22. यूहन्ना का जन्म

पुराणै सौमय दी, पौरमेशवरै आपणै बातौ बौताणौ वाल़ै आरी बातौ कौरे रैई थी इथकारिए सै लौगौआरी बातौ कौरे सौकौ थिऐ। पौरौ तौलौ दौऊंडे औरौ ओटेयो 400 सालो बीतणौ तौड़ी तैणै तिनुवारी बात ना कौरी। तोबै पौरमेशवरै जकर्याह नांव कै पौरमेशवर की बातौ बौताणौ वाल़ै कै धौरे ऐक स्वर्गदूत छाड़ा। जकर्याह औरौ तैसकै घौरवाल़ै एलीशिबा पौरमेशवरौ का आदर कौरौ थिऐ। सै बैजाए बूढ़ै हौए गौवे थिऐ, औरौ तिनकै कुणजै औलाद पौयदा ना हौए रैई थी।

तैसी स्वर्गदूतै जकर्याह कै बौल़ौ, “तैरे घौरवाल़ी कै ऐक बैटा पौयदा हौंदा। तू तैसकौ नांव यूहन्ना राखेया। पौरमेशवर तैसी कै पवित्र आत्मा शै भौरे दैंदा, औरौ यूहन्ना लौगौ कै मसीह कै औपनाणौ कारिए तैयार कौरदा।” जकर्याहै जबाब दिया, “हांव औरौ मैरे घौरवाल़ी ओलाद पौयदा कौरणौ कारिए बैजाए बूढ़ै औसौ! हांव कैशैकै जाणु कै तौंऐ मौंवागै साचौ बौल़े लौ?”

तैसी स्वर्गदूतै जकर्याह कै जबाब दिया, “तैरे धौरे ऐसी आछै सौंदेश कै लाणौ कारिए मौखै पौरमेशवरै छाड़ै राए। जिथुकै तौऐं मौं पांदी बिशवाश ना कौरे रैई, इथकारिए नानड़िया कै पौयदा हौणौ तौड़ी तू बौल़ाए ना पांदा।” तौलौंई, जकर्याह कै बौल़ाणौ बौन्द हौए गौ। तोबै सैजा स्वर्गदूत जकर्याह कै धौरौ दा आगु हौटा। इथकै बाद, जकर्याह घौरौ कै आए गौआ औरौ तैसकी घौरवाल़ी कै हौल़किणु हौं।

जोबै एलीशिबा कै छटा मीहना थिया, तौ सैजाई स्वर्गदूत ऐकदम एलीशिबा कै रिशतेदारौ पांदी प्रकट हौआ, जियौंकौ नांव मरियम थियु। मरियम कौंवारे थै औरौ जाजड़ा बाणणौ कारिए यूसुफ नांव कै मौरदौ कै साथै तियौंकै सौगाए हौए रौऐ थै। स्वर्गदूतै बौल़ौ, “तैरै हौल़किणौ हौल़ौ औरौ तू ऐकी बैटे कै जन्म दैले। तू तेसकौ नांव यीशु राखेया। सै पौरमेशवर का जू सौबीदा बौड़ा पौरमेशवर औसौ तैसका बैटा हौंदा औरौ हौमेशा कारिए राज कौरदा।”

मरियमै जबाब दिया, “ऐजौ कैशैकै हौंदौ, जिथुकै हांव तौ कौंवारे औसौ?” तैसी स्वर्गदूतै सौमझौऊं, “पवित्र आत्मा तांव पांदी आंदा, औरौ पौरमेशवरौ कै शोकते तांव पांदी आंदै। इथकारिए सैजा भैईया पवित्र हौंदा, औरौ सै पौरमेशवरौ का बैटा हौंदा।” जू तैणै स्वर्गदूतै बौल़ौ तिथपांदी मरियमै बिशवाश कौरा।

ऐजौ हौणौ कै बाद तावल़े, मरियम जाऐबा एलीशिबा आरी भैटे। जैशैकैई मरियमै तियौंकै नमशकार कौरा, एलीशिबा कौ नानड़िया तियौंकै पेटौ दौ छाटियु। तिनु कारिए जू पौरमेशवरै कौरे राए थियु तिथकै बारै मुंजी सैजी बैटमाणिशौ ऐक साथै खुशी हौई। एलीशिबा कै साथै तीन मीने रौणौ कै बाद, मरियम आपणै घौरौ कै पाछु हौटे गौऐ।

इथकै बाद, एलीशिबाए आपणै भेईया कै जन्म दिया। जकर्याह औरौ एलीशिबाए तैसी भेईया कौ नांव यूहन्ना राखौ, जैशैकै तैणै स्वर्गदूतै आदेश दैऐ राए थिया। तोबै पौरमेशवरै जकर्याह कै बौल़ाणौ कारिए काबिल बाणा। जकर्याहै बौल़ौ, “पौरमेशवर कै बौड़ाए हौंव, जिथुकै तैणै आपणै लौगौ कै मदद कौरणौ कै याद राख राए! ओए रै मैरा बैटा, तू पौरमेशवर का जू सौबीदा बौड़ा पौरमेशवर औसौ तैसका बातौ बौताणौ वाल़ा हौंदा। तू लौगौ कै बौतांदा कै सै कैशैकै आपणै पापौ कारिए माफी पाए सौकौ!”