11. फसह कौ तैंयार

पौरमेशवरै मूसा औरौ हारून कै फिरौन कै धौरे ऐजौ बौल़णौ कारिए छाड़ै कै इस्राएली लौगौ कै जाणौ दै। तिनुऐ तैसी कै चेतावणै दै कै जै सै तिनुकै जाणौ नै दैला, तौ पौरमेशवर मिस्र देश कै लौगौ औरौ जानवरो कै सोबै पहलौठै कै मार दैंदा। फिरौन ऐजौ शौणैबा बै पौरमेशवर पांदी बिशवाश कौरणौ औरौ तैसकै बात मानणौ शै भाजै गौआ।

पौरमेशवरै तैसी पांदी बिशवाश कौरणौ वाल़ै कौसी कै बै पहलौठै बैटे कै बौचाणौ कारिए ऐक इंतजाम कौरा। सोबी कुड़बै कै ऐक निर्दोष गाबटु कै काटणो थियो।

पौरमेशवरे इस्राएली लौगौ कै तैसी गाबटु कौ लोई कौरेबा आपणै घौरौ कै दियोल़ी पांदी लाणौ कारिए बौल़ौ। तिनकै तिथकौ माँस बुजणौ थियु औरौ तिनकै अखमीरी रोटी कै साथै तिथु फुर्ती शै खाणौ थियु। तैणै तिथु खाणौं खाणौ कै बाद तिनुकै तावल़ैई मिस्र देश कै छौड़नो कै बै तैयार रौणौ कारिए बौल़ौ।

जैशैकै कौरणौ कारिए इस्राएली लौगौ कै पौरमेशवरै आदेश दिया औरौ तिनुऐ तिथकै हिसाब शै सोबै ठुँ कौरौ। आधी राते भीतरा, पौरमेशवर का दूत सोबी कै पहलौठे बैटे कै मारदै बैई मिस्र देश शै हौएबा हौटा।

इस्राएली लौगौ कै सौबी घौरौ कै द्वारौ पांदी लोई लाएयोंदौ थियु, इथकारिए पौरमेशवरै तिनु घौरौ कै छौड़ै दिऐ। तिनकै भीतरै कै सोबै लौग ठीक-ठाक थिऐ। सै गाबटु कै लौई लैई बौचे गौवे थिऐ।

पौरौ मिस्र देश कै लोगै पौरमेशवरौ पांदी बिशवाश ना कौरी औरौ तैसकै आदेशों कै ना मानी। इथकारिए पौरमेशवरै तिनकै घौरौ कै ना छुड़ी। पौरमेशवरै मिस्र देश कै सौबी पहलौठे बैटे कै मारै दिऐ।

कौयदखाने कै कौयदी कै पहलौठे तौड़ी, सोबै पहलौठे बैटे मौरे गौवे। आपणै नानड़िया कै पीड़ौ की बौजेह शै मिस्र कै बौरिशै लौग रौऐ रौवे थिऐ औरौ शोग बारे लौ थियु।

तियौंई राते, फिरौने मूसा औरौ हारून कै बौईदै औरौ बौल़ौ, “इस्राएली लौगौ कै नियौ तावल़ेई मिस्र देश पौरेशै आगु जांव!” मिस्र कै लोगै बै इस्राएली लौगौ शै तावल़ेई आगु जाणौ कै बेनते कौरे।