45. सितफनुस नङ फिलिप्‍पुस।

होमशित मसीही गोबा पोऊ किल्‍लिङ सितफनुस मिनु इत फोबलङक तोइ। सिङ मी पङ दोरा एपो लई तोइ। संखमा जिवास दोरा गोप सोततिङ नङ अला हुशार लऊ पिनु तोइ। सितफनुसुस गोप चमत्‍कार लऊ तोइ। ओसपरिङ दोगुस यीशुउ थोरिङ दैङ लमा शितिङ दोपङरा लफु दत गोप मी पङक दोऊ थोरिङ दैङ लऊ।

इ दयार, सितफनुस यीशुऊ बारे मी पङरा लोऊ तोइ, अला गटो ओशि यहूदी पङ तु दोपङक यीशुऊ थोरिङ दैङ मालऊ अला दोनङ ञमफौ थांशमा तिखु। दोपङ हत छिङना तंऊ, ओदोक दोपङ पुजारी गोबा पोऊरा जेऊ अला दौऊ बारे कवश लोऊ। दोपङक लोऊ ,”निङपङक सितफनुस रा मूसा नङ परमेश्वरु बारे हलम कमचित लोइ गोऊ।“ ओदोक पुजारी गोबा पङक सितफनुस रा चुमु पिनु अला दोरा महायाजक नङ यहूदी पोऊ गोबा पोऊ तुसिङ कयुफु तु। अला लि कवश गवा पङ तु अला दोपङक सितफनुसु बारे कवश लोऊ।

महायाजकुस सितफनुस रा शुउ, ”छे जि मी पङ कन बारै दिमलेओ रिंऊ तशा?” सितफनुसुस महायाजक रा जवाब खैमा शितिङ गोप कमचित पङ लोमा तिखु। दोगुस लोऊ कि अब्राहमु टेमु थलतो यीशूउ टेम शम परमेश्‍वरुस इस्‍त्राएलु मी पोऊ शितिङ गोप लेन लमिन तोइ। दत लि मी पङक अमबोरो परमेश्‍वरुस रिङमिन दो मागोऊ। सितफनुसुस लोऊ, ”किमपङ परमेश्‍वरु खिलाफ जिदद लऊ अला बगावत लइ पङ तोश। किमपङक अमबोरो संकमा जिवा रा मागिनु, हले ऊलपोऊ गनमो-गतपो पङक ओमबोरो संखमा जिवा रा मागिनि लोऊ अला दयारो दोऊ भविष्‍य लोऊ सा पङरा सतु पिनु तोइ। दत दोपङक छे लि लऊ दोऊ बसकयङ किमपङक अला लि हलम लऊ । किमपङक मसीह रा सतु पिनु।

दत दो दोरोमु गोबा पङक जि गोऊ, दत दोपङ ओनचे छिङना तंऊ कि दोपङक एनु रेपङ रा बोनत लऊ पिनु अला गोप शेच्‍चन हरो टऊ। दोपङ सितफनुस रा डपु देशङुस दकपा कयुफु जेऊ अला दोरा सतमा शितिङ दोरा रागुस तोंऊ।

ओसपरिङ सितफनुस सिऊ तोइ, दो हरो टऊ, ”हे यीशु, अङ जिवा रा कयुफु जो।” दत दो एनु पुशपङ चुऊ बरिन जेऊ अला हेलि हरो टऊ,“ हे प्रभु, जि पाप दोपोऊ थोरिङ मापिनमा।“ दत दो सिऊ जेऊ।

ओदो दयार, यरूशलेमु पोसि गोप मी पङक यीशुउ चेला पङरा ङनचेन लमा तिखु, ओदोक विश्‍वासी पङ अलित जागऊ रोऊ जेऊ। ओदो बसकयङ लि, अमा लि दोपङ जेऊ दोपङक यीशुउ बारे मी पङरा लौऊ।

फिलिप्‍पुस मिनु यीशुउ इत विश्‍वासी तोइ। हले या अलित गोप विश्‍वासी पङक ओशि लऊ तोइ दो लि यरूशलेमुस रोऊ जेऊ। दो सामरिया जागा फौक जेऊ। ओदा दोगुस मी पङरा यीशुउ बारे लोऊ। गोप मीपङक दोऊ थोरिङ दैङ लऊ अला मुक्‍ति पोरतु। इ दयार, फिलिप्‍पुसु रा परमेश्‍वरु तरफुस इत स्‍वर्गु मी तु अला दोरा जंगलु जेमा शितिङ, इत ओमपु विनमा शितिङ लोऊ। फिलिप्‍पुस ओदा जेऊ पिनु। दत दो ओमपु विनु जेऊ तोइ, दत दोक इ मी रा एनु बेशोखु थोरिङ जेइ तंऊ। जि मी कूश देशु इत ओफसोर तोइ। संखमा जिवा गुस फिलिप्‍पुस रा लोऊ कि दो मी नङ ञमफौ- ञमफौ विनमा।

ओदोक फिलिप्‍पुस बैशोखु तुसिंङ जेऊ। दोक गोऊ कि दो कूशी परमेश्‍वरु वचन रा लफु तश। छे यशायाह भविष्‍य सेसि साक चेमिन तोइ दो दोरा लफु तोइ। दो लफु तोइ, ” दो दोरा शुपमा तेतु खौता कयुफु जेऊ, अला हले इत करात तमना पोसि, दोगुस लि छोयो माचलु। दोपङक दोनङ ञमफौ हत हलम लऊ अला दोरा मडामा लऊ। दोपङक दोरा सतु पिनु।”

फिलिप्‍पुसुस दो कूशी रा शुउ, ”ओइ का लफु तोन छे का दोरा सोमजतु लि तोना?“ दो कूशी ओफसरुस जवाब खेऊ, ”मेन। तशपा शम ऊङि अङरा समजासतो, दत शम ग जीरा मासोमजति। ओरछै अङरा तु पोस अला अङरा सोमजास । यशायाह जि एनु बारे चेऊ आ कि ऊङि अलितु बारे?”

फिलिप्‍पुस बैशोखु थोरिङ शोखु। दत दोगुस दो कूशी औफसर रा ओदो वचन सोमजऊ दो यशायाह गुस यीशूउ बारे चेमिन तोइ। फिलिप्‍पुस गुस परमेश्‍वरु वचनु गोप अलित हिसा पोऊ लि चर्चा लऊ। ओशि यो, दोगुस दो मी रा यीशुउ बारे एपो फरिनतन लोऊ।

फिलिप्‍पुस नङ दो कूशी विनु तिऊ तुसिङ पुतु। दो कूशीस ओफसरुस लोऊ, ”खौन। ओया ती तश। छै ग संखमा तिऊ डुबकी तिऊ आ?” अला दोगुस बैशोख चलई सा रा टेखयामा शितिङ लोऊ।

दत दोपङ तिऊ नंऊ जेऊ पिनु, अला फिलिप्‍पुस गुस दो कूशी रा संखमा तिऊ डुबयतमा खेऊ।दत दोपङ तिऊ दकपा हनतु, दत संखमा जिवा अचानक ओ फिलिप्‍पुस रा थुऊ अलित जागऊ कयुफु जेऊ। ओदा फिलिप्‍पुस गुस मी पङरा यीशूउ बारे लोऊ पोसु।

दो कूशी एनु कयुमु जेमा शितिङ होमशित जेऊ पोसु। दो हत गरीस तोइ कि दो छङ यीशु रा सेसि तोइ।