14. जौंगलौ पुंडौ भौटकौणौ

पौरमेशवरे इस्राएली लोगौ कै तिनु नियमो कै बौतायो चुकोए दिए जिनका पालन तिनुकै कौरेयोंदै तैसकै कौरारौ की बौजेह शै कौरणा थिया। तोबै तैणै सीनै धारौ दै पुंडी तिनकै अगवाए कौरे। सै तिनुकै वादे कै देश दै लौए जाणै चाँव थिया। ऐजा देश कनान बै कैहलांव थिया। पौरमेशवर बादल़ कै खौम्भे दा तिनकै औगौड़ियौ-औगौड़ियौ हांडा, औरौ सोब लोग तैसकै पौछौड़ियौ-पौछौड़ियौ हांडे।

पौरमेशवरे अब्राहम, इसहाक औरौ याकूब शै वादा कौरे राए थिया कै सै वादे का सैजा देश तिनकै वंशजो कै दैंदा, पौरौ इबी तिथै बौरिशी जाति रौंव थी। सै कनानी कैहलांव थिऐ। ऐजै कनानी लौग पौरमेशवर कै आराधना नै कौरौ थिऐ औरौ तैसकै आज्ञा कै नै मानौ थिऐ। सै झूठै देवताओं कै पूजा कौरेया कौरौ थिऐ। औरौ बौरिशै बुरै काम कौरौ थिऐ।

पौरमेशवरे इस्राएली लोगौ कै बौल़ौ, “जोबै तुऐं तैसी कौरारौ कै देशो दै जाले तौ तिथै कै सौबी कनानी लोगौ शै छुटकारा पाए पाया। तिनकै साथै समझौता नै कौरेया औरौ तिनवारी शादी नै कौरेया। तुऐं तिनकी सोबै मूरती कै पूरी तौरेह नाश कौरे दैया। जै तुऐं मैरे आज्ञा नै मानल़े, तौ तुऐं मेरी जौगेह तिनकै देवतांव कै पूजा कौरदै लागदै।

जोबै इस्राएली लौग कनान कै सीमा पांदी पौंईचै, मूसाए इस्राएल कै हर गोत मुंजी दै ऐक-ऐक कौरेबा बारौ मौरदौ कै चुणै। तैणै तिनुकै जाएबा तैसी देशौ का भेद लौणौ का हुकम दिया कै दैखियो आव कै सै कैशणा देश औसौ। तिनकै तिनु कनानी लोगौ का भेद बै लौणा थिया ऐजो दैखणो कै, कै सै तागतवार थिऐ या कमजौर थिऐ।

तिनु बारौ मौरदै पूरै कनान देश जाऐबा चालीश दुसौ कै यात्रा कौरे औरौ तोबै सै पाछु आए गौवे। तिनुऐ लोगौ कैई बौल़ौ, “सैजा देश बैजाए फौल़दार औसौ औरौ शाकौ भोरी औसौ!” पौरौ दस भेदीऐ बौल़ौ, “तिनकै नगर बैजाए मोजबूत औसौ औरौ सैजै लौग लांबै-चौड़ै औसौ! जै आमै तिनपांदी हमल़ा कौरदै, तौ पाकैई सै आमु कै हौराए दैंदे औरौ आमु कै मारै दैंदे।

तावल़ैई कालेब औरौ यहोशू दु भेदिऐ बौल़ौ, ऐजौ साचौ औसौ कै कनान देश कै लौग लांबै औरौ तागतवार औसौ, पौरौ पाकैई आमै तिनुकै हौराए सौकु! जिथुकै पौरमेशवर आमु कारिए लौड़दाए!”

पौरौ लोगै कालेब औरौ यहोशू की नी शुणी। सै मूसा औरौ हारून पांदी गुस्सा हौए गौवे औरौ बौल़ौ, “तौंऐ आमु कै ऐसी खतरनाक ठांव पांदी किथु कै लाए राए? आमु कै मिस्र देश दौ ही रौणौ चैंई थियु। जै आमै तैसी देशौ दै जौऊं तौ आमै युध्द दै मौरे जांदै, औरौ कनान देश कै लौग अमारी घौरवाल़ी औरौ नानड़िया कै दास बाणै दैंदे।” सैजै लौग तिनुकै पाछु मिस्र देश निणौ कारिए ऐक औका अगुवा बाणणा चांव थिऐ।

जोबै तिनु लोगै ऐशै कै बौल़ौ तौ पौरमेशवर बैजाए दुखी हौए गौआ थिया। सै मिलाप वाल़ै तोम्बू दा औआ औरौ बौल़ौ, “तुऐं मैरे खिलाफ पाप कौरे राए, इथकारिए तुऔं सौबी कै ऐसी जौंगलौ दौ भौटकौणौ पौड़दौ। हरेक आदमी जू बिशी सालो या तिंददा जादा उमरे का औसौ सै मौरे जांदा औरौ कौलौंई बै तैसी देशौ दा ना जाए पांदा जू हांव तुऔं कै दिंयु। सिरफ कालेब औरौ यहोशू ही तिंदै जाए सौकदै।

