19. पौरमेशवरौ की बातौ बौताणौ वाल़ै

पौरमेशवर हौमेशा इस्राएली लौगौ कै धौरे पौरमेशवर की बातौ बौताणौ वाल़ै कै छाड़दा रौंव थिया। पौरमेशवरौ की बातौ बौताणौ वाल़ै पौरमेशवरौ कै सौंदेशौ कै शुणौ थिऐ औरौ तोबै लौगौ कै बौतांव थिऐ।

जोबै अहाब इस्राएल राज्य पांदी राजा थिया तौ तौलौ एलिय्याह पौरमेशवर की बातौ बौताणौ वाल़ा थिया। अहाब ऐक बुरा आदमै थिया। तैणै झूठै बाल देवता कै पूजा कौराणौ कारिए लौगवारी जबरदस्तै कौरे थै। इथकारिए एलिय्याहै अहाब कै बौल़ौ कै पौरमेशवर तिनु लोगौ कै सजा दैणौ वाल़ा औसौ। तैणै तैसी कै बौल़ौ, “जांव तौड़ी हांव ओटेयो बौरखा हौणौ कारिए ना बुलु तांव तौड़ी इस्राएल कै राज्य दै ना बौरखा हौंदे औरौ ना ही औश पौड़दै।” इयौं बातौ लैई अहाब कै इशैक गुस्सा औआ कै तैणै एलिय्याह कै मारणौ का फौएसला कौरा।

इथकारिए पौरमेशवरै एलिय्याह कै बौल़ौ कै तू जौंगलौ पुंडा जाऐबा अहाब कैंईदा चौरे जा। एलिय्याह जौंगलौ पुंडा तैसी नाले कैई हौटा जिथै जाणौ कारिए पौरमेशवरै तैसी कै बौल़े राए थियु। रोज झीशौ औरौ रोज बैल़कै, कौऊवे एलिय्याह कारिए रोटी औरौ मास लैयांव थिऐ। इनु पूरै दुसौ दै, अहाब औरौ तैसकै सेना एलिय्याह कै जौंदै रौए, पौरौ तिनकै तैसी जुई ना।

बौरखा ना हौणौ शै किछै दुसौ कै बाद सैजा नाला शौकै गौआ। इथकारिए एलिय्याह नैड़िक कै ऐकी देशौ दा हौटे गौआ। तैसी देशौ दै ऐक गरीब बिधवा थै जियौंकै ऐकैई बैटा थिया। तिनकैई खाणौ लमसम खत्म हौए गौ थियु जिथुकै तिथै कुणजै शाक ना हौए रैई थी। पौरौ तोबै बै, तियैं बैटमाणिशै एलिय्याह कै दैखभाल़ कौरे, इथकारिए पौरमेशवरै तियौंकै औरौ तिंयारै बैटे की जरूतरौ कै पूरी कौरी, इथकी बौजेह शै तिंयारै आटै कौ बासण औरौ तिंयारै तेलौ कै कौप्पे कौलौंई खाली ना हौई। तैसी पूरे काल़ौ कै सौमय तिनकैई खाणौं थियु। एलिय्याह किछै सालो तौड़ी तिथै रौआ।

साढ़े ती सालो कै बाद, पौरमेशवरै एलिय्याह कै बौल़ौ कै सै ओटेयो बौरखा कौरदा। तैणै एलिय्याह कै पाछु इस्राएल कै राज्य दै जाऐबा अहाब वारी बातौ कौरणौ कारिए बौल़ौ। इथकारिए एलिय्याह अहाब कै धौरे हौटा। जोबै अहाबै तैसीकै दैखा तौ तैणै बौल़ौ, “आछा तू औसौ, मुसीबत पौयदा कौरणौ वाल़ा!” एलिय्याहै जबाब दिया, “मुसीबत पौयदा कौरणौ वाल़ा तौ तू औसौ! तौंऐ यहोवा कै छौड़े दिया। सैजाई साचा पौरमेशवर औसौ, पौरौ तौंऐ बाल दैव कै पूजा कौरे लौए। ऐबै ताखै इस्राएल राज्य कै सौबी लौगौ कै कर्मेल धारौ पांदी निणै पौड़दै।”

औरौ सोबै लौग कर्मेल धारौ पांदी हौटे। सैजै मौरद बै औवे जू बौल़ौ थिऐ कै बाल दैव कै सौंदेशौ कै बौल़ौए। ऐजै बाल दैव कै बातौ बौताणौ वाल़ै थिऐ। ऐ‍जै सोबै जौणै 450 थिऐ। एलिय्याहै लौगौ कै बौल़ौ, “कौलौ तौड़ी तुऐं आपणै मनो कै कठोर राखदै? जै यहोवा पौरमेशवर औसौ तौ तैसकै आराधना कौरौ! औरौ जै बाल दैव पौरमेशवर औसौ तौ तैसकै पूजा कौरौ!”

