27. गिणाल़ु सामरी कै काहाणै

ऐक दुस, यहूदी शास्त्र का ऐक ज्ञानी यीशु कै धौरे औऊंवा। सै सौबी कै ऐजौ दिखाणौ चाँव थिया कै यीशुए गौल़त तरीकै शै शिक्षा दैऐ लौए थै। इथकारिए तैणै बौल़ौ, “औए रै गुरु जी, सदा कै जिन्दगी पाणौ कारिए हांव का कौरु?” यीशुए जबाब दिया, “मूसा कै कानून दौ का लैखै राए?”

तैसी आदमीए बौल़ौ, “सै बौल़ौ कै आपणै पौरमेशवरआरी आपणै पुरै मन शै, प्राण शै, पुरी शौकती शै औरौ पुरी बुध्दि शै प्यार राख।” यीशुए जबाब दिया, “तू ऐकदम सौही औसौ! जै तू ऐशैकै कौरे, तौ ताखै सदा कै जिन्दगी भैटदै।”

पौरौ सैजा यहूदी शास्त्र का ज्ञानी लौगौ कै दिखाणौ चांव दिया कै तैसका जीवन जीणौ का तौरीका सौही थिया। इथकारिए तैणै यीशु कै पूछु, “ठीक औसौ, तौ मैरा पौड़ौशै कुण औसौ?”

यीशुए तैसी यहूदी शास्त्र कै ज्ञानी कै ऐक काहाणै शुणाऐबा जबाब दिया। “ऐक यहूदी आदमै थिया जू ऐकी शौड़कै बाटी यरूशलेम शहर पौरेशा यरीहो नगर कै चाले रौआ थिया।”

“पौरौ किछै डाकुऐ तैसीकै दैखा औरौ तैसपांदी हमला कौरे दिया। तिनुऐ तैसकौ सोबै ठुँ उंढु कौरौ औरौ तैसीकै मारै पिटेबा अधमौरेयौंदा छौड़ेबा आगु हौटे।”

“तौलौंई, ऐक यहूदी पुरोहित तियौं शौड़कै बाटी हौटा। तैसी यहूदी पुरोहिते तैसी आदमी कै शौड़कै दा पौड़ेयौंदा दैखा। जोबै तैणै तैसीकै दैखा तौ सै शौड़कै कै औकी बाटो बाटी आगु हौटा। तैणै तैसी आदमी कै जाणबुझियों अणदैखा कौरे दिया।”

“इथकै बाद किछै सौमय हौणौ पांदी, ऐक लेवी तैसी शौड़कै बाटी औआ। (लेवी यहूदियो का ऐक गोत थिया जिनुऐ मंदिर दै पुरोहितौ कै मौदद कौरे राए थै।) सै बै शौड़कै कै औकी बाटो बाटी आगु हौटा। तैणै बै तैसी आदमी कै अणदैखा कौरे दिया।”

“औका आदमै जू शौड़कै बाटी औआ सै सामरिया देश का ऐक मौरद थिया। (सामरी औरौ यहूदी लौग ऐकी दुजैयारी नफरत कौरौ थिऐ।) तैसी सामरीए शौड़कै दा तैसी आदमी कै दैखा। तैणै दैखौ कै सै यहूदी औसौ, पौरौ तोबै बै सै तैसी पांदी गिणौऊंवा। औरौ सै तैसकै धौरे हौटा औरौ तैसकै घाव पांदी पाटी बानी।”

“तोबै तैसी सामरी आदमीए तैसी कै आपणै गधे पांदी राखा औरौ तैसीकै तियौंई शौड़कै बाटी ऐकी संराऐं दा लौए गौआ। जिथै तैणै तैसकै देखभाल कौरे।”

औकी दुसै, तैसी सामरी कै आपणै यात्रा कौरणै जौरूरी थै। तैणै तैसी संराऐं कै मालिकौ कै किछै रूपीए दिऐ। तैणै तैसीकै बौल़ौ, “ऐसी आदमी कै दैखभाल कौरेया। जै इनु रूपीए कै अलावा तैरै हौजौ किछै रूपीए लागौ तौ पाछु आऐबा हांव तैरे तिनु रूपीए बै दैय दैंदा।”

तोबै यीशुए तैसी यहूदी शास्त्र कै ज्ञानी कैईदु पूछु, “तुऐं का सुंचौ? इनु ती लोगौ मुंजी दा कूण तैसी आदमी का पौड़ोशै औसौ जैसीकै लौटे औरौ पिटे राए थिया?” तैणै जबाब दिया, “सैजा जू तैसपांदी गिणौऊंवा थिया।” यीशुए तैसीकै बौल़ौ, “तू बै जा औरौ ऐशैकैई कौर।”