13. इस्राएली लोगौ कै साथै पौरमेशवरौ का कौरार
इस्राएली लौगौ कै लाल समुद्र कै पाईले ढौबौ कै जाणौ कै बाद, पौरमेशवर तिनुकै जौंगलो बाटी सीनै नांव कै धारौ कै ढौबौ लौए गौआ। ऐजै सैजै धार थै जिथै मूसाए जौल़ेयोंदी झाड़ी दैखै रैई थी। तिनु लौगै तियौं धारौ तौड़ी आपणै तोम्बु गाड़ै।
पौरमेशवरै मूसा कै औरौ इस्राएल कै सौबी लौगौ कै बौल़ौ, “तुऔं कै हौमेशा मैरी बातौ कै मानणी पौड़दी औरौ जू कौरार हांव तौंवारी कौरू तैसी बाणैयोंदा राखौ। जै तुऐं ऐशैकै कौरौ, तौ तुऐं मैरा इनाम बैशकिमती धन, पुरोहितौ का राज, औरौ ऐक पवित्र लोग ठौरदै।”
औरौ पौरमेशवरौ कै धौरे आणौ कारिए लोगै ती दुसौ तौड़ी आपी कै तैयार कौरे। तोबै पौरमेशवर सीनै धारौ की चुटी पांदी ऊदा उतरा। जोबै सै औआ तौ भौईचौल हौ, बिजली चमकै, धुंआ पौड़ा, औरौ तुरहियो का जौर शै शब्द हौआ। तोबै मूसा आपी ऊबा धारौ पांदी हौटे गौआ।
तोबै पौरमेशवरे लोगौ कै साथै ऐक कौरार कौरा। तैणै बौल़ौ, “हांव तौंवारा पौरमेशवर, यहोवा औसौ। हांव ही औसौ जैणै तुऔं कै मिस्र देश कै गुलामी शै छुड़ौऊऐ। कौसी औकी देवता कै पूजा नै कौरेया।”
मूरती नै बाणैया औरौ ना तिनकै पूजा कौरेया, जिथुकै हांव, यहोवा, तौंवारा ऐकैई पौरमेशवर औसौ। बुरे तौरीकै शै मैरौ नांव नै लौया। बिशांव कै दुसौ कै पवित्र मानणौ कारिए याद राखैया। छौ दुस आपणै सोबै काम कौरेया, सातवों दुस तुऔं कारिए बिशांव कौरणौ कौ औरौ मौखै याद कौरणौ कौ दुस औसौ।
“आपणै माँ औरौ बापू कै इज्जत कौरेया। खून नै कौरेया। गौलत सौमबंध नै बाणैया। चोरै नै कौरेया। आपणै पौड़ौशी कै घौरवाल़ी, तैसकै घौरौ का, औरौ तैसकै कियौंई बै चीज़ौ का लालच नै कौरेया।”
तोबै पौरमेशवरे इनु दस आज्ञा कै पात्थरौ की दु पाटड़ी पांदी लैखैबा मूसा कै दैए दी। पौरमेशवरै पालन कौरणौ कारिए लौगौ कै औके बै बौरिशै कानून दिऐ। जै तिनुऐ इनु कानूनौ का पालन कौरा तौ पौरमेशवरे तिनु लौगौ कै आशीष दैणौ औरौ तिनकै रौखवाल़ी कौरणौ का वादा कौरा। पौरौ तैणै बौल़ौ कै जै तिनुऐ इनु बातौ का पालन नै कौरी तौ सै तिनुकै सजा दैंदा।
पौरमेशवरे इस्राएली लौगौ शै ऐक बौड़ा तौम्बू बाणणौ कारिए बै बौल़ौ – मिलाप वाल़ा तौम्बू। तैणै तिनुकै ठीक-ठीक बौतौऊं कै ऐसी तौम्बू कै कैशैकै बाणणा, औरौ तिथकै भीतरै कुणजी चीज़ौ राखणी। तैणै तिनुकै तैसी तोम्बू कै दो कमरे बाणणौ औरौ बिचो दा ऐक बौड़ा पौड़दा बाणणौ कारिए बै बौल़ौ। पौरमेशवर तैसी पौड़दै कै पाछल़े कमरे दा आंदा औरौ तिथै रौंदा। जिथै पौरमेशवर थिया तैसी कमरे दै जाणौ कै इजाजत सिरफ महा यहूदी पुरोहित कै थै।
