30. यीशु पाँच हजार लोग गिला के खियालक

यीशु आपन चेला गिला के परचार करेक आर लोग गिला के सिछा देक तेहें ढेइरे अलग-अलग गाँव गिलाय पइठालक। जखन उमन घुरलयँ जहाँ यीशु रहे तो उमन उके कइह देलयँ कि उमन का कइर रहयँ। तखन यीशु उमन के झील केर दसर धार बाटे उकर संगे एकटा सान्त जायगाय जाय कहन थोड़ेक समइ आराम करेक तेहें डाकलक। सेतेहें उमन एकटा नाव उपरे चापलयँ आर झील केर दसर धार बाटे चइल गेलयँ।

किन्तु हुआँ ढेइर एसन लोग गिला रहयँ जे गिला यीशु आर चेला गिला के नाव मेहेन जात के देइख रहयँ। इ लोग गिला उमन लेक आघु झील केर दसर धार बाटे जायेक तेहें झील केर धारे-धारे कुदलयँ। सेतेहें जखन यीशु आर चेला गिला पहँचलयँ तो लोग गिला केर एकटा बड़े भीड़ उकर इन्तजार करत के हुआँ पहिल लेक रहयँ।

उ भीड़ मेहेन बेटी छुवा गिला आर छुवा गिला केर संख्या बिना गनले पाँच हजार लेक बेसी पुरुस गिलाय रहयँ। यीशु उ लोग गिलाय बेजाइन तरस खालक। यीशु केर तेहें उ लोग गिला बिना चरवाह केर भेड़ी गिला केर समान रहयँ। सेतेहें ऊ उमन के सिछा देलक आर उमन मेइधे जन लोग गिला रोगी रहयँ उमन के चंगा करलक।

दिन केर आखरी मेहेन, चेला गिला यीशु के कहलयँ, “एधाँव देरी हय गेलक आर आसे-पासे कनअ नगर नेखे। इ लोग गिला के विदा कर ताकि उमन खायेक तेहें कनअ लेउन।”

किन्तु यीशु चेला गिला के कहलक, “तोहरे उमन के खायेक तेहें कनअ देवा!” उमन जबाब देलयँ, “हामरे एसन का निहार करे पारब? हामरेक तहाँ केबल पाँच टा पिठा आर दुइटा छोटे माछ गिला आहयँ।”

यीशु आपन चेला गिला के कहलक कि उमन भीड़ केर लोग गिला के घाँसे पचास-पचास केर समूह मेहेन बइसेक तेहें कहुन।

तखन यीशु पाँच टा पिठा आर दुइटा माछ गिला के ले कहन सरग बाटे देखलक, आर उ खायेक तेहें परमेश्‍वर केर धन्यबाद देलक।

फिन यीशु पिठा आर माछ गिला के खेंचा करलक। ऊ लोग गिला के देक तेहें आपन चेला गिला के उ खेंचा गिला के दे देलक। चेला गिला उ खायेक टाके बाँटते रहलयँ, आर उटा कबउ सिराय नाइ हलक! उ सउब लोग गिला खाय कहन आघाय गेलयँ।

उकर बादे, चेला गिला उ खायेक टाके जामा करलयँ जेटा के उमन नाइ खाय रहयँ आर उटा बारो खाँची भरेक तेहें काफी रहे! उ सउब खायेक गिला उ पाँच टा पिठा आर दुइटा माछ गिला लेक आय रहे।