8. पौरमेशवर यूसुफ औरौ तैसकै कुड़बै कै बौचांव
कैईं सालो कै बाद, जोबै याकूब बूढ़ा हौए गौआ, तौ तैणै आपणै प्यारे बैटे यूसुफ कै तैसकै भाईड़ी कै जाँच पोड़ताल़ कौरणौ कारिए छाड़ा जिनुवे पशु कै झुंड़ौ कै दैखभाल कौरे लौए थै।
यूसुफ कै भाएड़ै तैसीकै रिशांव थिऐ जिथुकै तिनका बापू तैसयारी जादा प्यार कौरौ थिया औरौ इथकारिए बै कै यूसुफे सुईणै दौ दैख राए थियु कै सै तिनपांदी राज कौरणौवाल़ा हौऐ जांदा। जोबै यूसुफ आपणै भाईड़ी कै धौरे औआ तौ तिनुऐ तैसीकै कौयदै बाणै दिया औरौ तैसी कै दासो का बौयपार कौरणौवाल़ै कै बैकै दिया।
घौरौ कै पाछु आणौ दै आगै यूसुफ कै भाईड़िऐ यूसुफो कै खौटणौ कै चेरेबा बाकरी कै लौई मुंजी भिजौए दिए। तोबै तिनुऐ सैजै खौटणौ आपणै बापू कै दिखौऊंऐ ताकि सै ऐजौ सुंचौ कै कौसी जौंगलै जानवरे यूसुफ कै मारे दिया। याकूब बैजाए दुखी थिया।
दासो का धाँदा कौरणौवाल़ै सैजै लौग यूसुफ कै मिस्र देश लौए गौवे। नील नदी कै किनारे पांदी बौसेयोंदा मिस्र ऐक विशाल औरौ शोकतीशाली देश थिया। तिनु दासो का धाँदा कौरणौवाल़ै यूसुफ कै सैठ सरकारी ओधिकारी कै दास कै रूप दा बैकै दिया। यूसुफे आपणै मालिकौ कै आछी तरह शै सेवा कौरे, औरौ पौरमेशवरै यूसुफ कै आशीष दै।
तैसकै मालिक कै घौरवाल़ीए यूसुफवारी सुतणौ कै कौशिश कौरे, पौरौ यूसुफ ऐशैकै पौरमेशवरौ कै खिलाफ पाप कौरणौ कै भाजै गौआ। सै गुस्सा हौऐ औरौ यूसुफ पांदी झूठा इलजाम लाए दिया, इथकारिए तैसी गिरफ्तार कौरेबा कोयदै दा डाल़े दिया। इथै तौड़ी कै कौयदखाने दा बै, यूसुफ पौरमेशवर कै प्रति साचा रौआ, औरौ पौरमेशवरै तैसी आशीष दै।
दु सालो कै बाद, यूसुफ इबी बै कौयदखाने दा थिया, जोबैकि सै बेगुनाह थिया। मिस्री लौग राजा कै फिरौन बौल़ौ थिऐ, तिनिए दो सुईणै दैखै जिनुऐ तैसी कै बैजाए बैचेन कौरे दिया। तैसका कुणजाई बै सलाह दैणवाल़ा तैसीकै तिनु सुईणै का मतलब ना बौताए सौकी।
पौरमेशवरे यूसुफ कै सुईणै का मतलब बौताणौ कै सौमझ दैए राए थै, इथकारिए फिरौनै यूसुफ कै कौयदैखाने पौरेशा आपणै धौरे बौईदा। यूसुफै तैसी कै तिनु सुईणै का मतलब बौतौऊंवा औरौ बौल़ौ, “पौरमेशवर शाको कै बरकत वाल़ै साती सालो कै बाद काल़ो कै सात साल भैजणोवाल़ा औसौ।”
फिरौन यूसुफ शै इशैक खुश हौआ कै तैणै तैसीकै मिस्र देश का दुजा सौबी दा शौकतीशाली मौरद बाणै दिया।
यूसुफै लौगौ कै शाको कै आछी पैदावार होणो वाल़ै सात सालो कै बीतरे बौड़े तादाद दै शाको कै जोमा कौरणौ कारिए बौल़ौ। जोबै साती सालो का काल औआ तौबे यूसुफै लौगौ कै सैजै शाक बिकै ताकि तिनुकैई बौरिशौ खाणौं कारिए हौंव।
ऐजा काल सिरफ मिस्र दा ही नै, पौरौ कनान देश दा बै खतरनाक थिया जिथै याकूब औरौ तैसका कुड़बा रौंव थिया।
इथकारिए याकूबै आपणै सौबी दै बौड़ै बैटे खै खाणौ मोले लौणौ कारिए मिस्र देश कै छाड़ै। जोबै सै खाणौं मोले लौणौ कारिए यूसुफ कै धौरे खौड़े हौऐ तौ तिनु भाईड़िऐ यूसुफ कै ना पौछियाणी। पौरौ यूसुफै तिनुकै पौछियाणै पाए।
ऐजा पौता कौरणौ कारिए कै का सै बौदले गौवे तिनुकै पौरखौणौ कै बाद, यूयुफै तिनुकै बौल़ौ, “हांव तौंवारा भाएड़ै औसौ! डौरेया नै। जोबै तुऐं मौखै दासौ कै रूपौ दा बैकै राए थिया तौ तुऐं बुरू कौरणौ कौ ठाणै राए थियु, पौरौ पौरमेशवरै तियौं बुराई कै भोलाई दै बौदले दै! ऊंडे आव औरौ मिस्र देश दै रौंव ताकि हांव तुऔं औरौ तौंवारै कुड़बै कारिए खाणौं का इतंजाम कौरे सौकु।
जोबै यूसुफ कै भाएड़ै पाछु घौरौ कै औऐ औरौ आपणै बापू याकूब कै बौतौऊं कै यूसुफ इबी बै जियुंदी औसौ तौ सै बैजाए खुशी हौए रौआ थिया।
जोबकै याकूब ऐक बूढ़ा आदमै थिया तोबै बै सै आपणै पूरै कुड़बै कै साथै मिस्र कै हौटे गौआ, औरौ सै तिथै बौसे गौवे। याकूबौ कै मौरणौ दै आगै, तैणै आपणै सौबी बैटे कै आशीर्वाद दिया।
कौरारौ का सैजा वादा जू पौरमेशवरै अब्राहमवारी कौरे राए थिया सै इसहाकौ पांदी औरौ तैसकै बाद याकूब, औरौ तिथकै बाद तैसकै बारौई बैटे पांदी औरौ तिनकै कुड़बै पांदी आए गौआ थिया। तिनु बारौई बैटे कै पीढ़ी इस्राएल कै बारौ गोत बौणै गौऐ।
उत्पत्ति अध्याय 37-50 पौरेशै बाइबल कै ऐक काहाणै
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।