17. दाऊद वारी पौरमेशवरौ का कौरार

शाऊल इस्राएल का आगला राजा थिया। सै लांबा औरौ सुंदर थिया, जैशैकै सैजै लौग चाँव थिऐ ऐकदम तैशणाई। इस्राएल पांदी आपणै राज कौरणौ कै शुरू कै किछै सालो दा शाऊल ऐक आछा राजा थिया। पौरौ बाद मे सै ऐक दुष्ट आदमी बौणै गौआ जैणै पौरमेशवरौ की बातौ कै ना मानी, इथकारिए पौरमेशवरे ऐक औका आदमै चुणा जू कै ऐक दुस तैसकै ठांव पांदी राजा बौणदा थिया।

पौरमेशवरे दाऊद नांव कै ऐक जवान इस्राएली मौरदो कै चौणैबा शाऊल कै ठांव पांदी राजा हौणौ कारिए तैयार कौरणा शुरू कौरा। दाऊद बैतलमहम नगरौ का भेड़ो का चौराईयाँ थिया। कैई बैई, दाऊदै सिंह औरौ भालू दु कै मारै दिऐ थिऐ जिथुकै दाऊद कै रौखवाल़ै कौरदै बैई तैसकै बापू की भेड़ो पांदी तिनुऐ हमला कौरे राए थिया। दाऊद ऐक शरीप औरौ धरमी आदमै थिया। तैणै पौरमेशवरौ पांदी भौरोशा राखा औरौ तैसकी बातौ मानी।

जोबै दाऊद इबी जवान मौरद ही थिया, तैणै लांबे-चौड़े गोलियत कै खिलाफ लौड़ाई कौरे। गोलियत ऐक बैजाए बौड़िया सैनिक थिया। सै बैजाए मजबूत औरौ लमसम तीन मीटर लांबा थिया! पौरौ पौरमेशवरै गोलियत कै मारणौ औरौ इस्राएल कै बौचाणौ कारिए दाऊद कै मोदद कौरे। इथकै बाद, दाऊदै इस्राएल कै दुशमनौ पांदी कैई बैई जीत हासिल कौरे। दाऊद ऐक बौड़ा सैनिक बौणै गौआ, औरौ तैणै बौरिशै युध्दो मुंजी इस्राएली सेना कै अगवाए कौरे। लोगै तैसकै बैजाए तारीफ कौरे।

औरौ लोगै दाऊदवारी इशैक प्यार कौरा, कै शाऊल तैसी शा रिशांदा लागा। आखिरकार शाऊल तैसी कै मारे दैणा चांव थिया। इथकारिए दाऊद तैसीयांदा औरौ तैसकै सैनिकवांदा चुरिणौ कारिए जौंगलौ पुंडा दौड़े गौआ। ऐक दुस, जोबै शाऊल औरौ तैसकै सैनिक दाऊद कै ताको दै थिऐ तौ शाऊल ऐकी औड़ारो पुंडा हौटा। ऐजा सैजाई औड़ार थिया जिथपुंडा दाऊद चौरे रौआ थिया, पौरौ शाऊलै तैसी कै ना दैखी। दाऊद शाऊल कै पौछौड़ियौ बिलकुल नैड़िक हौटे गौआ औरौ तैसकै खौटणौ का ऐक पाला काटे दिया। बाद मे, जोबै शाऊल तैसी औड़ारौ पौरेशा निकल़ा तौ दाऊदै तैसी धांव दैएबा तैसी कै खौटणौ का पाला दिखौऊंआ। ऐशैकैई, शाऊले जाणै पौऊ कै दाऊद राजा बौणणौ कारिए तैसी मारणा ना चांव।

कुछ दुस कै बाद, शाऊल युध्द दा मौरे गौआ, औरौ दाऊद इस्राएल का राजा बौणै गौआ। सै ऐक आछा राजा थिया। औरौ लोगै तैसीयारी प्यार राखा। पौरमेशवरै दाऊद कै आशीषित कौरा औरौ तैसी कै कामेयाब कौरा। दाऊदै कैई युध्द लौड़े, औरौ पौरमेशवरै इस्राएल कै दुशमनौ कै जीतणौ दै तैसकै मोदद कौरे। दाऊदै यरूशलेम नगर कै जीतेबा तिथु आपणै राजधानी बाणै, जिथै सै रौआ औरौ राज कौरा। दाऊद चालीश सालो तौड़ी राजा रौआ। तौलौंई, इस्राएल देश तागतवर औरौ अमीर देश बौण गौ।

दाऊद ऐक मंदिर बाणणा चांव थिया जिथै सोबै इस्राएली लौग पौरमेशवर कै आराधना कौरे सौकौ औरौ तैसकारिए बल़िदान चौढ़ाए सौकौ। लमसम 400 सालो दौऊंड़े, तिनु लौगै मूसा कै बाणैयोंदै मिलाप वाल़ै तोम्बू दै पौरमेशवर कै आराधना कौरे लौए थै औरौ तैसकारिए बल़िदान चौढ़ाए लौऐ थिऐ।

