24. यूहन्ना यीशु कै बपतिस्मा दैंव

एलीशिबा औरौ जकर्याह का बैटा यूहन्ना, बौड़ा हौएबा ऐक पौरेमेशवरौ की बातौ बौताणौ वाल़ा बौणै गौआ। सै जौंगलौ पुंडा रौया कौरौ थिया, औरौ जौंगलौ का मौं औरौ चिचले खाया कौरौ थिया, औरौ ऊँटौ कै बाल़ौ कै बुणैयोंदै खौटणौ बाम्बेया कौरौ थिया।

बौहिते लौग यूहन्ना की बातौ शुणणौ कारिए जौंगलौ कै नैड़िक औऊंवे। तैणै ऐजौ बौल़ेबा तिनुकैंई प्रचार कौरा, “पाप कौरणै छौड़े दैंव, जिथुकै स्वर्ग का राज्य नैड़िक औसौ!”

जोबै लोगै यूहन्ना कै सौंदेशौ कै शुणा, तौ तिनु मुंजीदै बौहिते आदमिए पाप कौरणै छौड़े दिऐ, औरौ यूहन्नाए तिनुकै बपतिस्मा दिया। यूहन्ना दैखणौ कारिए बौरिशै धरमी अगुवे बै औऊंवे, पौरौ तिनुऐ पाप कौरणै ना छुड़ी औरौ आपणै पाप ना मानी।

यूहन्नाए धरमी अगुवौ कै बौल़ौ, “औए रै जौईरीले शौंगौऊ कै जैशणै लौगौ! पाप कौरणै छौड़े दैंव औरौ आपणै बरताव कै बौदल़ौ। पौरमेशवर तिनु सौबी डाल़ौ कै काटे दैंदा जू आछा फौल़ ना लांव, औरौ सै तिनुकै आगै मुंजी पाए दैंदा।” जू पौरमेशवर की बातौ बौताणौ वाल़ै बौल़े राए थियु यूहन्नाए तिथु पूरू कौरौ, “दैख, तावल़ाई हांव तैरे औगौड़ियौ आपणा सौंदेश दैणौ वाल़ा छाड़दा जू तांव कारिए बाट तैयार कौरदा।”

किछै धरमी अगुवे यूहन्ना कैंईदु पूछु कै का तू मसीह औसौ। यूहन्नाए जबाब दिया, “हांव मसीह ना आथी, पौरौ सै मैरे बाद आंदा लाग रौआ। सै इशैक महान औसौ कै हांव तौ तैसकै जूतै कै तशमै खौलणौ कै लायक बै ना आथी।”

औकी दुसै, यीशु बपतिस्मा लौणौ कारिए यूहन्ना कै धौरे औआ। जोबै यूहन्ना तैसी कै दैखा, तौ तैणै बौल़ौ, “दैखौ! पौरमेशवर का गाबटु जू दुनिया कै पापौ कै सौऐन कौरेबा लौए जांदा।”

यूहन्नाए यीशु कै बौल़ौ, “हांव ताखै बपतिस्मा दैणौ कै लायक ना आथी। इथकी जौगेह जौरूरी औसौ कै तू मौखै बपतिस्मा दै।” पौरौ यीशुए बौल़ौ, “ताखै मौखै बपतिस्मा दैणा चैंई, जिथुकै कौरणौ कारिए सौही काम ऐजाई औसौ।” औरौ यूहन्नाए तैसीकै बपतिस्मा दिया, जोबै कै यीशुए कौलौंई पाप ना कौरे रैई थी।

बपतिस्मा दैणौ कै बाद जोबै यीशु पाणी पौरेशा बाएरै औआ, तौ पौरमेशवरौ का आत्मा कबूतर कै रुपौ दा प्रकट हौआ औरौ धैनै आऐबा तैसपांदी बौठ गौआ। तौलौंई, पौरमेशवरै स्वर्ग पौरेशै बात कौरे। तैणै बौल़ौ, “तू मैरा लाड़कु बैटा औसौ। हांव तौंवारी प्यार कौरू, औरौ हांव तांवदा बैजाए खुशी औसौ।

पौरमेशवरै यूहन्ना कै बौल़े राए थियु, “पवित्र आत्मा धैनै आऐबा जैसी कौसी पांदी बौठ जाला जैसीकै तू बपतिस्मा दैला।” सैजाई पौरमेशवरौ का बैटा औसौ पौरमेशवर ऐकैई औसौ। पौरौ जोबै यूहन्नाए यीशु कै बपतिस्मा दिया, तौ तैणै पौरमेशवर पिता कै बातौ कौरदिए बैई शुणा, बैटा पौरमेशवर कै दैखा, जू कै यीशु औसौ, औरौ तैणै पवित्र आत्मा कै दैखा।