28. सैठ नोजवान सैनिक

ऐक दुस, ऐक सैठ नोजवान सैनिकै यीशु कै धौरे आऐबा तैसकैंईदु पूछु, “औए रै सौबिदा बौड़ा गुरु, सदा कै जिन्दगी पाणौ कारिए मौखै का कौरणौ चैंई?” यीशुए तैसीकै बौल़ौ, “तू मौखै ‘सौबिदा बौड़ा’ किथुकै बौल़ै? सिरफ ऐकैई सौबिदा बौड़ा औसौ औरौ सै पौरमेशवर औसौ। पौरौ जै तू सदा कै जिन्दगै पाणै चांए तौ पौरमेशवरौ कै कानूनौ का पालन कौर।”

तैणै पूछु, “मौखै कुणजी-कुणजी आज्ञाओ का पालन कौरणौ कै जौरूरत औसौ?” यीशुए जबाब दिया, “खून नी कौरेया। गौलत सौमबंध नी बाणैया। चौरे नी कोरेया। झूठ नी बौल़ेया। औरौ आपणै माँ-बापू का आदर कौरेया, औरौ आपणै पौड़ोशीयारी आपणै जैशणा प्यार कौरेया।”

पौरौ तैसी नोजवान मौरदै बौल़ौ, “हांव आपणै बचपन शै इनु सौबी आज्ञाओं का पालन कौरदा आए रौआ। मौखै सदा जियुंदी रौणौ कारिए ऐबै बै का कौरणौ कै जौरूरत औसौ?” यीशुए तैसी दै नौजर पाए औरौ तैसयारी प्यार कौरा।

यीशुऐ जबाब दिया, “जै तू सिध्द बौणणौ चांए तौ जाऐबा आपणौ सोबै ठुँ बिकै दै औरौ सैजै पोएसै गरीबौ मुंजी बांटै दै, औरौ ताखै स्वर्ग दा धन भैटला। तोबै आऐबा मैरे पौछौड़ियौ हौए जा।”

जू यीशुए बौल़ौ सेजो तैसी नोजवान मौरदै शुणु तौ सै बैजाए उदास हौए गौआ, जिथुकै सै बैजाए सैठ थिया औरौ तैणै आपणै सोबै जायदात दैणै ना चैंई। सै पाछु फेरेबा यीशु कै धौरै दा आगु हौटा।

तोबै यीशुए आपणै चैलै कै बौल़ौ, “पौरमेशवर कै राज्य दा सैठ लौगौ का जाणा बैजाए चैईंथा औसौ! जोरुर, ऐक सैठ आदमी कौ पौरमेशवरौ कै राज्य दौ जाणौ कै तुलना दौ कौसी ऊँटौ कै सिओणी कै पाशी पौरेशौ होयो जाणौ आसान औसौ।”

जू यीशुऐ बौल़ौ जौबै चैलै ऐजौ शुणु तौ सै बैजाए हैरान हौवे। तिनुऐ बौल़ौ, “जै ऐजौ ऐशैकै औसौ तौ पौरमेशवर कौसी कै बौचांदा?”

यीशुऐ चैलै पांदी नौजर लाए औरौ बौल़ौ, “लोगौ का आपणा उध्दार कौरणा चैईंथा औसौ। पौरौ पौरमेशवरौ कारिए किछै बै कौरणौ चैईंथु ना आथी।”

पतरसै यीशु कै बौल़ौ, “आमै सोबै चैलै आपणौ सोबै ठुँ छौड़ेबा तैरे पौछौड़ियौ हौए गौवे। तौ अमारा इनाम का हौंदा?”

यीशुऐ जबाब दिया, “हरेक आदमै जैणै मौ कारिए घौर, भाए, बौईण, माँ, बापू, नानड़िया, औरौ जायदात बै छौड़े दै, सै तिंददा बै जादा 100 गुणा फोल़ पांदा औरौ सदा कै जिन्दगै बै पांदाए। पौरौ बौरिशै जू आगल़ै औसौ सै पौछौड़ियौ हौंदै, औरौ बौरिशै जू पाछल़े औसौ सै औगौड़ियौ हौंदै।”