङ नङ ञमफौ इत कयुमु जेऊ। एमपोऊ गोङकु थकतु जामा शितिङ दोपङ पोसु पिनु। यीशु इत रोटि कयुफु दोऊ शितिङ परमेश्‍वर रा पेरतु, अला दत दोरा खनङ लऊ। अचानक ओ, दोपङ सेसु कि दो यीशु ओ तश, दत ओदोसपरिङ ओ, दो दोपोऊ तुसिङक शो जेऊ।

दो निश मीस इतुस अलित ता लोऊ, “दो यीशु ओ तशे। ओदोक ओदोसपरिङ दोगुस ऊलपङरा परमेश्‍वरूस वचन रा सोमजासु दत ऊलपङ हत गरीस तोइ।” हसल ओ, दोपङ ओदत हनतु हे पोलठतु यरूशलेम फोक जेऊ। दत दोपङ ओदा पुतु ज्ञपतिङ दोपङक चेला पङरा लोऊ, “यीशु जिंदा तश। निङपङक दोरा तंऊ।”

ओदोसपरिङ चेला पङ कमचित लोऊ तोइ, यीशु अचानक ओ दो पनठङु दोपङ नङ ञमफो तु। दोगुस लोऊ, “किमपङरा सुखङ पोरततो।” चेला पङ ततु कि दो ऊङि शुना तशे, दत यीशुस लोऊ, “किमपङ छु बेऊ तोश? किमपङ ओशि छे मासुनचतु कि जि दिमलेओ यो ग, यीशु तोक? अङ गुत नङ बङखौन रा खौननिश। शैतान पोऊरा ओशि डियङ मातुइ हलेया अङरा तो।” ओइ कनमा शितिङ कि दो छोयो शैतान मैन तशे, दोक जामा शितिङ छेइ थऊ। दोपङक दोरा मछसु इत खनङ टुकडा खेऊ, अला दोगुस दो जऊ पिनु।

यीशुस लोऊ, “अङ बारे परमेश्‍वरू वचनु छे लि कमचित रिङरो दो वंइ यो वंइ। गस किमपङरा होमशित ओ रिङ कयऊ कि जि वङमा गिनमा।” दत यीशुस दोपङरा परमेश्‍वरू वचन एपो से सोमजायऊ। दोगुस लोऊ, “गोप होमशित भविष्‍य लोइ साक चेमिन तोइ कि ग, मसीह रा गोप दु:खङ कयुफमा वंइ, सिमा वंई अला दत हुम दयार दोमया सिऊ ज्ञपतिङ हे शिङमा वंई।”

“दो भविष्‍यलोइ साक ओशि लि चेमिन तोइ कि अङ चेला पङ परमेश्‍वरुस रिङमिन दो अटङकरा लोइ। दोपङ सिङ रा यो पछतायतमा शितिङ लोइ। दत दोपङ ओशि लननङ परमेश्‍वर दोपोऊ पाप लमिन दोरा माफ लई। अला चेला पङ ओइ फरिनतन लोमा शितिङ यरूशलेमु रत जेई। दत दोपङ सिङ जागऊ सिङ जातु नंऊ जेइ, छे लि गस रिंऊ अला लऊ अला छे लि अङ नङ ञमफो वंऊ किमपङ ओइ सिङ कमचितु ग्‍वाह तोश।”

अलित पनिसा दयार शम, यीशु एनु चेला पङरा गोप फेरा तङमा तु। इ फेरा ता दो इतो बेलऊ ङाज्ञा से लि खूचि मी पङक दोरा तंऊ। दोगुस एनु चेला पङरा गोप फेरा साबित लऊ कि दो जिंदा तोक, अला दोगुस दोपङरा परमेश्‍वरू राज्‍यु बारे लि लफु।

यीशुस एनु चेला पङरा लोऊ, “परमेश्‍वरुस अङरा स्‍वर्ग नङ मुलुकु सिङ मी पोऊ थोरिङ राज लमा शितिङ रिऊं तोइ। ओदोक छङ ग किमपङरा रिङरोक, जेऊ सिङ जात पङरा चेला जुरारिश। ओशि लमा शितिङ, किमपङरा दोपङरा अपा, छङ अला संखमा जिवा मिनुस संखमा तिऊ चङकमा खैमा वंई। छे लि गस किमपङरा लमा रिंऊ ओदो सिङ कमचित रा लमा यामा लि अला किमपङरा दोपङरा सिखयामा लि वंई। कोलङ तामा, ग अमबोरो किमपङ नङ ञमफो तोक।”

यीशु सिऊ ज्ञपतिङ लि हे अनतु पनिसा दयारू ज्ञपतिङ, दोगुस एनु चेला पङरा लोऊ, “तशपा शम अङ अपा किमपङरा सोततिङ माखेसतो दत शम यरूशलेमु ओ पोसु ताश। दो किमपोऊ थोरिङ संखमा जिवा पिनु ज्ञपतिङ ओशि लइ।” दत यीशु स्‍वर्गु जेऊ पिनु, अला जू गुस दोरा दोपङ मातङमा शितिङ ञंऊ पिनु। स्‍वर्गु यीशु सिङ छला पोऊ थोरिङ राज़ लमा शितिङ परमेश्वरु ज़खङ फौक पोसु पिनु।