18. बौंटवारै कै राज्य

दाऊद राजाए चालीश सालो तौड़ी राज कौरा। तोबै सै मौरे गौआ, औरौ तैसकै बैटे सुलैमानै इस्राएल पांदी राज कौरणा शुरू कौरा। पौरमेशवरे सुलैमानवारी बात कौरे औरौ तैसकेंदु पुछु कै तू सोबदौ जादा का चांए कै पौरमेशवर तांव कारिए कौरौ। सुलेमानै पौरमेशवरौ वांदौ मांगौ कै सै तैसीकै बौहिता बुध्दिमान बाणै दैंव। इयौं बातै पौरमेशवरौ कै खुश कौरा, इथकारिए पौरमेशवरे सुलैमानौ कै दुनिया का सौबीदा बुध्दिमान मौरद बाणै दिया। सुलैमानै बौरिशी बातौ शिखी औरौ सै ऐक बुध्दिमान राजा बौण गौआ। पौरमेशवरै तैसी कै बैजाए अमीर बै बाणै दिया थिया।

यरूशलेम शहर दै सुलैमानै तैसी मंदिरौ कै बाणा जिथकारिए तैसकै बापूए योजना बाणै राए थै औरौ समान कौठौ कौरे राए थियु। ऐबै लौग मिलाप वाल़ै तोम्बू कै जौगेह मंदिरौ दै पौरमेशवर कै आराधना कौरौ थिऐ औरौ तैसकारिए बौल़ि चौढ़ांव थिऐ। पौरमेशवर आऐबा मंदिर दा रोया कौरौ थिया, औरौ तिथै सै आपणै लौगवारी बात कौरौ थिया।

पौरौ सुलैमानै औकी देशौ की बैटमाणिशवारी प्यार कौरा। तैणै बौरिशी, लमसम 1,000 बैटमाणिशवारी जाजड़ा बाणैबा पौरमेशवर कै आज्ञा टाल़ै! इनु मुंजी दी बौहिती बैटमाणिशौ पराए देशौ पौरेशी आई औरौ आपीयारी दैव लियौऊंए औरौ तिनकै पूजा कौरणै ना छुड़ी। जोबै सुलैमान बूढ़ा हौए गौआ तौ तैणै बै तिनकै दैव कै पूजा कौरे।

इयौं बौजेह शै पौरमेशवर सुलैमान शै निराज थिया। तैणै बौल़े राए थियु कै सै इस्राएल देश कै दु राज्य दै बांटियों सजा दैंदा। सै सुलैमान कै मौरणौ कै बाद ऐशैकै कौरदा।

सुलैमानौ कै मौरणौ कै बाद, रहबाम राजा बौणा। इस्राएल देश कै सोबै लौग तैसी आपणै राजा कै रूप दा औपनाणौ कारिए ऐकसाथै कौठे हौवे। तिनुऐ रहबामवागै शिकाएत कोरै कै सुलैमानै तिन लैई बैजाए चैंईथै टौल सौंडाए राए थै औरौ बौरिशै मामले लौए राए थिऐ। तिनुऐ रहबामवादै बिनते कौरे कै आमलैई कम टौल सौंडाऐया।

पौरौ रहबामै तिनुकै बौड़ा बैकार जबाब दिया, “तुऐं बौल़ौ कै मैरे बापूए सुलैमानै तुऔं लैई चैईंथै टौल सौंडाए। पौरौ हांव तुऔं लैईबा तिदंदै बै जादा टौल सौंडादा, औरौ हांव तुऔं कै तिदंदै बै जादा दुखी कौरदा।”

जोबै लोगै तैसी कै ऐशैकै बुलदिए बैई शुणा तौ तिनमुंजी दै कैईऐ तैसकै खिलाफ लौड़ाए कौरे औरौ दस गोत्र कै लोगै तैसी कै छौड़े दिया; औरौ तैसकै साथै ऐबै दो ही गोत्र बौचे गौवे। ऐजै दो गोत्रो कै लौग आपी कै यहूदा का राज्य बौल़ौ थिए।

बाकी कै दस गोत्र कै लोगै यारोबाम नांव कै ऐकी मौरदौ कै आपणा राजा बाणै दिया। ऐजै गोत्र देशौ कै उतर-पूर्वी हिस्सै दै थिऐ। तिनुऐ आपी कै इस्राएल का राज्य बौल़ा।

पौरौ यारोबामै पौरमेशवरौ कै खिलाफ बुरू सांडौ औरौ लोगौ लैई पाप कौरौऊंआ। तैणै आपणै लौगौ लैई पूजा कौराणौ कारिए दो मूरती बाणी। सै ऐबै यहूदा कै राज्य यरूशलेम दै पौरमेशवरौ कै मंदिर दै तैसकै आराधना कौरणौ कारिए ना हुटी।

यहूदा औरौ इस्राएल कै राज्य दुशमन बौण गौवे औरौ जादातर ऐकी दुजै कै खिलाफ लौड़दै लागै।

इस्राएल कै नौंऐ राज्य दै, सोबैई राजा दुष्ट थिऐ। इनमुंजी दै कैई राजा तिनकै ठांव पांदी राजा बौणणौ कै चाहत राखणौवाल़ै औके इस्राएली लौगौ लेई मारे गौवे थिऐ।

इस्राएल राज्य कै सौबी राजाए औरौ जादातर लौगै मूरती कै पूजा कौरे। जोबै तिनुऐ ऐशैकै कौरौ, तौ सै जादातर वेशयारी सुतै औरौ इथै तौड़ी कै कैई बैई मूरती कै औगौड़ियौ नानड़िया कै बै बौल़ि कौरे।

यहूदा राज्य कै राजा, दाऊद कै वंशज थिऐ। इनु राजाओ मुंजीदै कुणजैई आछै आदमै थिऐ जिनुऐ न्याय कै साथै राज कौरा औरौ पौरमेशवरौ कै आराधना कौरे। पौरौ यहूदा कै जादातर राजा दुष्ट थिऐ। तिनुऐ दुष्टता शै राज कौरा, औरौ मूरती कै पूजा कौरे। इथै तौड़ी कै इनु मुंजीदै कैई राजाए झुठै दैव कै औगौड़ियौ आपणै नानड़िया कै बै बौल़ि कौरे दै। यहूदा कै जादातर लौगै बै पौरमेशवरौ कै खिलाफ बुरू सांडौ औरौ औकी दैव कै पूजा कौरे।