16. छुड़ाणौवाल़ै

यहोशू कै मौरणौ कै बाद इस्राएली लोगै पौरमेशवर कै आज्ञा ना मानी। तिनुऐ पौरमेशवरौ कै नियमौ का पालन ना कौरी, औरौ तिनुऐ तैसी कौरारौ कै देश पौरेशै बौचेयोंदै कनानी लोगौ कै बाएरै ना घाड़ी। इस्राएली लोगै आपणै साचै पौरमेशवर, यहोवा कै छौड़ेबा कनानी लोगौ कै देवताओं कै पूजा कौरणै शुरू कौरे दै। इस्राएली लोगौ कैई कुणजाई राजा नी थी, इथकारिए जैसिकै जू आछौ लागौ तैणै सैजौई कौरौ।

पौरमेशवर कै आज्ञा ना मानणौ कै कारण इस्राएली लोगै ऐशणै नियम कै शुरू कौरे दिए जिथुकै तिनुऐ कैई बैई ओटेयो कौरे राए थिए। ऐजै नियम ऐशैकै चाले: किछै सालो तौड़ी इस्राएली लौग पौरमेशवरौ कै आज्ञा ना मानदै, तोबै सै तिनुकै तिनकै दुशमनो शै हौरायो सजा दैंदा। ऐजै लौग इस्राएली लोगौ शै तिनकी चीज़ौ लौटे दैंदे, तिनकै जायदात नाश कौरे दैंदे, औरौ तिनमुंजी दै बौहिते कै मारे दैंदे। तोबै जोबै इस्राएली लोगौ कै दुशमन तिनका कैई सालो तौड़ी बुरा हाल कौरले, तिथकै बाद इस्राएली लौग पाप कौरणा छौड़ दैंदे औरौ पौरमेशवर कैंईदै तिनुकै बौचाणौ कारिए प्रार्थना कौरदै।

हर बार जोबै इस्राएली लौग पाप कौरणा छौड़े दैंले तौ पौरमेशवर तिनुकै बौचाला। सै ऐक छुड़ाणौ वाल़ै कै द्वारा ऐशैकै कौरदा – ऐक ऐशणा आदमै जू तिनकै दुशमणौ कै खिलाफ लौड़दा औरौ तिनुकै हौराए दैंदा। तोबै देश दै शान्ति हौंदे औरौ सै छुड़ाणौ वाल़ा तिनपांदी आछै शै राज कौरदा। पौरमेशवरे तिनु लौगौ कै बौचाणौ कारिए बौरिशै छुड़ाणौ वाल़ै छाड़े। पौरमेशवरै नैड़िक कै ऐक दुशमन जाति, मिधानियो कै द्वारा इस्राएली लोगौ कै हौरायो ओटेयो कै ऐशैकै कौरौ।

मिद्यानी लोगै साती सालो तौड़ी इस्राएली लोगौ की शाकौ कै लूटी। इस्राएली लौग बैजाए डौरे गौवे थिऐ, औरौ सै औड़ारौ बितरे चौरे गौवे, ताकि मिद्यानी लौग तिनुकै जौए नै पांव। आखिरकार, तिनुऐ आपी कै बौचाणौ कारिए पौरमेशवरौ का नांव लौआ।

गिदोन नांव का ऐक इस्राएली मौरद थिया। ऐक दुस, तैणै ऐकी ठांव दै मेसो गियुँ पोणे लौवे थिऐ ताकि मिद्यानी लौग तिनु चौरे नै दैंव। यहोवा कै स्वर्गदूतै गिदोन कै धौरे आऐबा तैसी कै बौल़ौ, “ओए रै शूरवीर सूरमा, पौरमेशवर तैरे साथै औसौ। जा औरौ इस्राएली लौगौ कै मिद्यानी लोगौ शै बौचा।”

गिदोनो कै बापू कैई मूरती कै चौढ़ाणौ कारिए ऐक बेदी थै। सौबदै आगले बात जू पौरमेशवरे गिदोन कै कौरणौ कारिए बौल़े तैसकै सैजै बेदी तौड़णै थै। पौरौ गिदोन लोगौ दा डौरौ थिया, इथकारिए तैणै रात हौणौ कै ठौल़नाए कौरे। तोबै तैणै तियौं बेदी कै तौड़ेबा टुकड़ै-टुकड़ै कौरे दिऐ। तैणै पौरमेशवरौ कारिए ऐक नौऐं बेदी बाणै औरौ तिथपांदी पौरमेशवरौ कारिए बौल़ि चौढ़ाए।

