20. गुलामी औरौ पाछु आणौ

इस्राएल कै राज्य औरौ यहूदा कै राज्य दुऐ पौरमेशवरौ कै खिलाफ पाप कौरा। तिनुऐ तैसी कौरारौ कै तौड़े दिया जू पौरमेशवरै तिनवारी सीनै धारौ पांदी कौरे राए थिया। पौरमेशवरै तिनुकै पाप कौरणै छौड़ दैणौ कारिए औरौ ओटेयो तैसकै आराधना कौरणौ कारिए चेतावनी दैणौ कै आपणै पौरमेशवर कै बातौ बौताणौ वाल़ै छाड़ै, पौरौ सै तिनकी बातौ मानणौ कै बाजै गौवे।

औरौ पौरमेशवरे तिनकै दुशमनौ कै तिनुकै नाश कौरणौ कै काबिल बाणणौ कै द्वारा दु राज्य कै सजा दै। अश्शूर ऐक औका देश थिया जू बैजाए शोकतीशाली हौए गौआ थिया। सै औकी देशौ कै प्रति बैजाए खराब थिऐ। तिनुऐ आऐबा इस्राएल कै राज्य का नाश कौरे दिया। अश्शूरी लौगै आऐबा इस्राएल कै राज्य दै बौहितै लौगौ कै मारे दिऐ, जू चौऊं सैजौ लूट पौऊ, औरौ देश कै कैई हिस्से जौलाए दिऐ।

अश्शूरी लौगै सौबी अगुवो, सैठ लौगौ, औरौ ऐशणै लौगौ कै जू मौंगी चीज़ौ बाणै सौकौ थिऐ ऐक साथै कौठे कौरे औरौ सै तिनुकै अश्शूर देश दै लौए गौवे। इस्राएल दै सिरफ दैणिक गरीब इस्राएली बौच गौवे।

तोबै अश्शूरी लोगै तैसी देशो दै रौणौ कारिए बिदेशी लौगौ कै लियौऊंऐ। तिनु बिदेशी लौगै तिनु नगरौ कै ओटेयो बाणै। जू इस्राएली तिथै बौचे रौवे थिऐ तिनुवारी तिनुऐ जाजड़ा बाणा। औरौ तिनु लौगौ कै वंशज कै सामरी बौल़ौ।

यहूदा कै राज्य कै लोगै दैखौ कै कैशैकै पौरमेशवर पांदी बिशवाश ना कौरणौ औरौ तैसकी बातौ ना मानणौ की बौजेह शै पौरमेशवरे इस्राएल कै राज्य कै लौगौ कै सजा दैऐ राए थै। पौरौ तोबै बै तिनुऐ कनानी लौगौ कै देवताओं कै पूजा कौरे। पौरमेशवरै तिनुकै चेतावनी दैणौ कारिए पौरमेशवर की बातौ बौताणौ वाल़ै छाड़ै, पौरौ सै शुणणौ शै बाजै गौवे।

लमसम 100 सालो कै बाद अश्शूरी लोगै इस्राएल कै राज्य कै नाश कौरे दिया। पौरमेशवरै बेबीलोन कै राजा, नबूकदनेस्सर कै यहूदा कै राज्य पांदी हमला कौरणौ कारिए छाड़ा। बेबीलोन ऐक शोकतीशाली देश थिया। यहूदा का राजा नबूकदनेस्सर का दास बौणणौ औरौ ऐई साल तैसीकै बौरिशै पौएसै दैणौ कारिए माने गौआ।

पौरौ किछै सालो कै बाद, यहूदा कै राजाए बेबीलोन कै खिलाफ बुरू कौरौ। औरौ बेबीलोन कै लोगै पाछु आऐबा यहूदा कै राज्य पांदी हमला कौरे दिया। तिनुऐ यरूशलेम नगर पांदी कब्जा कौरे दिया, औरौ मंदिर कै खत्म कौरे दिया, औरौ नगर औरौ मंदिर कै खौजाने कै लौटेबा लौए गौवे।

बुरू कौरणौ की बौजेह शै यहूदा कै राजा कै सौजा दैणौ कारिए, नबूकदनेस्सर कै सैनिकै राजा कै बैटे कै तैसकै सामणै मारे दिया औरौ ओटेयो तैसीकै आंधा कौरे दिया। इथकै बाद, सै राजा कै लौए गौवे ताकि सै बेबीलोन कै कोयदखाने दा मौरे जांव।

नबूकदनेस्सर औरौ तैसकै सेना यहूदा कै राज्य कै लमसम सौबी लौगौ कै बेबीलोन लौए गौवे, सिरफ सौबी दै गरीब लौगौ कै पौछौड़ियौ छौड़ेबा ताकि सै खेतौ पुंडै शाक बौवं। ऐसी सोमय कै काल़ो खै गुलामी बौल़े। जेसी बोकतो पौरमेशवर कै लौगौ कै वादे कै देश पौरेशै आगु जाणौ कारिए जबरदस्ते कौरे राए थै।

भलैई पौरमेशवरै आपणै लौगौ कै तिनकै पापौ कारिए गुलामी दै जाणौ कारिए सौजा दै, तोबै बै सै तिनुकै या आपणै वादे कै ना बिसरे रैई थी। पौरमेशवरै आपणै लौगौ कै निगराने राखणै जारी राखै औरौ आपणै पौरमेशवर की बातौ बौताणौ वाल़ै लैई तिनवारी बातौ कौरदा रौआ। तैणै वादा कौरा कै सतर सालो कै बाद, सै ओटेयो वादे कै देश दै पाछु जांदै।

लमसम सतर सालो कै बाद, फारस कै राजा कुस्रूए बेबीलोन कै हौराए दियु, इथकारिए बेबीलोन कै साम्राज्य कै बजाए फारस कै साम्राज्यऐ कैई देशो पांदी राज कौरा। इस्राएली लौग ऐबै यहूदी कैहलांव थिऐ। तिनमुंजी दै बौहिते आपणा जीवन बेबीलोन दा बिताए दिया थिया। सिरफ थोड़ेई बूढ़े यहूदी लौगौ कै ही यहूदा का देश याद थिया।

फारसी लौग बेजाए तागतवर थिऐ, पौरौ तिनुऐ आपणै जीतेयोंदै लौगौ पांदी दया कौरे राए थै। फारसी लोगौ का राजा बौणणौ कै थौड़े दुसौ कै बाद, कुस्रूए ऐक आदेश दिया कै कुणजाई बै यहूदी जू यहूदा देश कै पाछु जाणौ चांव थिया, सै फारस शै निकल़ेबा पाछु यहूदा कै जाए सौकौ। इथै तौड़ी कै तैणै तिनुकै मंदिर कै ओटेयो बाणणौ कारिए पोयसे बै दिये। औरौ गुलामी कै सतर सालो कै बाद, यहूदी लोगौ का ऐक नानड़ा गुट यहूदा दा यरूशलेम नगर कै पाछु आए गौआ।

जोबै सैजै लौग यरूशलेम पौंईचे तौ तिनुऐ मंदिर कै औरौ नगर कै चौऊ ढौबौ कै दीवार ओटेयो बाणै। फारसी लौग ऐबै बै तिनु पांदी राज कौरौ थिऐ पौरौ ऐक बैई ओटेयो सै वादे कै देश दै रौए रौवे थिऐ औरौ मंदिर दै आराधना कौरे लौए थै।