तोबै एलिय्याहै बाल कै बातौ बौताणौ वाल़ै कै बौल़ौ, “ऐकी बौल़्लदौ कै बौल़ि कौरेबा तिथकौ मास बोल़िदान हौणौ कै ऐकी बेदी पांदी राखौ, पौरौ आग नै लाया। तिथकै बाद हांव बै ऐशैकैई कौरदा, औरौ ऐकी जौई बेदी पांदी हांव तिथु मास राखदा। तोबै जै पौरमेशवर बेदी पांदी आग भैजल़ा तौ तुऐं जाणै पांदै कै सै साचा पौरमेशवर औसौ।” तोबै बाल कै बातौ बौताणौ वाल़ै ऐक बौल़ि तैयार कौरे पौरौ आग ना लैई।

तोबै बाल कै बातौ बौताणौ वाल़ै बाल दैव शै प्रार्थना कौरे, “ओए रै बाल, आमारी शुण!” पूरे दुस भौरे तिनुऐ प्रार्थना कौरे औरौ लैरौ मारी औरौ इथै तौड़ी कै आपी चाकु लैई काटिए, पौरौ बाल दैवताए जबाब ना दी, औरौ तैणै कुणजै आग ना भैजी।

बाल कै बातौ बौताणौ वाल़ै बाल दैवआरी प्रार्थना कौरणौ कै लमसम पूरू दुस बिताए दियु। औरौ तिनुऐ प्रार्थना कौरणै बौन्द कौरे दै। तोबै एलिय्याहै औकी बौल़्लदौ कौ मास पौरमेशवरौ कै बेदी पांदी राखै दियु। तिथकै बाद, तैणै लोगौ कै पाणी कै बौड़े बासणौ कै तैसी बोल़िदान पांदी तांव तौड़ी पैरनो कै बौल़ौ जांव तौड़ी कै मास, लाकड़ी, औरौ इथै तौड़ी कै बेदी कै आएरे-बाएरे जौमीन आछ कौरेयो गारा ना बौणै जांव।

तोबै एलिययाह प्रार्थना कौरे, “ओए रै यहोवा, अब्राहम, इसहाक, औरौ याकूब कै पौरमेशवर, आमु कै दिखांव कै तुई इस्राएल का पौरमेशवर औसौ औरौ ऐजौ कै हांव तैरा दास औसौ। मौखै जबाब दै जिथलैई कै ऐजै लौग जाणै पांव कै तुई साचा पौरमेशवर औसौ।”

तौलौंई, गौयणै पौरेशै आग छौटै औरौ तिथुऐ मास, लाकड़ी, चट्टानौ, माटै, औरौ इथै तौड़ी कै बेदी कै नैड़ि-बैड़ि कौ पाणी बै जौल़ाए दियु। जोबै लोगै ऐजौ दैखौ, तौ सै जौमीनौ पांदी रिड़ै औरौ बौल़ौ, “यहोवा ही पौरमेशवर औसौ! यहोवा ही पौरमेशवर औसौ!”

तोबै एलिय्याहै बौल़ौ, “बाल दैव का ऐक बै बातौ बौताणौ वाल़ा बौचेबा नै जाणा चैंई!” इथकारिए लोगै बाल दैव कै बातौ बाताणौ वाल़ै कै पाकड़ै दिऐ औरौ तिनुकै तिथैदै जौई नियौ औरौ तिनुकै मारे दिऐ।

तोबै एलिय्याहै अहाब राजा कै बौल़ौ, “तावल़ा आपणै घौरौ कै दौड़े जा, जिथुकै बौरखा हौणौवाल़ै औसौ।” तावल़ैई बादल़ घौणै हौए गौवे, औरौ जादा बौरखा शुरू हौए गौए। यहोवा तिथु शुकै कै खत्म कौरे लौ थियु इथलैई पौता चाला कै यहोवा ही साचा पौरमेशवर औसौ।