औकी दुसै लोगै दैखौ कै कुणिए बेदी कै तौड़ेबा टुकड़ै-टुकड़ै कौरे दिऐ, इथकारिए सै बैजाए गुस्सै हौवे। औरौ सै गिदोन कै मारणौ कारिए तैसकै घौरे हौटे, पौरौ गिदोन कै बापूए बौल़ौ, “तुऐं किथुकै आपणै देवता कै मौदद कौरणौ कै कोशिश कौरे लौए? जै सै देवता औसौ तौ तैसी आपणा ध्यान आपी राखणौ दैंव!” जिथुकै तैणै ऐशैकै बौल़ौ इथकारिए लोगै गिदोन कै ना मारी।

तोबै इस्राएली लोगौ कै लूटणौ कारिए मिद्यानी लौग ओटेयो औवे। सै ऐतरै जौणे थिऐ कै तिनकै गिनती बै ना हौए सौकौ। गिदोनै तिनकै खिलाफ लौड़णौ कारिए इस्राएली लोगौ कै ऐक साथै बौईदै। गिदोनै पौरमेशवरौ कैईदै दो निशान मांगै ताकि तैसी बिशवाश हौए जांव कै पौरमेशवरे सौथी कै तैसीकै, इस्राएली लोगौ कै बौचाणौ कारिए बौल़े लौ।

आगले निशानौ कारिए, गिदोने भेड़ कै ऊन कै जौमीनौ पांदी राखैबा पौरमेशवरौ कै बौल़ौ कै झिशौ कै ओश सिरफ भेड़ो कै तियौं ऊनो पांदी पौड़ौ औरौ जौमीनौ पांदी नै पौड़ौ। पौरमेशवरै ऐशैकैई कौरौ। औकी राते, तैणै पौरमेशवरौ कै बौल़ौ कै जौमीन बिज़ जांव पौरौ ऊन शौकै रौंव। पौरमेशवरे ऐशैकै बै कौरौ। इनु दु निशानौ की बौजेह शै, गिदोनै बिशवाश कौरा कै पौरमेशवर सौथी कै चांव कै सै इस्राएली लोगौ कै मिद्यानी लोगौ शै बौचांव।

तोबै गिदोनै सैनिकौ कै आपणै धौरे बौईदै औरौ 32,000 मौरद औवे। पौरौ पौरमेशवरै तैसीकै बौल़ौ कै ऐजै बौहिते औसौ। औरौ गिदोनै तिनु मुंजीदै 22,000 मोरदो कै घौरै पाछु छाड़ै दिऐ जू लौड़णौ शै डौरौ थिऐ। पौरमेशवरे गिदोन कै बौल़ौ कै ऐजै मौरद इबी बै बौहिते औसौ। इथकारिए गिदोनै तिनु मुंजीदै बै र्सिफ़ 300 सैनिकौ कै छौड़ेबा बाकि सौब घौरै कै छाड़ै दिऐ।

तियौंई राते पौरमेशवरे गिदोन कै बौल़ौ, “मिद्यानियों कै डैरै पाछी जा औरौ तिनकी बातौ शुण। जोबै तू शौणै पाए कै सै का बातौ कौरौ तौ तू तिनपांदी हमला कौरणौ शै नै डौरेया।” इथकारिए तियौंई राते, गिदोन ऊदा तिनकै डैरै पाछी हौटा औरौ तैणै ऐक मिद्यानी सैनिक कै आपणै दोस्तो कैई सैजै बात बौतंदी बैई शुणै जू तैणै सुईणै मुंजी दैखै राए थै। तैसी मौरदौ कै दोस्ते बौल़ौ, “ऐसी सुईणै का मतलब औसौ कै गिदोन कै सेना आमु मिद्यानी सेना कै हौराए दैंदे!”जोबै गिदोनै ऐजौ शुणु तौ तैणै पौरमेशवरौ कै बौड़ाए कौरे।