जोबै लोगै पौरमेशवरौ कै ऐशैकै बौल़दै बैई शुणा, तौ सै दुखी हौऐ जिथुकै तिनुऐ पाप कौरे राए थिया। इथकारिए तिनुऐ कनान देश कै लौगौ पांदी हमला कौरणौ का फौएसला कौरा। मूसाए तिनुकै ना जाणौ कारिए चेतावणी दै जिथुकै पौरमेशवर तिनकै साथै ना जांदा, पौरौ तिनुऐ तैसकी ना शुणी।

पौरमेशवर ऐसी युध्द दा तिनकै साथै नै थी, इथकारिए कनानी लोगै तिनुकै हौराए दिऐ औरौ तिनमुंजी दै बौहिते कै मारे दिऐ। तोबै इस्राएली लौग कनान देश पौरेशै पाछु फेरे गौवे। आगले चालीश सालो तौड़ी, सै जौंगलौ दै उंडै-पुंडै भौटकै।

इस्राएली लोगौ कै जौंगलौ पुंडै भौटकौणौ कै चालीश सालो तौड़ी, पौरमेशवरे तिनकी जरूरतौ कै पूरी कौरी। तैणै तिनुकै स्वर्ग शै “मन्ना” नांव की रोटी दी। तैणै बटेरों कै झुंड बै (जू कै छोटे आकार कै चुड़कुले हौंव थिऐ) तिनकी छावनी दै छाड़ै ताकि तिनकैई खाणौ कै मास हौंव। तैसी पूरे सौमय, पौरमेशवरे तिनकै खौटणौ कै औरौ जूतै कै फाटणौ शै बौचाऐबा राखै।

इथै तौड़ी कै पौरमेशवरे तिनु कारिए चमत्कारी रूप शै चट्टान पौरेशौ पाणी घाड़ौ। पौरौ इनु सौबी बातौ कै बाऊजूद बै, इस्राएली लोगै पौरमेशवरौ कै खिलाफ औरौ मूसा कै खिलाफ शिकायत कौरे औरौ कुड़कुड़ौऊऐ। तोबै बै, पौरमेशवर बिशवाशलायक थिया। तैणै जू वादा कौरे राए थिया कै सै अब्राहम, इसहाक, औरौ याकूब कै वंशज कारिए कौरदा तैणै सैजौ कौरौ।

ऐक बैई हौजौ जोबै तिनु लौगौ कैई पाणी नी थी, पौरमेशवरे मूसा कै बौल़ौ, “चट्टान वारी बातौ कौर, औरौ तिथ पौरेशौ पाणी निकल़दौ।” पौरौ मूसाए चट्टान वारी बातौ नी कौरी। इथकै बाजाए, तैणै लैकड़ै लैई चट्टानो पांदी दो बैई लैई। ऐशैकैई तैणै पौरमेशवरौ का निरादर कौरा। सौबी कै पीणौ कारिए चट्टान पौरेशौ पाणी तौ आए गौ, पौरौ पौरमेशवर मूसा शै गुस्सा हौए गौआ। तैणै बौल़ौ, “जिथुकै तौंऐ ऐशैकै कौरो, इथकारिए तू वादे कै देश दा ना जाए सौकदा।”

जोबै इस्राएली लौग चालीश सालो तौड़ी जौंगलौ पुँडै भौटकै गौवे थिऐ, तोबै जिनुऐ पौरमेशवर कै खिलाफ बुरू कौरे राए थियु सैजै सोबै मौरे गौवे थिऐ। तोबै पौरमेशवर तिनु लोगौ कै ओटेयो तैसी वादे कै देश कै नैड़िक लौए गौआ। ऐबै मूसा बैजाए बूढ़ा हौए गौआ थिया, इथकारिए पौरमेशवरे लोगौ कै अगवाए कौरणौ कै औरौ तिनकै मौदद कौरणौ कारिए यहोशू कै चुणा। पौरमेशवरे मूसाआरी ऐजा वादा बै कौरे राए थिया कै ऐक दुस सै तिनु लौगौ कै धौरे मूसा कै जैशणाई ऐक पौरमेशवरौ की बातौ बौताणौ वाल़ा छाड़दा।

तोबै पौरमेशवरे मूसा कै ऐकी धारौ की चुटी पांदी जाणौ कारिए बौल़ौ ताकि सै वादे कै देश कै दैखै सौकौ। मूसाए तैसी वादे कै देश कै दैखा पौरौ पौरमेशवरे तैसी कै तिथै जाणौ कै छुट नी दी। तोबै मूसा मौरे गौआ, औरौ इस्राएली लोगै तीश दुसौ तौड़ी शोग मौनौऊंआ। यहोशू तिनका नौवाँ अगुवा बौणै गौआ। यहोशू ऐक आछा अगुवा थिया जिथुकै तैणै पौरमेशवरौ पांदी भौरोशा राखा औरौ तैसकी बातौ मानी।