46. पौलुस मसीहऊ विश्‍वासी वंऊ जेइ।

शाऊल मिनु इत मी तोइ दोगुस यीशुउ थोरिङ दैङ मालऊ तोइ। ओसपरिङ दो शरा तोइ, दत दोगुस सितफनुस रा सति मी पोऊ गस्‍कुला पङरा शुंऊ तोइ। ज्ञपतिङ, दोगुस विश्‍वासी पङरा हत ङनचेन लऊ तोइ। दोगुस यरूशलेमु कयुमु- कयुमु जेऊ फौबलङक नङ योबलङक रा चुमु जैलु पिनु तोइ। ओसपरिङ महायाजकुस शाऊल रा दमिश्‍क नगरु जैमा शितिङ लोऊ। दोगुस ओदतु मसीही पङरा चुमु सुमा अला दोपङरा पोलठऊ यरूशलेम कयुफु तुमा शितिङ शाऊल रा लोऊ।

ओदोक शाऊल दमिश्‍क जेमा शितिङ जुराशु। दो नगरु पुतमऊ मोच्‍चे होमशित, दोऊ नोपा-जिपा अला नमुत इत छति लाइट चमकयतु, अला दो मटङु थोरिङ दतु तु। शाऊलुस ऊङिरा लोइ गोऊ, “हे शाऊल। हे शाऊल। का अङरा छु ङनचेन ललसु तोन?” शाऊलुस शुउ, “हे प्रभु, का ऊङ तोन?” यीशुस दोरा जवाब खेऊ, “ग यीशु तोक। का अङरा ङनचेन ललसु तोन।”

ओसपरिङ शाऊल अनतु दत दो तंङमा मालिइ तोइ। दोऊ पङगोत पङक दोरा दमिश्‍क कयुफु जेऊ। शाऊलुस हुम दयार शम छोयो माजऊ अला मातुंऊ तोइ।

दमिश्‍कु हनन्‍याह मिनु यीशूउ इत चेला तोइ। परमेश्वरूस दोरा लोऊ, “ओदो कयुंमु फौक जो ओदा शाऊल पोसमिन तोइ। रंऊ गुत रा दोऊ थौरिङ तऊ दत दो हेलि खौनमा लीरो।” दत हनन्‍याहस लोऊ, “हे प्रभु, गस गोऊ कि जि मीस विश्‍वासी पङरा हले ङनचेन लऊ।” परमेश्वर दोरा जवाब खेऊ, जो। गस दोरा यहूदिऊ नंऊ अला अलित जातु मी पोऊ नंऊ अङ मिनु कत टामा शितिङ चुनऊ तोइ। दो अङ मिनु शितिङ हत कोषटङ तंइ।”

हनन्‍याह शाऊलु तुसिङ जेऊ, एनु गुत रा दोऊ थोरिङ तऊ, अला लोऊ, “गुस, छै ओया तुमा शितिङ कन ओमपु कनरा तङमा तु तोइ आ, अङरा कनरा पिनपिनसु छु लोननङ का हेलि तङमा लीरोन, अला संखमा जिवा कनरा पुंऊ पिनसतो।” हसल ओ शाऊल हेलि तङमा लिऊ, अला हनन्‍याहस दोरा संखमा तिऊ डुबयतमा खेऊ। दत शाऊलुस थकतु जऊ अला हेलि शेच्‍चन वंऊ जेऊ।

ओदत थलत, शाऊलुस दमिशकु पोसि पोऊ यहूदि पोऊरा लोमा तिखु। दोगुस लोऊ, “यीशु ओ परमेश्वरू छङ तश।” यहूदी मी पङ बिंऊ जेऊ, छु लोननङ शाऊलुस ता मोनई पङरा सतमा शितिङ जुराशु तोइ, छङ दोगुस यीशुऊ थोरिङ दैङ लऊ तोइ। शाऊलुस यहूदी पङरा तोङकमा लऊ। दोगुस कनु कि यीशु ओ मसीह तो।

गोप दयार ज्ञपतिङ, यहूदी पङक शाऊल रा सतमा शितिङ प्‍लान जुरऊ। दोपङक दोरा सतमा शितिङ नगरु पितङुरा मी पङरा पिनु। दो छे लऊ तश खौनमा लोऊ दत शाऊलुस दो प्‍लानु बारे गोऊ पिनु, अला दोऊ पङगोत पङ दत हनतु जेमा शितिङ दोऊ ओमेत लऊ। इ गोङक दोपङक दोरा पिलतु तऊ कयुमु बितिङुस ओपङ हनु पिनु। दमिश्‍कुस बचतु हनतु ज्ञपतिङ शाऊलुस यीशुउ बारे मीपङरा लोऊ ओ पोसु।

शाऊल मीपङरा छुशमा शितिङ यरूशलेम जेऊ, दोपङ दोऊरत बेइ तोइ। दत बरनबास मिनु इत विश्‍वासीक शाऊल रा मी पोऊरा कयुफु जेऊ। दोगुस दोपङरा लोऊ कि शाऊलुस हलै माबेऊ दमिश्‍कु मीपङरा लोऊ तोइ। दोऊ ज्ञपतिङ, मी पङक शाऊल रा लि मोनऊ।

तचे ता विश्‍वासी दोपङ यरूशलेमु ङनचेन लमऊ रत रोऊ जेऊ तोइ दोपङ वरि अंताकिया नगरु जेऊ पिनु अला यीशुउ बारे मीपङरा लोऊ। अंताकियऊ पोसि मी पङ खुचि यहूदी मातोइ तोइ, दत लि होमशित फेरा, दोपोऊ नंऊ गोप मी पङ विश्‍वासी वंऊ जेऊ। बरनबास नङ शाऊल ओइ सरपा विश्‍वासी पङरा यीशूउ बारे अला खुचि सिखयामा शितिङ ओदा जेऊ अला कलीसिया पङरा शेच्‍चन लऊ पिनु। यीशुउ थोरिङ विश्‍वास लई पङ होमशित फेरऊ अंताकियऊ ओ “मसीही” वंऊ जेऊ।

इ दयार, अंताकियऊ मसीही मी पङ वर्त नङ ञमफो परमेश्‍वर रा कोलङ लऊ तोइ। संखमा जिवास दोपङरा लोऊ, “अङ शितिङ बरनबास नङ शाऊल रा दो लेन लमा शितिङ खेचो लऊ पिनमा दोरा लोमा शितिङ गस दोपङरा कुतु तोइ। “ओदोक अंताकियऊ कलीसिया गुस बरनबास नङ शाऊल रा शितिङ परमेश्‍वर रा कोलङ लऊ अला दोपोऊ थोरिङ रंऊ गुत रा तऊ। दत दोपङक दोपङरा अलित गोप जागा – जागऊ यीशुऊ बारे एपो फरिनतन पिनमा शितिङ पिनु। बरनबास नङ शाऊल गुस खैचो- खैचो जातु मी पङरा लफु, अला गोप मी पङक यीशुउ थोरिङ दैङ लऊ।