तिनु लोगौ कै तैसी मिलाप वाल़ै तौम्बू कै सामणै ऐक बेदी बाणणै पौड़दै। कुणिए बै जू पौरमेशवर कै कानून कै टालल़े सै तियौं बेदी पांदी ऐक जानवर कै लियालै। तोबै पुरोहित तिथु बल़ि चौढ़ाँदा औरौ बेदी पांदी पौरमेशवर कारिए बल़ि कै रूप दै जौल़ाँदा। पौरमेशवरे बौल़ौ कै तिथु जानवरौ कौ लौई तैसी आदमी कै पापौ कै खौटे दैंदा। ऐशैकैई, ऐबै पौरमेशवर तिनु पापौ कै ना दैखदा। सैजा आदमी पौरमेशवरौ कै नोजरौ दा “शुध्द” ठौरदा। पौरमेशवरै मूसा कै भाए हारून कै औरौ हारून कै वंश कै आपणै पुरोहित हौणौ कारिए चुणै।
पौरमेशवरै तिनु लोगौ कै जू नियम दैए राए थिऐ सै तिनका पालन कौरणौ कारिए माने गौवे। सै सिरफ पौरमेशवर कै लौग हौणौ कै औरौ सिरफ तैसकै आराधना कौरणौ कारिए माने गौवे।
कैई दुसौ तौड़ी, मूसा सीनै धारौ की चुटी पांदी ही रौआ। तैणै पौरमेशवरआरी बात कौरे लौए थै। पौरौ लौग तैसकै ठौलनाए कौरदै-कौरदै खोड़े गौवे। इथकारिए तिनुऐ हारून कै धौरे सुनू लौऊं औरौ तैसी कै ऐक मूरती बाणणौ कारिए बौल़ौ ताकि सै पौरमेशवर कै बौदल़े तिथकै पूजा कौरे सौकौ। ऐशैकैई, तिनुऐ बुरे तौरीकै शै पौरमेशवरौ कै खिलाफ पाप कौरै।
हारूनै कौलड़ै कै जैशणै ऐक मूरती बाणै। तिनु लोगै तियौं मूरती कै पूजा कौरणै शुरू कौरै दै औरौ तियों मूरती कै बल़ि चौढ़ाए! तिनकै पाप कै बौजेह शै पौरमेशवर तिनवारी बैजाए गुस्सा हौआ थिया। सै तिनु कै नाश कौरणै चांव थिया। पौरौ मूसाए पौरमेशवर कैईदै बेनते कौरे कै तिनुकै नै मारेया। पौरमेशवरे तैसकै बेनते शौणै औरौ तिनु कै नाश ना कौरी।
आखिरकार मूसा सीनै धारौ पांदी दा ऊदा आए गौआ। मूसा केई पात्थरौ की दो पाटड़ी थी जिथपांदी पौरमेशवरे दस आज्ञाए लैख रैई थी। तोबै तैणै तियौं मूरती कै दैखै। सै ऐतरा गुस्सा हौआ कै तैणै तिनु पाटड़ी कै चौकनाचूर कौरे दी।
तोबै मूसाए तियौं मूरती कै पिशैबा तिथका बुरादा बाणै दिया, औरौ तिथु बुरादै कै पाणी मुंजी घोवाल़ेबा तिनु लौगौ कै सैजौ पाणी पियाए दियु। पौरमेशवरै तिनु लौगौ पांदी ऐक मुसीबत छाड़ै औरौ तिनुमुंजी दै बौहिते लौग मौरे गौवे।
जिनु पात्थरौ की पाटड़ी कै मूसाए तौड़े दी थी तिथकै बौदल़े मूसाए ऊकी दस आज्ञाओं की पात्थरौ की नुई पाटड़ी बाणी। तोबै सै ओटेयो धारौ पांदी हौटे गौआ औरौ प्रार्थना कौरे के पौरमेशवर तिनु लौगौ कै पाप माफ कौरौ। पौरमेशवरे मूसा की शुणी औरौ तिनुकै माफ कौरे दिऐ। नुई पाटड़ी पांदी दस आज्ञा कै लौएबा मूसा धारौ पांदी दा उदा ओऊंवा। तोबै पौरमेशवरे सीनै धारौ शै पुँडी औरौ वादे कै देश तौड़ी इस्राएली लोगौ के मौदद कौरे।
निर्गमन अध्याय 19-34 पौरेशै बाइबल कै ऐक काहाणै।
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।