23. यीशु का जन्म

यूसुफ नांव कै ऐकी धरमी आदमीयारी मरियम कै सौगाए हौए रौए थै। जोबै तैणै शुणु कै मरियमौ कै होल़किणु औसौ तौ सै जाणौ थिया कै सैजौ नानड़िया तैसकौ ना आथी। पौरौ, सै मरियम कै बदनाम नै कौरणै चांव थिया, इथकारिए तैणै तियौं पांदी दया कौरे औरौ तियौंकै चुपी तलाक दैणौ कौ सुंचु। पौरौ इंदु औगौड़ियौ कै सै ऐशैकै कौरदा, ऐकी स्वर्गदूतै तैसकै सुईणै मुंजी आऐबा तैसयारी बात कौरे।

तैसी स्वर्गदूतै बौल़ौ, “औए रै यूसुफ, मरियम कै आपणै घौरवाल़ी बाणैबा उंडे लाणौ कै डौरेया नै। तिंयारै पेटौ दौ जू नानड़िया औसौ सै पवित्र आत्मा कै ढौबौशा औसौ। सै ऐकी बैटे कै जन्म दैंदे। तैसकौ नांव यीशु राखैया (जिथका मतलब औसौ, ‘यहोवा बौचांणौ वाल़ा’), जिथुकै सै लौगौ कै तिनकै पापौ शै बौचांदाए।”

औरौ यूसुफे मरियमवारी जाजड़ा बाणा औरौ तिंयौकै आपणै घौरवाल़ी बाणैबा घौरौ कै लाए, पौरौ तिंयारै नानड़िया कै जन्म दैणौ तौड़ी सै तिंयारै साथी ना सुती।

जोबै मरियमौ कै सुजणौ का सौमय नैड़िक थिया, तौ तियैं औरौ यूसुफे बैतलहम जाणौ कै ऐक लांबै यात्रा कौरे। तिनुकै तिथै जाणौई पोड़ो थियु जिथुकै रोमी अधिकारी इस्राएल दै रौणौ वाल़ै सौबी लौगौ कै गिनते कौरणै चांव थिऐ। सै चांव थिऐ कै सोबै लौग तिथै जांव जिथै तिनकै पुराणिया रौंव थिऐ। राजा दाऊद का जन्म बैतलहम दा हौए रौआ थिया, औरौ सै मरियम औरौ यूसुफ दु का पुराणिया थिया।

मरियम औरौ यूसुफ बैतलहम नगर कै हौटे, पौरौ तिथै गौरू कै शाल़ छौड़ेबा तिनुकै रौणौ कारिए औका कुणजाई बै ठाँव ना भैटी। सैजाई ठाँव थिया जिथै मरियमै आपणै बैईया कै जोनम दिया। तिंयै तैसीकै खुरल़ी दा राखा जिथुकै तिथै तियौं कारिए कुणजाई बिछाणा नै थी। तिनुऐ तैसकौ नांव यीशु राखौ।

तियौंई राते, तिथै नैड़िक ही खेतौ दै किछै चोराईयाँ आपणी भेड़ौ कै झुंडौ कै रौखवाल़ै कौरे लौए थै। ऐकदम शै, ऐक झमाकेदार स्वर्गदूत तिनपांदी प्रकट हौआ, औरौ सै डौर गौवे। औरौ तैसी स्वर्गदूतै बौल़ौ, “डौरेया नै, जिथुकै मौंवागै तुऔं कारिए खुशी का सुसमाचार औसौ। बैतलहम नगर दा मसीह, जू सोबिका मालिक औसौ तैसका जोनम हौए रौआ!”

जाऐबा तैसी बैईया कै जौंऔ, “औरौ तुऐं तैसी खौटणौ दा लोपेटेयौंदा औरौ खुरल़ी दा लेटेयौंदा दैखदै।” ऐकदम शै, गौयण स्वर्गदूतौ लैई भौरे गौऐ। तिनुऐ पौरमेशवर कै बौड़ाए कौरे लौए थै। तिनुऐ बौल़ौ, “सोबै महिमा स्वर्ग दै रौंणौवाल़ै पौरमेशवरौ कै भैटौ। धौरती पांदी तिनु लौगौ मुंजी शान्ते हौंव जिनकै सै फिकर कौरौ!”

तोबै स्वर्गदूत हौटे गौवे। सै चोराईयाँ बै आपणी भेड़ौ कै छौड़ेबा भेईया कै दैखदै हौटे। तावल़ेई सै तैसी ठाँव दै पौंईचे जिथै यीशु थिया औरौ तिनुऐ तैसीकै खुरल़ी दा लेटेयौंदा दैखा, जैशैकै तैसी स्वर्गदूतै बौल़े राए थियु। सै बैजाए खुशी थिऐ। तोबै सैजै चोराईयाँ पाछु तिथै हौटे जिथै तिनकी भेड़ौ थी। तिनुऐ जु किछै बै शुणौ औरौ दैखौ तिथु सौबी कारिए तिनुऐ पौरमेशवरौ कै बौड़ाए कौरे लौए थै।

पूर्व दै दूर ऐकी देशौ दै किछै मौरद थिऐ। तिनुऐ सितारो कै बारै मुंजी पौढ़े राए थियु औरौ सै बैजाए बुध्दिमान थिऐ। तिनुऐ ऐक औकबांता तारा गौयणै दा दैखा। तिनुऐ बौल़ौ कै इथका मतलब औसौ कै यहूदियो दा ऐक नौवाँ राजा का जोनम हौआ। इथकारिए तिनुऐ तैसी बैईया कै दैखणौ कारिए आपणै देश पौरेशै यात्रा कौरणौ का फोयसला कौरा। ऐक लांबै यात्रा कै बाद, सै बैतलहम दै औवे औरौ तैसी घौरे हौटे जिथै यीशु औरौ तैसकै माँ-बापू रौंदै लाग रौवे थिऐ।

जोबै इनु मौरदै यीशु कै आपणै माँआरी दैखा तौ तिनुऐ गुन्डू नियुड़ाऐबा तैसकै आराधना कौरे। तिनुऐ यीशु कै मौंगै तौफे दिऐ। तोबै सै पाछु घौरौ कै हौटे।