47. फिलिप्‍पिऊ नगरू पौलुस नङ सीलास।

ओसपरिङ शाऊलुस सिङ रोमी राज्‍यु गुमयतु दत दोगुस एनु रोमी मिन “पौलुस” रा गिनमा तिखु। इ दयार, पौलुस नङ दोऊ पङगोत सीलास फिलिप्‍पी नगरु यीशुउ बारे एपो फरिनतन लोमा शितिङ जेऊ। दोपङ देशङु दकपा समुंद्ररङु थोचलङ इ जागऊ रा जेऊ ओदा मी पङ परमेश्‍वर रा कोलङ लमा शितिङ कटठा तोइ। ओदा दोपङ लुदिया मिनु इत योबलङक रा छुशु दो इत व्‍यापारी तोइ। दो परमेश्‍वर रा बेन्नङ लइ तोइ अला अराधना लइ तोइ।

परमेश्‍वरुस लुदिया रा यीशुउ बारे फरिनतनु थोरिङ दैङ लमा शितिङ लोऊ। पौलुस नङ सीलासुस दोरा नङ दोऊ पेरङ पङरा संखमा तिऊ डुबयतमा खेऊ। दोगुस पौलुस नङ सीलास रा एनु कयुमु पोसमा शितिङ कुतु तोइ, ओदोक दोपङ ओदा पोसु पिनु।

पौलुस नङ सीलास मी पोऊरत अमबोरो ओदो जागऊ छुशि तोइ ओदा यहूदिऊ मी पङ परमेश्‍वर रा कोलङ लई तोइ। दयारो ओसपरिङ दोपङ ओदा जेइ तोइ दत इत नुकुर योबलङक दो हलम जिवास छुश्‍मिन तोइ दोपोऊ ज्ञपतिङ तुइ तोइ। ओइ हलम जिवा गुस ओ दो मी पोऊ भविष्‍य लोइ तोइ, ओदोक दो भविष्‍य रिंइ सेऊ रूअङु एनु गोबा पङरा शितिङ रूपया कमयई तोइ।

दोपङ जेमा परिङ जि नुकुर योबलङक पङ हरो टइ तोइ, “जि योबलङक थोनतु चेइ परमेश्‍वरु सेवक तोइ। जि किमपङरा मुक्‍ति पोरतमा शितिङ ओमप कनकनसु तश।” दो दयारो ओशि लई तोइ कि ओदोगुस पौलुस खरोसु जेऊ।

गोप ज्ञपतिङ, इ दयार दत दो नुकुर योबलङकुस हरो टऊ, दत पौलुस गुस दोऊ फौक ठुरतु दोऊ नंऊ हलम जिवा रा लोऊ, “यीशुउ मिनुस जिऊ रत हनतु जो।” ओदोसपरिङ ओ ओदो हलम जिवास दोरा सोठऊ पिनु।

ओदो नुकुर योबलङकु गोबा हत छिङना तंऊ। दोपङरा पता लगयतु कि दो हलम जिवा मतोननङ दो नुकुर योबलङक मी पङरा भविष्‍य लोमा मलिइ तोइ। ओइऊ मतलब वंऊ कि मी पङ छङ दोऊ गोबा पङरा रूपया माखेइ, दोपङरा भविष्‍य लोइ कि दोपङ नङ ञमफौ छै वंइ।

ओदोक दो नुकुर योबलङकु स्‍वामी पौलुस नङ सीलास रा रोमी ओफसर पोऊरा कयुफु जेऊ। दोपङक पौलुस नङ सीलास रा तोंऊ,अला हे दोपङरा जेलु पिनु।

दोपङक पौलुस नङ सीलास रा जेलु ओशि जागऊ रा तऊ ओदा थोनतु खुचि सिपाही तोइ। या बसकयङ दोपङक दोपोऊ बङखौन रा सिङ चेइ टुकडास जोडऊ पिनु। दत लि, पौलुस नङ सीलास खनङ गोङकु बेलऊ, परमेश्‍वर रा कोलङ लऊ बजन लोउ तोइ।

लेम, इत बैमा थङक सङगुल तु। जेलु सिङ पितङ पङ खुलतु तु, अला सिङ कैदी पोऊ शङलङ खूलतु दतु जेऊ।

दत दरोगा अनतु। दोगुस तंऊ कि जेलु सिङ पितङ खुलतु तशे। दोगुस सुनचतु कि सिङ कैदी बचतु रोऊ जेऊ तोइ। दो बेऊ तोइ कि दोपोऊ रोमऊ लमिन रौमी ओफसर दोरा सतु पिनपिनसि, ओदोक दो एन रा यो सतमा शितिङ छसु तोइ। दत पौलुस दोरा तंऊ हरो टऊ, “रूकयत। रङरा नुकसान थलत। निङपङ सिङ ओया तोश।”

दो दरोगास करिंऊ पौलुस नङ सीलासु रा तुसिङ तु शुउ, “मुक्‍ति पोरतमा शितिङ ग छे लत?” पौलुसुस जवाब खेऊ, “प्रभु यीशुउ थोरिङ दैङ लत, दत का नङ कन पेरङ पङरा मुक्‍ति पोरततो।” दत दो दरोगा पौलुस नङ सीलास रा एनु कयुमु कयुफु जेऊ अला दोपोऊ जुकजेर पङरा ऊरू। पौलुसुस दोपोऊ कयुमु सिङ मी पङरा यीशूउ बारै एपो फरिनतन लोऊ।

दरोगा नङ दोऊ सिङ पेरङ पङ यीशुउ थोरिङ दैङ लऊ, ओदोक पौलुस नङ सीलासुस दोपङरा संखमा तिऊ डुबयतमा खेऊ। दत दरोगास पौलुस नङ सीलास रा थकतु खेऊ, अला दोपङ ञमफो गरीस सिऊ।

अलित दयार नगरु गोबा पङक पौलुस नङ सीलास रा जेलुस छुडायऊ पिनु अला फिलिप्‍पी गुस जेमा शितिङ लोऊ। पौलुस नङ सीलास लुदिया नङ अला तचे ता अलित पङगोत पङ नङ छुशु अला दोऊ ज्ञपतिङ नगरुस हनतु जेऊ। यीशुउ बारे एपो फरिनतन फैलतु जेऊ, अला कलीसिया खुचि वंऊ जेऊ।

पौलुस नङ अलित मसीही गोबा पङक गोप नगरु जेऊ। दोपङक मी पङरा यीशूउ बारे एपो फरिनतन लोऊ। दोपङक कलीसिया पोऊ विश्‍वासी पङरा खुश लमा शितिङ अला लफमा शितिङ गोप चिठी लि चेऊ। ओइ पोऊ नंऊ तचे ता चिठी बाइबलु किताब वंऊ जेऊ।