۱۸- تَقسیمی پادیشائیئی ایسرائیلی

داوودی پادیشائی، چِل سال بِنجییا. بَعدی ژو مَرگی، ژو پیر سُلِیمُن بِه پادیشائی بِرِسا خُدِه سُلِیمُنی پی واپِرسا: «مو پی چیچی مِگَه تا تَه دون؟» سُلِیمُنی خُدِه پی گییا کو حِکمِت ژو دِه. ژو اِن خواستَه، خُدِه خُشال واکِرد ژو داناتِرین میردی دیمی زِمینی کِردِش. سُلِیمُنی چیزائی زیادی یِگیت، پادیشائی عَقلِه‌مِندی با خُدِه ژو مالداری گَتِهای کِرد.

سُلِیمُنی دِلَه شَری اورشَلیمی مَعبِدی بِسات کو داوودی ژو مِصالَه جور کِر با. اون وَخت پی مِلِت مِزُنِش بِه جایی چادِری مُلاقاتی، اونجو عِبادِت هاکِرِه. قُربُنی هاکِرِه، خُدا دَنین مَعبِد دَبا وُ با قُوْمی زَندِگی ماکِردِش.

اَمّا سُلِیمُنی اینی طِبایِه پی جِنییَه بِبِرد. ژو تَقریباً هِزار جِنی بِبِرد. اِنطُوْری با کو خُدِه پی وِرگِردا. ژو جِنی خِیلی غَریبِه بِن و پِرِستِشی رَه، هُشتُن هُمپا، بُتی بییاربیشُن. وَختی کو سُلِیمُن پیر بِبا، هُشتُن جِنییُن بُتی پِرِستِش ماکِردِش.

هَمِنی بالا خُدا ژو پی خَشمگین بِبا وُ ژو رَه باتِش: بِرائی مُجازاتی اِن بیاِطاعِتی، پادیشائیئی ایسرائیلی بَعدی مَرگی ژو دو اِسَّه مِکِرِه.

بَعدی مَرگی سُلِیمُنی، ژو پیر رِحُبام بِه جایی ژو، پادیشاه بِبا. تَمُمی ایسرائیلی جَمَه بِبِن کو ژو بِه عُنوانی پادیشائی قَبیل کِرَن اونُن رِحُبامی گَل شِ کِایِت هاکِرشُ نِ کو سُلِیمُنی زیاد ژُن کاری مِشِش، مَجبور بیشَن مالیاتی زیادی هادَن. اونُن ژو پی گییا کو هُشتُن پییِر واری سَختگیر نَبو.

اَمّا رِحُبامی اَحمِقانَه ژُنَه بات: «شِما فِکر ماکِرین مو پییِر سَختگیری ماکِرچی؟ وَلی اَ شِما ویشتِری کاری مِنجون و شِما عِذاب مِدون.»

بَعدی ژو هِکاتُن، خِلییُن شیلُن بِت، دَس طِبایِه ژو پی سیوا وابِن. فَقِد دو طِبایِه بِه ژو وِفادار بِمُندین و هُشتُن پادیشائی اِسم یَهودا واششُن.

دَس طِبایِهای دیگِری، میردی بِه اِسمی یِرُبعامی هُشتُن پادیشاه کِرشُن. کو طِرِفی شِمالی سَرزِمینی ساکِن بِن. هُشتُن پادیشائیای ایسرائیل قَلَمداد کِرشُن.

یِرُبعامی خُدِه قَبیل نِدِرد و باعِث بِبا مِلِت بِه طَرِفی گُنایی بَشو. ژو دو بُتی بِسات و مِلِتی رَه باتِش ژُن پِرِستِش هاکِرَن. اونی دیگِر پِرِستِشی رَه، اوشَلیم کو پادیشائی ای یَهوِه با مَنِشِن.

پادیشائیای یَهوِه وُ پایشائیای ایسرائیلی دونیک بِبِن هَمیشَه با هُمدیگِر مِجِنگِن.

پادیشائیای ایسرائیلی کو جَدید بِن، هَمَه شَرّی بِن. ویشتِری اونی کو مِگییِشُن پادیشائی هُشتُنی کِرَن، کُشتَه بِبِن.

تَمُمی پادیشائی و ویشتِری مِلِت بُتُن عِبادِت ماکِرشُن. وَختی بُتُن پِرِسِش ماِکِرشُنِ، با مَعروفُن خُفت و خُوْ ماکِرشُنِ و حَتّی زِکُن، بُتُنَه قُربُنی ماکِرشُن.

پادیشائی یَهودِه نَسلی داوودی پی بِن. بَعضی اون پادیشِه آدِمائی خُوْری بِن. با عِدالِت حُکومِت ماکِرشُن و خُدِه پِرِستِش ماکِرشُن اَمّا پادیشائی یَهودِه ویشتِری شَرّی بِن. بَعضی حَتّی زِکُن بُتُنَه قُربُنی ماکِرشُن. ویشتِری یَهودِهای خُدِه پی وِرگِردِن و اینی خُدِه پِرِستِش ماکِرشُن.