9. पौरमेशवर मूसा कै बौईदौ

यूसुफो कै मौरणौ कै बाद तैसकै सोबै रिशतेदार मिस्र देश दै बौसे गौवे। सै औरौ तिनकै वंशज कैई सालो तौड़ी मिस्र देश दै ही रौवे औरौ तिनुऐ बौरिशी ओलाद पोयदा कौरे। औरौ तिनु इस्राएली बौल़ौ थिए।

कैई शौई सालो कै बाद, इस्राएली लौगौ कै गिणती बैजाए बौढ़ गौए थै। औरौ मिस्र देश कै लौग ऐबै इयौं बातौ का सान नै मानो थिऐ कै तिनकै मदद कौरणौ कारिए यूसुफे बोहुत कुछ कौरे राए थियु। सै इस्राएली लौगौ शै डोरे गौवे जिथुकै सै गिणती दै तिनुदै बैजाए जादा थिऐ। इथकारिए तैसी सोमय मिस्र देश पांदी राज कौरणौवाल़ै फिरौने इस्राएली लौगौ कै मिस्र लौगौ कै दास बाणै दिए।

मिस्र देश कै लौगै इस्राएली लौगौ लैई बौरिशी ऊंची मौंजिलौ औरौ इथै तौड़ी कै कैई नगरौ कै बाणणौ कारिए मजबूर कौरे। तैसी चैईंथै कामै तिनकै जिन्दगी कै बौड़े दुखवाल़ै बाणै दै, पौरौ पौरमेशवरै तिनुकै आशीष दै औरौ तिनकै हौजौ जादा ओलाद पोयदा हौऐ।

फिरौने दैखौ कै इस्राएली लौगौ कैई बैजाए ओलाद पोयदा हौंदे लागै रौए, इथकारिए तैणै आपणै लौगौ कै आदेश दैए राए थिया कै इस्राएलियो कै सौबी नानड़ै भैईया कै नील नौदी दै फेंरकाऐबा मारे दैया।

ऐक खास इस्राएली बैटमाणिशै ऐक नानड़े भैईया कै जन्म दिया। तियैं औरौ तिंयारै घौरवाल़ै जिशैक तिनकै कौरियु तैसी भैईया कै चौरेयो राखा।

जोबै तैसी भैईया कै मां-बापू कै तैसी हौजौ कौथी ना चुरी, तौ तिनुऐ तैसी कै मौरणौ शै बौचाणौ कारिए ऐक तिरणौवाल़ै टौपरे दा नील नौदी कै किनारे पांदी शरकाड़े मुंजी राखै दिया। तैसकै बौड़े बौईणिऐ ऐजौ दैखौ कारिए तैस पांदी नोजर राखै कै तैसकै साथै का हौंदौ।

फिरौन कै बैटीए तियौं टौपरे कै दैखेबा तिथकै भीतरै देखो जोबै तियें तिथु नानड़िया दैखौ तौ तियें तिथु नानड़िया कै आपी खै राखौ। तियें ऐक इस्राएली बैटमाणिशौ कै तिथु दूध पियाणौ कारिए कामौ पांदी राखै दै, ऐजौ जाणै बिना कै सै तिथु नानड़िया कै ओसले मां औसौ। जोबै सैजौ नानड़िया ऐतरौ बौड़ौ हौए गौ कै ऐबै तिथुकै आपणै मां कै दुधौ कै जौरुरत नै थी, तौ तियें फिरौन कै बैटी कैई तैसी दैए दिया, औरौ तैसकौ नांव मूसा थियु।

ऐक दुस, जोबै मूसा बौड़ा हौए गौवा, तौ तैणै दैखौ कै ऐक मिस्र देश का आदमी ऐकी इस्राएली आदमी कै पिटे लौआ। मूसाए आपणै साथौ कै इस्राएली भाई कै बौचाणौ कै कोशिश कौरे।

जोबै मूसाए सुंचु कै तैसी कै कुणिए ना दैखदै तौ तैणै तैसी मिस्री आदमी कै मारै दिया औरौ तैसकै लाश कै दोबाए दै। पौरौ मूसाए जू कौरे राए थियु तिथु कुणिए दैखै पौंव थियु।

फिरौनौ कै पौता चाले गौआ कै मूसाए का कौरे राए। तैणै तैसी मारणौ कै कोशिश कौरे, पौरौ मूसा मिस्र देश पौरेशा जौंगलौ पुंडा दौड़े गौआ। फिरौन कै सैनिकौ कै तैसी तिथै जुईं ना।

मिस्र देश शै दूर जौंगल दा मूसा ऐक चोरेईया बौणै गौआ थिया। तैणै तिथै ऐकी बैटमाणिशो आरी जाजड़ा बाणै पौआ औरौ दो बैटे पोयदा कौरे।

मूसा आपणै शौऊरै की भेड़ों कै झुंड़ो कै दैखभाल़ कौरौ थिया। ऐक दुस, तैणै बोल़ेयोंदी झाड़ी दैखी जू बिना फुकिये बोल़ै रौई थी। तिथु दैखणो कारिए सै झाड़ी कै नैड़िक हौटा। जोबै सै तिथु झाड़ी कै बिलकुलैई नैड़िक आए गौवा तौ पौरमेशवरै तैसयारी बातौ कौरी। तैणै बौल़ौ, “औए रै मूसा, आपणै बूट ऊँडै खुल़। तू ऐकी पवित्र ठांव पांदी खौड़ा औसौ।

पौरमेशवरै बौल़ौ, “मौंऐ आपणै लौगौ कै दुख दैख राए। हांव ताखै फिरौनौ कै धौरे छाड़दा ताकि तू इस्राएली लौगौ कै मिस्र देश कै गुलामी शै छुड़ायो लेयाए। हांव तिनुकै कनान देश दैंदा, जिथका मौंऐ अब्राहम, इसहाक औरौ याकूब आरी वादा कौरे राए।

मूसाए पुछु, “जै लौगै जाणणौ चौऊं कै मौखै कौणै छाड़ै राए तौ हांव का बौल़दा?” पौरमेशवरै बौल़ौ, “जू हांव औसौए सै औऊं औसौए, तिनुकै बौल़ेया, ‘मौंऐ ताखै तौंवारै धौरे छाड़ै राए।’ तिनुकैई ऐजौ बै बौल़ेया, ‘हांव तौंवारै पुराणिया अब्राहम, इसहाक औरौ याकूब का पौरमेशवर यहोवा औसौ।’ मैरौ ऐजौ नांव हमैशा कौ औसौ।”

मूसा डौरौ थिया औरौ फिरौनौ कै धौरे जाणौ नै चांव थिया जिथुकै तैणै सुंचु कै मैरे ठीक शै ना बौल़ैईयों, इथकारिए पौरमेशवरै मुसा कै भाई, हारून, कै तैसकै मदद कौरणौ कारिए छाड़ा।