26. यीशु आपणै सेवा शुरू कौरौ

शैतानौ कै पौरखौणौ कै बाद, यीशु पाछु गलील इलाके दा औऊंवा। ऐजाई सैजा ठांव औसौ जिथै सै रौंव थिया। पवित्र आत्मा तैसी कै बैजाए शौकते दैए लौए थै, औरौ यीशु ऐकी ठाँव पौरेशा औकी ठाँव दा हौटा औरौ लौगौ कै शिक्षा दै। औरौ सौबीए तैसकै बारै मुंजी आछी बातौ बुली।

यीशु नासरत गांव दा हौटा। ऐजा सैजा गांव औसौ जिथै सै नानड़ै दा रौंव थिया। बिशांव कै दुसै, सै आराधना कौरणौ कै ठाँव दा हौटा। अगुवे तैसीकै यशायाह पौरमेशवर की बातौ बौताणौ वाल़ै कै सौंदेशौ कै ऐक किताब दै। सै चांव थिऐ कै सै तिथ पौरेशौ पौढ़ौ। औरौ यीशुए तिंयौ किताबौ कै खौलेबा तिथका ऐक भाग लौगौ कारिए पौढ़ा।

यीशुए पौढ़ौ, “पौरमेशवरै मौखै आपणा आत्मा दिया ताकि हांव कंगालौ कै सुसमाचार प्रचार कौरे सौकुं। तैणै मौखै इथकारिए छाड़ा कै कौयदी कै आज़ाद कौरू, शैड़े कै ओटेयो दैखियो, औरौ तिनुकै छुटकारा दिंयु जिनुकै औकी लोगै जैन्गै लौवे। ऐजा सैजा सौमय औसौ जोबै पौरमेशवर आमु पांदी दया कौरदा औरौ अमारै मौदद कौरदा।”

तोबै यीशु बौठ गौआ। सौबी लोगै तैसी कै ध्यान शै दैखै लौआ थिया। लोग जाणौ थिऐ कै पवित्रशास्त्र का जू भाग तैणै इबी पौढ़े राए थिया सै मसीह कै बारै मुंजी थिया। यीशुए बौल़ौ, “जू बातौ मौंऐ इबी तुऔं कारिए पौढ़े रैई, सैजी इबी हौंदी लाग रौई।” सोबै लौग हैरान थिऐ। तिनुऐ बौल़ौ, “का ऐ यूसुफ का बैटा ना आथी?”

तोबै यीशुए बौल़ौ, “ऐजौ साचौ औसौ कै लौग कौसी ऐशणै पौरमेशवर की बातौ बौताणौ वाल़ै कै कौलौंई ना औपनांव जू तिनकै नगरौ दा बौड़ा हौए रौला। एलिय्याह पौरमेशवर कै बातौ बौताणौ वाल़ै कै सौमय दी, इस्राएल दी बौरिशी बिधवा थी। पौरौ जोबै साढ़े तीन शौ सालो तौड़ी बारिश ना हौई तौ पौरमेशवरै एलिय्याह कै इस्राएल दा कौसी औकी बिधवा कै मौदद कौरणौ कारिए ना छाड़ी। इथकै जौगेह, तैणै एलिय्याह कै कौसी औकी देशो कै बिधवा कै धौरे छाड़ा।”

यीशुए हौजौ बौल़ौ, “औरौ एलीशा पौरमेशवर की बातौ बौताणौ वाल़ै कै सौमय दै, इस्राएल दै बौरिशै लौग चमड़ी कै रोगी थिए। पौरौ एलीशाए तिनमुंजी दै कौसी कै बै ठीक ना कौरी। तैणै सिरफ इस्राएल कै दुशमन सेनापति नामान कै ठीक कौरा।” पौरौ जिनु लोगै यीशु कै शौणै लौआ थिया सै यहूदी थिऐ। इथकारिए जोबै तिनुऐ तैसीकै ऐजौ बौलदिये बैई शुणा तौ सै तैसपांदी गुस्से हौवे।

नासरत गांव कै लोगै यीशु कै पाकड़ा औरौ तैसीकै आराधना कै ठांव पौरेशा झिड़ेयो बायरै लौए गौवे। तिनिए तैसी मारणौ कारिए धैनै फैरकाणौ कै ऐकी कोफाड़ो कै कुणै पांदी लौए गौवे। पौरौ यीशु भीड़ौ मुंजी दा निकल़े गौआ औरौ नासरत गांव कै छौड़ेबा आगु हौटा।

तोबै यीशु पूरे गलील जिले दा हौटा, औरौ बौड़े भीड़ तैसकै धौरे आए। तिनुऐ बौरिशै ऐशणै लौग लियौऊंए जू बीमार औरौ अंपग थिऐ। तिनमुंजी दै किछै दैखै, हांडे, शौणै औरौ बौल़ाए नै सौकौ थिऐ, औरौ यीशुए तिनुकै ठीक कौरे।

इथकै आलावा, बौरिशै ऐशणै लौग यीशु कै धौरे लियौंऊए जिनुदी दुष्टआत्माएं थी। यीशुए दुष्टआत्मांव कै निकौल़णौ का आदेश दिया। तिनु दुष्टआत्माएं जादातर लेरौ मारेयो बौल़ौ, “तू पौरमेशवर का बैटा औसौ!” भीड़ कै लौग हैरान थिऐ, औरौ तिनुऐ पौरमेशवरौ कै बौड़ाए कौरे।

तोबै यीशुए बारौ मौरदौ कै चुणै जिनुकै तैणै आपणै प्रेरित बौल़े। तिनु प्रेरिते तैसकै साथै यात्रा कौरी औरौ तैसकैंई दी शिक्षा पैई।