पौरौ तिथै नातान नांव का ऐक पौरमेशवर का बातौ बौताणौवाल़ा थिया। पौरमेशवरै तैसीकै दाऊदो कैई ऐजौ बौताणौ कारिए छाड़ा: “तौंऐ बैजाए युध्द राए लौड़े, इथकारिए तू मौं कारिए ऐसी मंदिरो कै ना बाणदा। तैरा बैटा ऐसी मंदिरो कै बाणदा। तोबै बै, हांव ताखै बौरी आशीषित कौरदा। तैरा ऐक वंशज सदा कारिए मैरे लौगौ पांदी राजा कै रूप दा राज कौरदा।” सदा कारिए राज कौरणौवाल़ा सैजा दाऊद का ऐकैई वंशज मसीह थिया। मसीह पौरमेशवरौ का चौणैयोंदा आदमै थिया जू दुनिया कै लौगौ कै तिनकै पापौ शै बौचांदा।

जोबै दाऊदै नातानो का सौंदेश शुणा तौ तैणै पौरमेशवरौ का धन्यवाद कौरा औरौ तैसकै बौड़ाए कौरे। पौरमेशवरे तेसका रुतबा बौढ़ाए लौआ थिया औरौ तैसीकै बौरिशी आशीषो दैए लौई थी। बैशक, दाऊद नै जाणौ थिया कै पौरमेशवर इनु बातौ कै कौलौ कौरदा। पौरौ इबी आमै जाणुए कै इस्राएली लौगौ कै ऐकी लांबे सौमय तौड़ी, लमसम 1000 सालो तौड़ी मसीह कै आणौ कै ठौलनाए कौरणै पौड़दै।

दाऊदै कैई सालो तौड़ी न्याय कै साथै आपणै लौगौ पांदी राज कौरा। तैणै बौड़ै सौचाई शै पौरमेशवरौ की बातौ कै मानी औरौ पौरमेशवरै तैसी आशीषित कौरा। भलैई, आपणै जीवन कै आखरी मे तैणै पौरमेशवरौ कै खिलाफ खतरनाक पाप कौरे राए थिया।

ऐक दुस दाऊदै आपणै महलौ पौरेशौ बाएरै दैखौ औरौ ऐक सुंदर बैटमाणिशौ कै नाईदिए बैई दैखै। सै तियौं कै नी जाणौ थिया, पौरौ तैणै पौता लाए पौआ कै तिंयारौ नांव बतशेबा औसौ।

आपणै सोच बोदलणो कै बजाए, दाऊदै तियौं कै आपणै धौरे लियाणौ कारिए कौसी कै छाड़ै। सै तिंयारै धौरे सुता औरौ तियौंकै पाछु घौरौ कै छाड़ै दै। थौड़े दुसौ कै बाद बतशेबाए ऐजौ बौलेबा दाऊद कैंई बैवरा दिया कै मैरे होल़किणु औसौ।

बतशेबा का घौरवाल़ा ऊरिय्याह नांव का ऐक आदमै थिया। सै दाऊद कै बौड़िया सैनिकौ मुंजीदा ऐक थिया। इबी सै युध्द कौरणौ कारिए बाएरे हौटे रौआ थिया। दाऊदै ऊरिय्याह कै युध्द पौरेशा पाछु बौएदैबा तैसीकै आपणी घौरवाल़ीयारी रौणौ कारिए बौल़ौ। पौरौ औके सैनिक युध्द दै थिऐ इथकारिए ऊरिय्याह घौरौ जाणौ कै भाजै गौआ। औरौ दाऊदै ऊरिय्याह कै पाछु युध्द दा छाड़ै दिया औरौ सेनापति कै बौल़ेयो तैसीकै युध्द दा ऐशणै ठांव पांदी राखणौ कारिए बौल़ौ जिथै दुशमन सौबीदै जादा शोकतीशाली हौंव ताकि सै मौरे जांव। तौ ऐशैकै हौ कै ऊरिय्याह युध्द दा मौर गौआ।

ऊरिय्याह कै युध्द दै मौर जाणौ कै बाद दाऊदै बतशेबाआरी जाजड़ा बाणै पौआ। बाद मे, तियैं दाऊद कै बैटे कै जन्म दिया। दाऊदै जू कौरौ तिथलैई पौरमेशवर बैजाए गुस्सै थिया, इथकारिए तैणै नातान जू पौरमेशवर की बातौ बौताणौवाल़ा थिया तैसीकै तैसकै धौरे एजो बोताणो कै छाड़ा कै तैसका पाप कैतरा बुरा थिया। दाऊदै आपणै पापौ का पच्शाताप कौरा औरौ पौरमेशवरै तैसी कै माफ कौरे दिया। आपणै बौचयोंदै जीवन दै, आपणै मुशकिल सौमय दै बै दाऊद पौरमेशवरौ कै पौछौड़ियौ- पौछौड़ियौ चाला औरौ तैसकी बातौ मानी।

पौरौ दाऊद कौ नानड़िया मौरे गौ। ऐशैकै पौरमेशवरै दाऊद कै सजा दै। इथकै आलावा, दाऊदौ कै मौरणौ तौड़ी, तैसकै आपणै कुड़बै कै किछै लौगै तैसकै खिलाफ लौड़ाए कौरे, औरौ दाऊद कै आपणै शौकती कम हौए गौए थै। पौरौ पौरमेशवर बिशवाश लायक थिया। औरौ ऐबै बै तैणै सैजौ कौरौ जू तैणै दाऊद शै कौरणौ का वादा कौरे राए थिया कै सै कौरदाए, भलेई दाऊदै तैसकै आज्ञा ना मानी। बाद मे, दाऊद औरौ बतशेबा कै औके ओलाद पौयदा हौए, औरौ तिनुऐ तैसकौ नांव सुलैमान राखौ।