15. वादे का देश

आखरी दा, ऐबै सैजा सौमय आए गौआ थिया कै इस्राएली लौग वादे कै देश, कनान दै जांव। तैसी देशौ दा यरीहो नांव का ऐक नगर थिया। तिथकै बौचांव कारिए तिथकै चौऊं ढौबौ मजबूत दीवारौ थी। यहोशूए तैसी नगरौ दै दो भेदिए छाड़ै। तैसी नगरौ दै राहाब नांव कै ऐक बेशया रौंव थै। तियें तिनु भेदिए कै चोरे, औरौ तोबै बाद मे तियें तिनुकै नगर पौरेशै बौचाएबा निकल़णौ दै मोदद कौरे। तियें ऐशैकै इथकारिए कौरौ जिथुकै सै पौरमेशवरौ पांदी बिशवाश कौरौ थै। जौलौ इस्राएली लौग यरीहो का नाश कौरले तौलौ तिनुऐ राहाब औरौ तिंयारै कुड़बै कै रक्षा कौरणौ का वादा कौरे राए थिया।

इस्राएली लोगौ कै वादे कै देश दै जाणौ कारिए यरदन नौंदे पार कौरणै थै। पौरमेशवरे यहोशू कै बौल़ौ, “पुरोहितौ कै औगौड़ियौ जाणौ दै।” जोबै पुरोहितै यरदन नौंदी दै आपणै लातौ कै राखै तौ पाणी का भौआव रौकै गौआ, जिथलैई कै इस्राएली लौग नौंदी कै पाईले ढौबौ शुकी जौमीनौ पांदी पांडै जाए सौकौ।

तिनु लोगै यरदन नौंदी पार कौरे पाए तौ पौरमेशवरे यहोशू कै बौल़ौ कै यरीहो पांदी हमला कौरणौ कारिए तैयार रौया, भलैई सै बैजाए मजबूत नगर थिया। पौरमेशवरे तिनु लोगौ कै बौल़ौ कै तौंवारे पुरोहितौ कै छौई दुसौ तौड़ी तैसी नगरौ कै चौऊ ढौबौ चौक्कर लाणै। औरौ पुरोहिते औरौ सैनिकै ऐशैकैई कौरौ।

तोबै सातवें दुसै, इस्राएली लोगै तैसी नगरौ कै चौऊ ढौबौ कै सात बैई हौजौ चौक्कर लौऐ। तिनकै नगरौ कै चौऊ ढौबौ कै सात बैई चौक्कर लाणौ कै बाद, पुरोहितै आपणी तुरहियाँ बौजेई औरौ सैनिकै जोर शै धाव मारे।

तोबै यरीहो कै चौऊ ढौबौ की दीवारौ डोल़ गौई! जैशैकै पौरमेशवरे आज्ञा दैए राए थै इस्राएली लोगै नगरौ की सोबै चीज़ौ कै नाश कौरे दी। तिनुऐ सिरफ राहाब औरौ तियौंकै कुड़बै कै छौड़े दिऐ, जू इस्राएली लौगौ कै भाग बौणै गौवे थिऐ। जोबै कनान देश दै रौणौ वाल़ै औकी लोगै शुणु कै इस्राएली लोगै यरीहो का नाश कौरे दिया, तौ सै डौरे गौवे कै इस्राएली लौग तिनपांदी बै हमला कौरदै।

पौरमेशवरे इस्राएली लोगौ कै आज्ञा दैए राए थै कै कनान देश दी रौणौवाल़ी कौसी बै जातिआरी सौमझौता नै कौरेया। पौरौ गिबोनीयों नांव कै ऐक कनानी जातिऐ यहोशू कैई झूठू बौल़ौ कै सै कनान देश शै दूर ऐकी ठांव कै रौणौवाल़ै औसौ। तिनुऐ यहोशू कैईदै तिनवारी सौमझौता कौरणौ कै बेनते कौरे। यहोशू औरौ औकी इस्राएली अगुवे पौरमेशवरौ कैईदु नै पूछी कै तिनुकै का कौरणौ चैंई। इथकै बजाए, तिनुऐ गिबोनियो कै साथै सौमझौता कौरे पाए।

ती दुसौ कै बाद, इस्राएली लोगौ कै पौता चाला कै गिबोनी लौग कनान देश दैई रौंव। सै गुस्सा हौए गौवे जिथुकै गिबोनी लोगै तिनुकै धौखा दैए राए थिया। पौरौ तिनुऐ तिनवारी कौरेयोंदै सौमझौते कै बाणैबा राखा। जिथुकै सै पौरमेशवरौ कै सामणै कौरे राए थिया। तोबै कैई दुसौ कै बाद, कनान देश दी रौणौवाल़ी ऐकी औकी जातिए, एमोरीयो कै राजाए शुणु कै गिबोनीए इस्राएली लौगवारी सौमझौता कौरे पाए, इथकारिए तिनुऐ आपणै-आपणै सेना कै ऐकेक कौरेबा बौड़े सेना बाणै औरौ गिबोन पांदी हमला कौरे दिया। गिबोनी लोगै आपणै मौदद कौरणौ कारिए यहोशू कै धौरे ऐक बेवरा दिया।

औरौ यहोशूए इस्राएली लोगौ कै सेना कौठे कौरे औरौ गिबोनी लोगौ कै धौरे पौऊंचणौ कारिए सै पौरे रात हांडै। झीशौ झिशीदै तिनुऐ एमोरी लौगौ कै सेना कै हैरान कौरे दिऐ औरौ तिनपांदी हमला कौरे दिया।

तैसी दुसे पौरमेशवर इस्राएली लोगौ कारिए लौड़ा। तैणै एमोरी लौगौ कै घौबराए दिऐ औरौ तैणै बौड़ै-बौड़ै शौरू बौरशाऐबा बौरिशै एमोरी लौगौ कै मारै दिऐ।

पौरमेशवरे सूरजौ कै बै गौयणै दा ऐकी ठांव दा रोकै दिया ताकि इस्राएली लोगौ कै जादा सौमय भैटे जांव कै एमोरी लोगौ कै आछ कौरेयो हौराए दैंव। तैसी दुसै, पौरमेशवरे इस्राएली लोगौ कारिए ऐक बौड़ै जीत कौराए।

जोबै पौरमेशवरे तिनु सेनाओं कै हौराणौ कै बाद, बौरिशै कनानी जाति कै लौग इस्राएली लोगौ पांदी हमला कौरणौ कारिए कौठे हौऐ। यहोशू औरौ इस्राएली लोगै हमला कौरेबा तिनका काम तमाम कौरे दिया।

इनु युध्दो कै बाद, पौरमेशवरे इस्राएली लोगौ कै सौबी गोत्रो कै वादे कै तैसी देशौ दा तिनका हिस्सा दिया। तोबै पौरमेशवरे इस्राएली लोगौ कै तिनकी सौबी सीमा पांदी शान्तै दै।

जोबै यहोशू बूढ़ा हौए गौआ तौ इस्राएल कै सौबी लोगौ कै ऐक साथै बौईदै। तोबै यहोशूए तिनु लोगौ कै याद कौरौऊं कै तिनुऐ तैसी कौरारौ का पालन कौरणा का वादा कौरे राए थिया जू पौरमेशवरे तिनवारी सीनै धारौ पांदी कौरे राए थिया। तिनु लोगै पौरमेशवरौ कै प्रति बिशवाश लायक रौणौ औरौ तैसकै कानूनो का पालन कौरणौ का वादा कौरा।