तोबै गिदोन आपणै सैनिकौ कै धौरे पाछु औआ औरौ तिनमुंजी दै सौबी कै ऐक-ऐक नरसिंगा, ऐक माटी कौ बासण, औरौ ऐक मशाल दै। तिनुऐ तिनु घेर दिऐ जिथै मिद्यानी सैनिक सौते रौए थिऐ। गिदोन कै 300 सैनिकै आपणी मशालो बासणौ लैई खौटे रैई थी इथकारिए मिद्यानी लौगौ कै तिनु मशालो कौ पेयाशौ ना दैखी।

तोबै गिदोन कै सौबी सैनिकै आपणै बासणौ कै ऐकी बैई तौड़ेबा ऐकदम शै मशालो कै आग दैखाए दै। तिनुऐ आपणै नरसिंगे बौजौऊंऐ औरौ जोर शै बौल़ौ, “यहोवा कै ढौबौशै गिदोन कै तलवार!”

पौरमेशवरै मिद्यानी लोगौ कै डौराए दिए, इथकारिए सै ऐकी दुजै कै मारदै औरौ काटदै लागै। तोलौंई, गिदोनै शुजा दैणौवाल़ै कै बौरिशै औकी इस्राएली लौगौ कै बौईददै छाड़ै। ताकि सै मिद्यानी लौगौ का पीछा कौरणौ दै तिनकै मदद कौरो। तिनुऐ तिनमुंजी दै बौहिते कै मारे दिए औरौ बाकी का पीछा कौरबा तिनुकै इस्राएल देश पौरेशै बाएरै गाड़ै दिए। तैसी दुसै 1,20,000 मिद्यानी लौग मौर गौवे। ऐशैकै पौरमेशवरै इस्राएल लोगौ कै बौचाए।

सैजै लौग गिदोन कै आपणा राजा बाणणा चांव थिए, पौरौ गिदोनै तिनुकै ऐशैकै ना कौरणौ दी, पौरौ तैणै तिनुवादै सैजै सुनै कै गौणै मांगै जू तिनमुंजी दै सौबीए मिद्यानी लोगौ शै लूटी राए थिए। तिनु लोगै बौरिशु सुनु गिदोन कै दियु।

तोबै गिदोनै तिथु सुनै लैई ऐक खास खौटीयोण बाणौ जैशैकै महा पुरोहित बाम्बेया कौरौ थिए। पौरौ लोगै तिथ खौटीयोणौ कै पूजा कौरणै शुरू कौरे दै जैशैकै सै ऐक मूरते हौले। तोबै पौरमेशवरे ओटेयो कै इस्राएल कै सजा दै। जिथुकै तिनुऐ मूरती कै पूजा कौरे। पौरमेशवरै तिनकै दुशमनो कै तिनु हौराणौ कारिए काबिल बाणै। आखिरकार तिनुऐ ओटेयो पौरमेशवर कैईदै मदद मांगणौ कारिए प्रार्थना कौरे, औरौ पौरमेशवरे तिनकै धौरे तिनुकै बौचाणौ कारिए ऐक औका छुड़ाणौवाल़ा छाड़ा।

ऐजै बात कैई बैई होए: कै इस्राएली लौग पाप कौरदै गोवे औरौ पौरमेशवर तिनुकै सजा दैंदा रौआ सै पाप कौरणै छौड़ दैंव, औरौ पौरमेशवर तिनुकै छुड़ाणौ कारिए कौसी कै छाड़ो थिया। कैई सालो तौड़ी, पौरमेशवरै बौरिशै छुड़ाणवाल़ै कै छाड़ै जिनुऐ इस्राएली लोगौ कै तिनकै दुशमनौ कैंईदै बौचौऊंए।

आखिरकार, तिनु लोगै औकी देशौ साय पौरमेशरौ कैंईदा आपी कारिए ऐक राजा मांगा। सै ऐक ऐशणा राजा चांव थिए जू लांबा औरौ शोकतीशाली हौंव, औरौ जू युध्द मुंजी तिनकै अगवाए कौरे सौकौ। पौरमेशवरौ इयों बिनती शै खुश ना थी, पौरौ तैणै तिनुकै तैशणाई राजा दिया जैशणा तिनुऐ मांगै राए थिया।