44. पतरस नङ यूहन्‍ना इत खोरस भिखारी रा एपो लऊ पिनि।

इ दयार, पतरस नङ यूहनना थानङु जेऊ तोइ। इत खौरस मी बीख थामा शितिङ पितङु रा पोसमिन तोइ।

पतरसुस दो खोरस मी फोक खौनु अला लोऊ, “अङरा कनरा खेसमा शितिङ रूपया ता मतो। दत लि अङरा छे तो ओदो ग कनरा खेसतोक। यीशुउ मिन हनु, अनत अला दोङ- दत।”

ओदोसपरिङ ओ, परमेश्‍वरुस दो खौरस मी रा एपो लऊ पिनु। दोक नोपा- जिपा विनमा अला गवामा, अला परमेश्‍वर रा पेरतु। थानङु खौलगङु पोसि मी पङ बिंऊ जेऊ।

हसल ओ गोप मी पङ दो मी रा खौनमा शितिङ तु दो मी एपो वंङमिन तोइ। पतरसुस दोपङरा लोऊ, “जि मी एपो तो, दत ओइ कमचित गोऊ बिंऊ माजेमा। निङपङक जिरा रंऊ सोततिङुस एपो मालऊ, ओदोक मैन निङपङ परमेश्वर रा मोनइ। दो यीशु यो तो दोगुस जि मी रा एनु सोततिङुस एपो लऊ, छु लोननङ निङपङ यीशुउ थोरिङ विश्‍वास लई तोश।”

“दो किमपङ ओ तोश किमपङक दो रोमी राज्‍यपाल रा यीशु रा सतमा शितिङ लोऊ तोइ। किमपङक दोरा सतु पिनु दो सिङरयो जोलोम खैइ सा तोइ। दत लि परमेश्‍वर दोरा सिऊ लि जिंदा लऊ पिनु। किमपङ मासोमजतु कि किमपङ छै लऊ तोश, दत लि ओदोसपरिङ किमपङ दो लेन लऊ तोरेश, दत दो भविष्‍य लोइ सा पङक रिङमिन दो दिमलेओ वंऊ। दोपङक रिंऊ तोइ कि मसीह हत दु:खङ तंई अला सिऊ जेइ। परमेश्‍वर जीरा ओशि यो वङमा मतु। ओदोक छङ, पछतायततिश अला परमेश्‍वर फौक वङरिश, दत दो किमपोऊ पाप लमिन दो ऊरू जमा लरो।”

दत थानङु गोबा पङक पतरस नङ यूहन्‍नऊ कत गोऊ, दत दोपङ बेऊ पिनु। ओदोक दोपङक दोपङरा चुमु जेलु संऊ पिनु। दत छे लि पतरसुस रिंऊ तोइ दोऊ थोरिङ गोप मीपङक विश्‍वास लऊ। यीशुऊ थोरिङ दैङ लई पोऊ गिनती बोजतु मोतमेनङ ङा हजार वंऊ जेऊ।

अलित दयार, दो यहूदिऊ गोबा पङ पतरस नङ यूहन्‍ना रा महायाजक नङ अलित पुजारी गोबा पोऊ तुसिङ कयुफु तु। दोपङ दो मी रा लि कयुफु तु दो खोरस तोइ। दोपङक पतरस नङ यूहन्‍ना रा शुऊ, “ऊङु रत शुऊ किनिशुस दो खोरस मी रा एपो लऊ?”

पतरसुस जवाब खेऊ, “ओइ मी जि किमपोऊ तुसिङ डेन तो दोरा यीशु मसीहस एपो लऊ। किमपङक यीशु रा क्रूसु थोरिङ चडऊ पिनु तोइ, दत लि परमेश्‍वरूस दोरा हेलि जिंदा लऊ पिनु। किमपङक दोरा मडामा लऊ, दत छङ यीशुउ सोततिङ ओ मेननङ छङ छुटकारा पोरतमा शितिङ अलित ओमप मतेइ।”

दो गोबा पङ बिंऊ जेऊ कि पतरस नङ यूहन्‍नास माबेऊ कमचित लोऊ। दोपङ तंऊ कि जि ओशि यो फौबलङ तोइ दो अनपढ तोइ। दत लि दोपङरा कोलङ जेऊ कि जि फौबलङ पङ यीशु नङ ञमफो पोसमिन तोइ। ओदोक दोपङक दोपङरा लोऊ, “निङपङ किमपङरा गोप सजा खैसि दत लि किमपङ ओइ मी यीशुउ बारे मी पङरा छै लि फरिनतन लोननङ।” ओशि गोप कमचित लोऊ ज्ञपतिङ, दोपङक पतरस नङ यूहन्‍ना रा जेमा मतु।