10. दस मुसीबतौ

पौरमेशवरै मूसा औरौ हारून कै चेतावणी दी कै फिरौन हठीला हौए जांदा। जोबै सै फिरौन कै धौरे हौटे तौ तिनुऐ बौल़ौ, इस्राएल का पौरमेशवर ऐशैकै बौल़ौ, ‘मैरै लौगौ कै जाणौ दै!’” पौरौ फिरौने तिनकी ना शुणी औरौ इस्राएलियो कै आज़ाद कौरणौ कै बौजेह तैणै तिनुकै हौजौ बै जादा कठोर काम कौरणौ कारिए मजबूर कौरे।

फिरौन तिनु लौगौ कै आज़ाद कोरणौ कै रोज भाजदा रौआ, इथकारिए पौरमेशवरै मिस्र देश पांदी खतरनाक मुसीबतो छाड़ी। इनु मुसीबतो लैई, पौरमेशवरै फिरौन कै दैखौऊं कै सै फिरौन औरौ मिस्र देश कै देवतांओ शै जादा शोकतीशाली औसौ।

पौरमेशवरै नील नौंदी कै लोई मुंजी बौदले दै, पौरौ फिरौने इबी बै इस्राएलियो खै जाणौ ना दी।

पौरमेशवरै पुरै मिस्र दैश दै मैंढ़कै छाड़ै। फिरौने मैढ़कै बौगाणो कै मूसा कैंईदै बेनते कौरे। पौरौ सोबी मैढ़कै कै मौरणौ कै बाद, फिरौने आपणै मन कै कठोर कौरे दिया औरौ इस्राएलियो कै मिस्र देश शै जाणौ ना दी।

इथकारिए पौरमेशवरै माच्छरौ कै मुसीबत छाड़ै। तिथकै बाद तैणै ओडगाल़ौ कै मुसीबत छाड़ै। फिरौने मूसा औरौ हारून कै बौईदै औरौ तिनुकै बौल़ौ कै जै तुऐं इनु मुसीबतो कै रोके दैंव तौ इस्राएली लौग मिस्र देश कै छौड़ेबा जाए सौकौ। जोबै मूसाए प्रार्थना कौरे तौ पौरमेशवरै मिस्र देश पौरेशै ओडगाल़ौ कै हौटाए दिऐ। पौरौ फिरौने आपणा मन हौजौ बै कठोर कौरे दिया औरौ तिनु लौगौ कै आज़ाद हौएबा जाणौ ना दी।

इथकै बाद, पौरमेशवरै मिस्र देश कै सोबै पाल़ेयोंदै गौरू कै बीमारी दै मौरणौ दिऐ। पौरौ फिरौन का मन तोबै बै कठोर ही थिया औरौ तैणै तिनुकै आज़ाद ना कोरी।

तोबै पौरमेसवरै मूसा कै फिरौन कै सामणै बागुरै दौ खैऊड़ फ़ैरकाणौ कारिए बौल़ौ। जोबै तैणै ऐशैकै कौरौ तौ मिस्र देश कै लौगौ की चामड़ी पांदी पीड़ौ दैणौ वाल़ै गुमड़ हौए गौवे, पौरौ इस्राएलियो कै किछै ना हौई। पौरमेशवरै फिरौन कै मन कै कठोर कौरे दिया, औरौ फिरौने इस्राएलियो कै आज़ाद हौएबा जाणौ ना दी।

इथकै बाद, पौरमेशवरै शोरू बोरशाए औरौ मिस्र देश कै आधे दै जादा शाक नाश कौरे दै औरौ जू कुणिए बै बाएरे निकल़ा सै मौरे गौआ। फिरौने मूसा औरौ हारूनो कै बौईदै औरौ तिनुकै बौल़ौ, “मौंऐ पाप कौरे राए। तुऐं जाए सौकौ।” औरौ मूसाए प्रार्थना कौरे, औरौ गौयणै पौरेशै शोरू बौरशौणै बौन्द हौए गौवे।

पौरौ फिरौने ओटेयो पाप कौरा औरौ आपणै मन कै कठोर कौर दिया। औरौ तैणै इस्राएलियो कै आज़ाद हौएबा जाणौ ना दी।

औरौ पौरमेशवरे मिस्र देश पांदी चिचल़े कै डार आणौ दै। औरौ इनु चिचल़े सैजै सोबै शाक खाए पाए, जु शोरू लैई बौच रौए थै।

तोबै पौरमेशवरै इनारौ कौरे दियु जू ती दुसौ तौड़ी रौ। ऐजौ ऐतोनो पोटंग इनारौ थियु कै मिस्र देश कै लोग आपणै घौरौ पौरेशै बायरे ना निकल़ी। पौरौ जिथै इस्राएली लौग रौंव थिऐ तिथै पेयाशौ थियु।

इनु नोई मुसीबतो कै बाद बै, फिरौने इस्राएलियो कै आज़ाद हौएबा जाणौ शै मना कौरे दियु। जिथुकै फिरौने ना शुणी इथकारिए पौरमेशवरै ऐक आखरी मुसीबत छाड़नो कै तरकीब बाणै। इथकै बाद फ़िरोन का मन बोदल़े गौआ।