जोबै एलिय्याहै आपणै काम खत्म कौरे पाए, तौ पौरमेशवरे एलीशा नांव कै ऐकी मौरदौ कै आपणा पौरमेशवर की बातौ बौताणौ वाल़ा हौणौ कारिए चुणा। पौरमेशवरे एलीशा कै जरिए बौरिशै चमत्कार कै काम कौरे। ऐक काम नामान कै साथै हौआ। सै ऐक दुशमनौ कै सेना का ठौगड़ा थिया, पौरौ तैसी कै कौढ़ का रोग हौए गौआ थिया। नामानै एलीशा कै बारै मुंजी शौणै राए थियु, इथकारिए सै एलीशा कै धौरे औआ औरौ तैसकैई दै आपी कै ठीक हौणौ कै बिनते कौरे। एलीशाए नामान कै बौल़ौ कै जाऐबा यरदन नौंदी कै पाणी दी सात बैई डुबकै लाएआण।

नामान गुस्सा हौए गौआ। सै ऐशैकै कौरणौ कै बाजे गौआ। जिथुकै ऐजा तैसीकै बेवकुफी वाल़ा काम लागौ थिया। पौरौ बाद मे तैणै आपणा मन बौदल़े दिया औरौ जाऐबा यरदन नौंदी कै पाणी मुंजी सात बैई डुबकै मारे। जोबै सै आखरी बैई पाणी मुंजी दा बाएरै औऊंवा तौ पौरमेशवरे तैसी कै ठीक कौरे दिया।

पौरमेशवरे इस्राएल कै लौगौ कै धौरे औकै बौरिशै पौरमेशवर की बातौ बौताणौ वाल़ै छाड़ै। तिनु सौबीए लौगौ शै मूरती कै पूजा बौन्द कौरणौ कारिए बौल़ौ। इथकै बाजाए, तिनुकै ऐकी दुजैयारी न्याय कै साथै बरताव कौरणा चैंई औरौ ऐकी दुजै पांदी दया कौरणै चैंई। तिनु पौरमेशवरो की बातौ बौताणौ वाल़ै लौगौ कै चेतावनी दी कै तुऐं बुरै काम कौरणै बौन्द कौरे दैंव औरौ इथकै बौदल़े पौरमेशवर की बातौ का पालन कौरौ। जै तिनु लोगै ऐशैकै नै कौरौ तौ पौरमेशवर तिनुकै दोषै मानेबा तिनका न्याय कौरदा, औरौ तिनुकै सजा दैंदा।

जादातर सौमय, तिनु लोगै पौरमेशवर कै आज्ञा का पालन ना कौरी। हमैशा तिनुऐ पौरमेशवर की बातौ बौताणौ वाल़ै कै साथी बुरा बौरताव कौरा औरौ इथै तौड़ी कै कौलौंई-कौलौंई तिनुकै मारे दिऐ। ऐक बैई, तिनुऐ यिर्मयाह पौरमेशवर की बातौ बौताणौ वाल़ै कै शुकै कुएँ दा पाए दिया औरौ तैसी कै तिथै मौरणौ कारिए छौड़े दिया। सै कुएँ कै थाले दा कीचड़ौ मुंजी धौंसै गौआ। पौरौ तोबै राजा कै तैसपांदी दया आए औरौ तैणै आपणै सैनिकौ कै आदेश दिया कै यिर्मयाह कै मौरणौ दा आगै कुएँ पौरेशा बाएरै गाड़ै दैंव।

पौरमेशवर की बातौ बौताणौ वाल़ै पौरमेशवर कै ढौबौशौ बौल़णौ जारी राखौ भलैई लोगै तिनुवारी नफरत कौरे। तिनुऐ लोगौ कै चेतावनी दै कै जै तिनुऐ पाप कौरणै नै छुड़ी तौ पौरमेशवर तिनुकै नाश कौरे दैंदा। तिनुऐ लोगौ कै ऐजौ बै याद कौरौऊं कै पौरमेशवरै तिनकै धौरे मसीह कै भैजणौ का वादा कौरे राए।